ఆంధ్రప్రదేశ్‌ ముఖ్యమంత్రి నారా చంద్రబాబు నాయుడును శుక్రవారం సచివాలయంలో మలయాళ సినీ నటుడు మరియు రాజ్యసభ ఎంపీ సురేష్‌గోపి కలిశారు. కేరళలో జరగబోయే జాతీయ అరటిపళ్ళ ఉత్సవానికి ఆయనను ఆహ్వానించారు. ఈ సందర్భంగా సురేష్‌గోపి విలేకరులతో ముచ్చటించారు. వచ్చే సంవత్సరం ఫిబ్రవరి 17 నుంచి 21 వరకు నేషనల్ బనానా ఫెస్టివల్‌ కేరళ రాజధాని తిరువసంతపురంలో జరుగుతున్న క్రమంలో ఏపీ సీఎంను ఒక ఎంపీ హోదాలో కలిసి ప్రత్యేకంగా ఆహ్వానిస్తున్నట్లు ఆయన తెలిపారు.
ఈ జాతీయ స్థాయి ఉత్సవంలో ఎందరో వ్యవసాయ విద్యార్థులు, రైతులు, పరిశోధకులు పాల్గొంటారని ఆయన ఈ సందర్భంగా చెప్పారు. తెలంగాణ ముఖ్యమంత్రి కె.చంద్రశేఖరరావును కూడా ఈ ఉత్సవానికి ఆహ్వానిస్తున్నట్లు సురేష్ గోపీ తెలిపారు. ఈ ఉత్సవంలో భాగంగా ప్రదర్శనలో దాదాపు నాలుగు వందలకు పైగా అరటి పళ్ళ రకాలను, అరటి ఉత్పత్తులను ప్రదర్శించనున్నట్లు తెలిపారు. ఆంధ్రుల కొత్త రాజధాని అమరావతికి రావడం తనకు ఎంతగానో సంతోషంగా ఉందని ఈ సందర్భంగా సురేష్ గోపీ తెలిపారు.
