தயாரிப்பாளர் சங்க தலைவர் பதவிக்கு நடிகை குஷ்பு போட்டியிடுகிறார்.
தற்போது தமிழ் திரைப்பட தயாரிப்பாளர்கள் சங்க தலைவராக எஸ்.தாணு, செயலாளர்களாக டி.சிவா, ராதாகிருஷ்ணன் மற்றும் துணைத் தலைவர்களாக கதிரேசன், தேனப்பன், பொருளாளராக டி.ஜி. தியாகராஜன் ஆகியோர் உள்ளனர்.
இவர்களின் பதவி காலம் முடிவடைவதை தொடர்ந்து புதிய நிர்வாகிகளை தேர்வு செய்வதற்காக அடுத்த மாதம் பிப்ரவரி 5-ம் தேதி தேர்தல் நடக்கிறது. வேட்புமனு தாக்கல் வருகிற 8-ம் தேதி முதல் 12-ம் தேதி வரை நடக்கிறது. அடுத்த நாள் 13-ம் தேதி மனுக்களை வாபஸ் பெற்றுக் கொள்ளலாம். 18-ம் தேதி இறுதிப் பட்டியல் வெளியாகிறது என அறிவிக்கப்பட்டுள்ளது.
இந்நிலையில் விஷால் அணி சார்பில் தயாரிப்பாளர் சங்க தலைவர் பதவிக்கு நடிகை குஷ்பு போட்டியிடுகிறார். இதற்கான அறிவிப்பு நேற்று வெளியிடப்பட்டது.
இது தொடர்பாக குஷ்பு தனது டுவிட்டர் பக்கத்தில் கூறியிருப்பதாவது:-
தயாரிப்பாளர் சங்க தேர்தலில் தலைவர் பதவிக்கு போட்டியிட எனக்கு வாய்ப்பு அளித்த விஷாலுக்கு நன்றி. என் மீது நம்பிக்கை வைத்து விஷால் கொடுத்த பொறுப்பை காப்பாற்றுவேன். அணியில் உள்ள அனைவரும் ஒற்றுமையாக செயல்பட்டு வெற்றிக்கு உதவ வேண்டும். தேர்தலில் எதிர்கொள்ளும் சோதனைகளை எதிர்த்து போராடி வெற்றி பெற பாடுபடுவேன் என அவர் கூறியுள்ளார்.
I thank @VishalKOfficial n team 4 trusting me wid such huge responsibility.I wl be contesting 4 the Presidential post of #Producerscouncil.
— khushbusundar (@khushsundar) January 1, 2017
