Jubilee Hills Gang Rape: హైదరాబాద్ జూబ్లీహిల్స్‌లో మైనర్ బాలికపై గ్యాంగ్ రేప్ ఘటన సంచలనం రేకెత్తిస్తోంది. ఈ ఘటనలో ప్రముఖ రాజకీయ నేతల పిల్లలు ఉన్నట్లు ప్రచారం జరుగుతుండటంతో ఈ కేసు సంచలనాత్మకంగా మారింది. జూబ్లీహిల్స్‌లోని ఓ పబ్‌లో పార్టీకి హాజరైన ఆ బాలికను కొంతమంది టీనేజర్లు బలవంతంగా కారులో తీసుకెళ్లి గ్యాంగ్ రేప్‌కు పాల్పడ్డారు. మే 28న ఈ ఘటన జరగ్గా.. దీనిపై బాలిక తండ్రి మే 31న పోలీసులకు ఫిర్యాదు చేశారు. ఆ తర్వాత రెండు రోజులకు కానీ ఈ ఘటన బయటకు వెల్లడికాలేదు. ఇందులో హోంమంత్రి మనవడు, ఎమ్మెల్యే కుమారుడు ఉన్నట్లు జరుగుతున్న ప్రచారాన్ని పోలీసులు ఖండించారు. ఈ ఘటనలో నిందితులు ఏ స్థాయి వ్యక్తులైనా వదిలిపెట్టే ప్రసక్తి లేదని చెబుతున్నారు.

మరోవైపు, విపక్ష పార్టీలు ఈ ఘటన విషయంలో టీఆర్ఎస్ ప్రభుత్వాన్ని టార్గెట్ చేస్తున్నాయి. అత్యాచార ఘటనలో టీఆర్ఎస్ నేతల పిల్లల ప్రమేయం ఉందని ఆరోపిస్తున్నాయి. ఘటనపై సీబీఐ విచారణ జరిపించాల్సిందిగా కోరుతూ బీజేపీ రాష్ట్ర అధ్యక్షుడు బండి సంజయ్ ముఖ్యమంత్రి కేసీఆర్‌కు లేఖ రాశారు. ఇది ముమ్మాటికీ టీఆర్ఎస్ ప్రభుత్వం, పోలీసుల వైఫల్యమేనని కాంగ్రెస్ ఆరోపిస్తోంది. టీఆర్ఎస్ పాలనలో ఆరేళ్ల పాపకు, అరవై ఏళ్ల బామ్మకు రక్షణ కరువైందని వైఎస్సార్‌టీపీ అధ్యక్షురాలు షర్మిల విమర్శించారు. సంచలనంగా మారిన ఈ కేసు ఎప్పుడు ఏ మలుపు తీసుకుంటుందోనన్న ఉత్కంఠ నెలకొంది. ఈ నేపథ్యంలో కేసుకు సంబంధించి ఎప్పటికప్పుడు లైవ్ అప్‌డేట్స్ ఇక్కడ తెలుసుకోండి...