అఫ్గనిస్థాన్ రాజధాని నగరం కాబూల్‌లో రెండు బాంబు పేలుళ్లు సంభవించాయి. కాబూల్‌లో జరిగిన రెండు ఆత్మాహుతి దాడుల్లో 20మందికి పైగా మంది మృతి చెందారు. వీరిలో నలుగురు జర్నలిస్టులు ఉన్నారు. ఏజెన్స్‌ ఫ్రాన్స్‌-ప్రెస్‌కు చెందిన చీఫ్‌ ఫొటోగ్రాఫర్‌ షా మారై, మరొక ముగ్గురు జర్నలిస్టులు మృతి చెందిన వారిలో ఉన్నారు. ఇది ఐఎస్ఐఎస్ తాలిబాన్ ఉగ్రవాదుల పనే అని పోలీసులు భావిస్తున్నారు.
ఈ దాడిలో మరొక 30 మంది గాయపడ్డారని ప్రభుత్వ అధికార ప్రతినిధి వాహిద్‌ మజ్రోహ్‌ చెప్పారు. గాయపడ్డ వారిని హుటాహుటిన ఆసుపత్రికి తరలించామని.. వారిలో కొందరి పరిస్థితి విషమంగా ఉందని మజ్రోహ్‌ అన్నారు. షష్దారక్ ప్రాంతంలో ఈ పేలుళ్లు చోటుచేసుకున్నాయని అన్నారు. మొదటిసారి ఆత్మాహుతి దాడి తరువాత స్థానికులు, పోలీసులు సహాయక చర్యలు చేపట్టిన సమయంలో రెండవ ఆత్మాహుతి దాడి జరిగింది.
