సినీ విమర్శకుడు కత్తి మహేష్ ఎట్టకేలకు ఓ నిర్ణయానికి వచ్చారు. తాజాగా పవన్ కళ్యాణ్ ఫ్యాన్స్ పై తాను పెట్టిన కేసును ఆయన వెనక్కు తీసుకున్నారు. గురువారం కొందరు ఫ్యాన్స్ ఆయనపై కోడిగుడ్లతో దాడి చేసిన క్రమంలో ఆయన మాదాపూర్ పోలీసు స్టేషనులో కంప్లైంట్ ఇచ్చారు. ఆ తర్వాత సీసీటీవీ ఫుటేజీని చూసిన పోలీసులు.. కారకులను అదుపులోకి తీసుకున్నారు. ఆ తర్వాత చాలా నాటకీయ పరిణామాలు చోటు చేసుకున్నాయి.
కొందరు ఫ్యాన్స్ వచ్చి కత్తి మహేష్‌తో మాట్లాడిన తర్వాత ఆయన స్టేషనుకి వచ్చి ఫిర్యాదును వాపసు తీసుకుంటున్నానని తెలిపారు. ఆ దాడి చేసిన వ్యక్తుల్లో ఓ దళితుడు కూడా ఉన్నారని.. తన అభిమతం ఒక సంస్కరణను తీసుకురావాలనే తప్ప.. యువతపై కేసును నమోదు చేయడం కాదని..తాను మనిషిగా ఎదగాలని భావిస్తున్నాను కాబట్టి కేసు వెనక్కు తీసుకుంటున్నానని తెలిపారు. ఈ క్రమంలో కొందరు పవన్ కళ్యాణ్ ఫ్యాన్స్ వచ్చి కత్తి మహేష్‌తో సెల్ఫీ తీసుకున్నారు. ఆ తర్వాత ఆయనకు స్వీట్స్ తినిపించి.. శాలువా కప్పి సన్మానించారు.
"నా పైన దాడి చేసిన పరిపక్వత లేని, పేద, భ్రమిత పవన్ కళ్యాణ్ అభిమానులను శిక్షించడం నా ఉద్దేశం కాదు. ఆ ఇద్దరిలో ఒక దళితుడు ఉండటం కడు శోచనీయం. పవన్ కళ్యాణ్ & జనసేన ఇప్పుడిప్పుడే నేను ఆశించిన దిశగా అభిమానులకు, శ్రేణులకు మార్గదర్శకాలు ఇవ్వడం మొదలుపెట్టారు. ప్రవర్తనా నియమావళి అందించారు.స్పందిస్తున్నారు.
ఈ పరిస్థితుల్లో గైడెన్స్ లేని పిచ్చి అభిమానంతో నాపై దాడిచేసిన వారిని శిక్షించడానికి కాకుండా వారిని సంస్కరించడానికి నేను నైతికంగా బద్ఢుడను. అందుకే కేసును ఉపసంహరించుకుంటున్నాను. ఇక, నాపై దాడిని ఖండించడం, క్షమాపణలు చెప్పడం పవన్ కళ్యాణ్ విజ్ఞతకే వదిలేస్తున్నాను" అని ఈ సందర్భంగా కత్తిమహేష్ సోషల్ మీడియా ద్వారా తెలిపారు. ఈ ప్రకటన చేశాక.. మహేష్ ఇక తాను ఎవరినీ పర్సనల్‌గా విమర్శించనని.. కాకపోతే సినిమాలపై, రాజకీయ పరిస్థితులపై తన అభిప్రాయాలు మాత్రం కొనసాగుతాయని తెలిపారు.
నాకు మద్దతుగా నిలిచిన అందరికీ. సంఘీభావం తెలిపిన అందరికీ కృతజ్ఞతలు. మనం పోరాడగలం. పోరాడి హక్కుల్ని సాధించగలం అది పోరాటానికి విజయం. దానితోపాటు,దాడి చేసినవాళ్ళని కూడా క్షమించగలం అనేది ఒక నైతిక విజయం. కొందరు వ్యక్తులు,ప్రజాసంఘాలు లేకపోతే ఇది సాధ్యం అయ్యేది కాదు.Thank you one and all.
— Kathi Mahesh (@kathimahesh) January 21, 2018
