హైదరాబాద్: కేసీఆర్ ఫ్యామిలీయే లక్ష్యంగా చేసుకొని టి. కాంగ్రెస్ నేత రేవంత్ నిప్పులు చెరిగారు. రోడ్ షోలో భాగంగా కామారెడ్డి జిల్లా నిజాంసాగర్ జంక్షన్ లో రేవంత్ ప్రసంగిస్తూ తెలంగాణ వస్తే ఉద్యోగాలు వస్తాయని కేసీఆర్ చెప్పింది..ఆయన కుటుంబానికి ఉద్దేశించి అని.. ఆ కుటుంబంలో అందరూ కలిపి నెలకు రూ. 30 లక్షల జీతాన్ని తీసుకుంటున్నారని ఎద్దేవ చేశారు. ప్రజలకు ఎలాంటి ప్రయోజనం కలగలేదన్నారు. సీఎం కేసీఆర్ తో పాటు కేటీఆర్, హరీశ్ రావు, కవితలు తెలంగాణకు పట్టిన నాలుగు కొరివి దెయ్యాలని అంటూ రేవంత్ కేసీఆర్ ఫ్యామిలీపై ఘాటైన విమర్శలు చేశారు.
ఏ ఒక్క హామీ నిలబెట్టుకోలేదు..
కేసీఆర్ కు హామీలు ఇవ్వడం మాత్రమే తెలుసు ..అమలు చేయచేయడం చేతకాదని రేవంత్ రెడ్డి విమర్శించారు...దళితులకు మూడెకరాల భూమి, పేదల కోసం లక్ష డబుల్ బెడ్ రూమ్ ఇళ్లు, మైనారిటీలకు 12 శాతం రిజర్వేషన్లు ...అలాగే ప్రతి మండలంలో 30 పడకల ఆసుపత్రి ఎక్కడని ప్రశ్నించారు. ఇలా చూసుకుంటూ పోతే ఎన్నికల సమయంలో ఇచ్చిన ఏ ఒక్క హామీని కేసీఆర్ పూర్తిగా అమలు చేయలేకపోయారని..ఇలాంటి వాళ్లను ఇంటికి సాగనంపితే వచ్చే రాష్ట్రానికి వచ్చిన నష్టం ఏమీలేదన్నారు. టీఆర్ఎస్ పాలనపై విసుగుతో ఉన్న తెలంగాణ ప్రజలు.. ఎన్నికల్లో కేసీఆర్ కు బుద్ధి చెబుతారని రేవంత్ రెడ్డి వ్యాఖ్యానించారు. తన నివాసంపై ఐటీ దాడులు నిరవ్వహించిన నేపథ్యంలో కేసీఆర్ ప్రభుత్వంపై విమర్శల జోరును రేవంత్ రెడ్డి మరింత పెంచారనే అభిప్రాయాలు వ్యక్తమౌతున్నాయి.
