ఆంధ్రప్రదేశ్‌లో మళ్లీ ఆంత్రాక్స్ నీడ కమ్ముకుంది. విశాఖ జిల్లా చింతపల్లి మండలం పెదపాకల ప్రాంతంలో కొందరు గిరిజనులు గత కొద్ది రోజులుగా చర్మ సంబంధిత, శ్వాసకోశ వ్యాధులతో బాధపడుతుండగా వారిని స్థానిక మండల ఆసుపత్రికి తీసుకొచ్చారు. ఈ క్రమంలో వైద్య శాఖాధికారికి అనుమానం వచ్చి.... విశాఖ కేజీహెచ్ ఆసుపత్రికి వారిని రిఫర్ చేశారు.
కేజీహెచ్ ఆసుపత్రిలో ఆ రోగులను పరిశీలించిన డాక్టర్లు వారికి ఆంత్రాక్స్ రోగం ఉన్నట్లు నిర్థారించారు. గిరిజనులు చనిపోయిన గోమాంసాన్ని భక్షించడంతో ఆ వ్యాధి సోకిందని తమ ఎంక్వయరీలో తేలిందని వైద్యశాఖాధికారులు తెలిపారు. ఈ క్రమంలో ముఖ్యంగా ఉత్తరాంధ్ర ప్రాంతంలోని గిరిజన ఏజెన్సీల్లో ప్రతీ రోజు ఆరోగ్య అవగాహన శిబిరాలను నిర్వహించాలని యోచిస్తున్నట్లు, అదనపు వైద్యపరీక్షలు నిర్వహించనున్నట్లు వైద్య సిబ్బంది తెలిపారు.
