Lightning Kills Three Youth: దసరా వేడుకల్లో విషాదం చోటుచేసుకుంది. ఒకే గ్రామంలో మూడు కుటుంబాల్లో మృత్యువు విషాదం నింపింది. దసరా పండగకు సొంతూరికి వచ్చిన యువకులు పండగ సందర్భంగా గ్రామ శివారులో పార్టీ చేసుకుంటుండగా పిడుగుపాటుకు గురై ముగ్గురు యువకులు మృతి చెందిన ఘటన వరంగల్ జిల్లా వర్ధన్నపేట మండలం బండౌతపురం గ్రామంలో చోటుచేసుకుంది. వివరాల్లోకి వెళ్తే.. బండౌతపురం గ్రామానికి చెందిన పలువురు యువకులు దసరా పండగ సందర్భంగా మద్యం సేవించి పార్టీ చేసుకోవాలనుకున్నారు. బుధవారం సాయంత్రం గ్రామ శివారులో ఓ ఖాళీ స్థలంలో కూర్చుని మద్యం సేవిస్తూ పార్టీ చేసుకుంటున్న సమయంలోనే భారీ ఉరుములు, మెరుపులతో జోరుగా వర్షం మొదలైంది. అదే సమయంలో పిడుగు పడటంతో ముగ్గురు యువకులు మృతి చెందగా మరో ఇద్దరు తీవ్రంగా గాయపడ్డారు.
గ్రామంలో పిడుగుపాటుకు గురై ముగ్గురు యువకులు మృతి చెందారన్న దుర్వార్తతో ఆ గ్రామంలో విషాదం నెలకొంది. దసరా పండగ రోజే ముగ్గురు యువకులు ప్రాణాలు కోల్పోవడంతో చేతికి అందొచ్చిన కొడుకులను పోగొట్టుకున్న ఆ కుటుంబసభ్యుల రోదనలు మిన్నంటాయి. గాయపడిన ఇద్దరు యువకులు పిడుగుపాటు కారణంగా అపస్మారక స్థితిలోకి వెళ్లారు. వారిని వర్థన్నపేట ప్రభుత్వ ఆస్పత్రికి తరలించి చికిత్స అందిస్తున్నారు.
