ముంబై (మహారాష్ట్ర): ఆల్ ఇండియా మజ్లిస్ ఎ ఇత్తెహాదుల్ ముస్లిమీన్(ఏఐఎంఐఎం) పార్టీకి చెందిన ఎమ్మెల్యే వారిస్ పఠాన్ 'గణపతి బొప్పా మోరియా' అన్నందుకు క్షమాపణ చెప్పారు.
మహారాష్ట్ర ముంబైకు చెందిన ఏఐఎంఐఎం వారిస్ పటాన్ నేత. ఆయన తాజాగా ముంబైలోని తన నియోజకవర్గంలో గణేష్ ఉత్సవాల్లో భాగంగా ఓ గణేష్ మండపానికి వెళ్లారు. ఈ సందర్భంగా ఆయన హిందువులకు శుభాకాంక్షలు తెలిపారు. అక్కడ అందరితో పాటు 'గణపతి బొప్పా మోరియా' అన్నారు. దీంతో అతనిపై మతోన్మాదులు కామెంట్లు చేశారు. పార్టీ అధినాయకత్వం కూడా దీనిపై సీరియస్ అయినట్లు.. అందువల్ల ఆయన క్షమాపణ చెప్పినట్లు నివేదికలు తెలిపాయి.
ఈ ఘటనపై స్పందించిన వారిస్ పఠాన్ క్షమాపణలు కోరుతూ ఓ వీడియోను విడుదల చేశారు. 'నేను నా తప్పును అంగీకరించాను. మరోసారి తప్పు చేయను. నేనూ మనిషినే. మనుషులు తప్పులు చేయడం సహజం. చేసిన తప్పుకు చింతిస్తున్నాను. అల్లాహ్ నన్ను క్షమిస్తాడని భావిస్తున్నా. మీరు కూడా క్షమించాలని కోరుతున్నా..' అని అన్నారు.
