నాగచైతన్య ప్రధాన పాత్రలో తెరకెక్కిన శైలజా రెడ్డి అల్లుడు సినిమా టీజర్ విడుదలకు ముహూర్తం ఖరారైంది. మారుతి డైరెక్ట్ చేస్తోన్న ఈ రొమాంటిక్ ఫ్యామిలీ ఎంటర్‌టైనర్ సినిమా చిత్రీకరణ పూర్తి చేసుకుని ప్రస్తుతం పోస్ట్ ప్రొడక్షన్ దశలో ఉంది. ఆగస్టు 31న సినిమా రిలీజ్ కానున్న నేపథ్యంలో ఆగస్టు 1వ తేదీ నుంచే ప్రమోషన్స్ కార్యక్రమాలు మొదలుపెడుతున్నారు శైలజారెడ్డి అల్లుడు యూనిట్ సభ్యులు. అందులో భాగంగానే ఆగస్టు 1న.. అంటే రేపు రాత్రి 7:10 గంటలకు శైలజా రెడ్డి అల్లుడు టీజర్ విడుదల చేసేందుకు రంగం సిద్ధమైంది.
ఈ సినిమాలో ప్రముఖ నటి రమ్యకృష్ణ హీరో చైతూకి అత్త పాత్రలో కనిపించనుండగా అను ఎమ్మాన్యుయెల్ చైతూ సరసన జంటగా నటించింది. మొదటిసారి మారుతి-చైతూ కాంబోలో తెరకెక్కుతున్న ఈ చిత్రాన్ని సూర్యదేవర నాగవంశీ నిర్మిస్తున్నారు.
