தென்னிந்திய நடிகர் சங்க தேர்தலில் போட்டியிடும் இயக்குநர் பாக்யராஜ் தலைமையிலான அணிக்கு சுவாமி சங்கரதாஸ் அணி என பெயரிடப்பட்டுள்ளது!
மூன்று ஆண்டுகளுக்கு ஒரு முறை தென்னிந்திய நடிகர் சங்கத்திற்கு தேர்தல் நடத்தப்படுகிறது. அதன்படி வருகிற 23-ஆம் தேதி சென்னை எம்ஜிஆர் ஜானகி கலை மற்றும் அறிவியல் கல்லுரியில் தேர்தல் நடைபெற உள்ளது. தேர்தல் அதிகாரியாக ஓய்வு பெற்ற நீதிபதி பத்மநாபன் தேர்வு செய்யப்பட்டுள்ளார்.
இந்த தேர்தலுக்கான வேட்பு மனுதாக்கல் நேற்று தொடங்கி வரும் 10-ஆம் தேதி வரை நடைபெறுகிறது. தாக்கல் செய்யப்பட்ட மனுக்களை 14-ஆம் தேதி வரை வாபஸ் பெற்றுக்கொள்ளலாம் எனவும், இறுதி வேட்பாளர் பட்டியல் அன்று மாலை வெளியாகும் எனவும் அறிவிக்கப்பட்டுள்ளது
இந்நிலையில் இம்முறை தென்னிந்திய நடிகர் சங்க தேர்தலில் போட்டியிடும் விஷால் அணியினருக்கு எதிராக இயக்குநர் பாக்யராஜ் தலைமையிலான அணி களமிறங்கியுள்ளது. விஷால் அணியில் தலைவர் பதவிக்கு போட்டியிடும் நடிகர் நாசர் இன்று (ஜூன் 09) வேட்புமனு தாக்கல் செய்தார். அவரைத் தொடர்ந்து இன்று பாக்யராஜ் அணியினர் வேட்புமனு தாக்கல் செய்தனர்.
சுவாமி சங்கரதாஸ் அணி சார்பில் தலைவர் பதவிக்கு பாக்யராஜூம், துணைத் தலைவர் பதவிக்கு குட்டி பத்மினியும், பொதுச் செயலாளர் பதவிக்கு ஐசரி கணேசும், பொருளார் பதவிக்கு நடிகர் பிரசாந்த்தும் போட்டியிட உள்ளதாக அறிவிக்கப்பட்டுள்ளது.
வேட்புமனு தாக்கலுக்கு பிறகு பாக்யராஜ் அணியினர் கூட்டாக செய்தியாளர்களை சந்தித்தனர். அப்போது பேசிய அவர்கள், நடிகர் சங்க தேர்தலில், பிரதமர் மோடி சொன்னது போல் சவுகிதாராக களமிறங்குகிறோம். தலைவர் பதவிக்கு நான் போட்டியிட்டால் நன்றாக இருக்கும் என ரஜினி கூறினார். பாண்டவர் அணியில் விரிசல் ஏற்பட்டதாலேயே எதிரணியில் போட்டியிடுகிறேன். ரஜினி, கமல் ஆகியோரிடம் கேட்ட பிறகே நடிகர் சங்க தேர்தலில் போட்டியிடுகிறேன். தேர்தல் முடிந்து, நாங்கள் பொறுப்பேற்றதும் அடுத்த 6 - 7 மாதங்களில் நடிகர் சங்க கட்டிடம் கட்டி முடிக்கப்படும்.
நடிகர் சங்க தேர்தலில் எந்த அரசியல் தலையீடும் இல்லை. கடந்த ஒன்றரை ஆண்டாக நடிகர் சங்க கட்டடம் கட்டும் பணிகள் பாதிப்பு என்பதால் சுவாமி சங்கரதாஸ் அணி உருவாகியுள்ளது. இளம் நடிகர்கள் சிலரும் எங்கள் அணிக்கு ஆதரவு தெரிவித்துள்ளனர் என தெரிவித்தனர்.
