దేశంలోని ప్రతి ఒక్కరి అకౌంట్‌లో 15 లక్షల రూపాయిలు జమ చేస్తామని గత 2014 సార్వత్రిక ఎన్నికలకు ముందు నరేంద్ర మోదీ ఇచ్చిన హామీ సమాచార హక్కు చట్టం (ఆర్టీఐ) పరిధిలోకి రాదని ప్రధాని కార్యాలయం (పిఎంఒ) తేల్చి చెప్పింది. కనుక ఈ ప్రశ్నకు సమాధానం చెప్పాల్సిన పరిస్థితి ఉత్పన్నం కాదని కేంద్ర సమాచార కమిషన్‌కు పిఎంఒ పేర్కొంది. మోహన్‌ కుమార్‌ శర్మ అనే ఆర్టీఐ కార్యకర్త 2016 నవంబర్‌లో ఈ అంశంపై ఆర్టీఐలో పిటిషన్‌ దాఖలు చేశారు.
ఆర్టీఐ కార్యకర్త పీఎంవో కార్యాలయానికి.. ఆర్బీఐకు ఆర్టీఐ కింద లేఖలు రాశారు. ‘రూ.15 లక్షలు జమ చేయిస్తానని మోదీ చెప్పారు. అది ఎంత వరకు వచ్చింది?' అని ఆయన లేఖలో వివరణ కోరారు. అయితే ఆ వివరణకు ఇప్పుడు మోక్షం లభించింది. దానిపై పీఎంవో కార్యాలయం స్పందిస్తూ..ఆర్టీఐ చట్టం సెక్షన్‌-2(ఎఫ్‌) ప్రకారం ఇది సమాచారం కిందే రాదంటూ సమాచార కమిషనర్‌కు బదులిచ్చారు. ఇక నోట్ల రద్దు నిర్ణయం కొన్ని ప్రింట్‌ మీడియాలకు ముందే ఎలా తెలిసిందంటూ మరో లేఖకు కూడా సమాచారం కింద రాదంటూ పీఎంవో ఆఫీస్‌ పేర్కొంది.
సమాచార హక్కు చట్టం-2015 లోని సెక్షన్‌-2(ఎఫ్‌) ప్రకారం.. రికార్డులు, పత్రాలు, మెమోలు, ఈ మెయిళ్లు, అభిప్రాయాలు, సలహాలు, పత్రికా ప్రకటనలు, సర్క్యులర్లు, ఉత్తర ప్రత్యుత్తరాలు, లాగ్ పుస్తకాలు, ఒప్పందాలు, నివేదికలు, నమూనాలు, తనిఖీ రికార్డులు సమాచారం కిందకు వర్తిస్థాయి. ఈ సమాచారం ఎలక్ట్రానిక్ రూపంలోనైనా ఉండొచ్చు.
2014 సార్వత్రిక ఎన్నికల ప్రచారం సందర్భంగా, దేశంలో, విదేశాల్లో నల్లధనాన్ని వెలికితీసి ప్రతి భారతీయుడి ఖాతాలో రూ. 15 లక్షలు జమచేస్తామని మోదీ అన్నారు.
