టాలీవుడ్, బాలీవుడ్ చిత్రసీమలను ఏలిన అందాలరాశి శ్రీదేవి కుమార్తె జాహ్నవి కూడా ఇక వెండితెరపై తన లక్ పరీక్షించుకోనున్నారు. ఆమె తెరంగేట్రం గురించి గత కొన్ని రోజులుగా అనేక వార్తలు వెలువడ్డాయి. అయితే ఎటువంటి పబ్లిసిటీ లేకుండానే ఈ రోజు జాహ్నవి తొలి చిత్రం ఫస్ట్‌లుక్‌ను విడుదల చేశారు నిర్మాతలు. దాంతో అభిమానులు ఒక్కసారిగా షాక్ అయ్యారు. ఈ సినిమాకి ‘ధడక్‌’ అనే పేరు ఖరారు చేశారు. లో బడ్జెట్ చిత్రంగా విడుదలై, ఘన విజయం సాధించిన మరాఠీ చిత్రం ‘సైరాత్‌’కు ఇది హిందీ రీమేక్. ఈ ఫస్ట్‌లుక్‌ చూసిన చాలామంది జాహ్నవి అచ్చం తన తల్లి శ్రీదేవిలా ఉన్నారని కామెంట్స్ చేస్తున్నారు.
అందమైన కళ్లు, కళ ఉన్న ముఖంతో జాహ్నవి తన అమ్మకు తగ్గ కూతురిగానే కనిపించారని నెటిజన్లు పేర్కొంటున్నారు. ప్రస్తుతం ఈ సినిమా పోస్టర్లు సోషల్‌మీడియాలో అభిమానుల్ని ఆకట్టుకుంటున్నాయి. చాలా మంది జాహ్నవికి ఆల్ ది బెస్ట్ చెబుతూ కూడా కామెంట్స్ చేస్తున్నారు. ఈ చిత్రానికి శశాంక్‌ ఖైతాన్‌ దర్శకత్వం వహిస్తున్నారు. ధర్మా ప్రొడక్షన్స్‌, జీ స్టూడియో సంస్థలు సంయుక్తంగా ఈ చిత్రాన్ని నిర్మిస్తున్నాయి. ఇందులో జాహ్నవి సరసన హీరో షాహిద్‌ కపూర్‌ తమ్ముడు ఇషాన్‌ ఖత్తర్‌ నటిస్తున్నారు. వచ్చే ఏడాది జులై 6న ఈ చిత్రం ప్రేక్షకుల ముందుకు రాబోతోంది.
