Kareen Kapoor: సైఫ్ అలీ ఖాన్ పై దాడి జరిగినప్పుడు కరీనా తన స్నేహితులతో కలిసి ఫన్ నైట్‌లో ఉన్నారు. ఈ ఘటన తరువాత సెలబ్రిటీల భద్రతపై పెద్ద ఎత్తున చర్చలు జరుగుతున్నాయి. ఈ విషయం గురించి పూర్తి వివరాల్లోకి వెళితే..
ముంబై నగరంలో జనవరి 16, 2025 ఉదయం, బాలీవుడ్ ప్రముఖ నటుడు సైఫ్ అలీ ఖాన్ దారుణ దాడికి గురైన సంగతి తెలిసిందే. తన ఇంట్లో దొంగతనానికి ప్రయత్నించే దుండగుడిని అడ్డుకునే క్రమంలో సైఫ్ తీవ్ర గాయాలపాలయ్యారు. ఈ దాడి బాలీవుడ్ పరిశ్రమను, అభిమానులను దిగ్భ్రాంతికి గురి చేసింది.
ఈ ఘటన అతని నివాసంలో జరిగినది. సైఫ్ తన పిల్లలు తైమూర్, జెహ్‌లతో ఇంట్లో ఉన్న సమయంలో, ఉదయం 2:30 గంటల సమయంలో, దొంగతనానికి వచ్చిన దుండగుడిని అడ్డుకునే ప్రయత్నం చేశారు. దుండగుడు ఆయన్ని పలుమార్లు కత్తితో గాయపరిచాడు. వెంటనే సైఫ్‌ను లీలావతి ఆసుపత్రికి తరలించారు. వైద్యులు ఆయన ఆరోగ్యం ప్రస్తుతం స్థిరంగా ఉందని తెలిపారు.
సైఫ్ అలీ ఖాన్ పై దాడి జరిగినప్పుడు, కరీనా కపూర్ తన స్నేహితులతో కలిసి ఫన్ నైట్‌లో పాల్గొంటున్నట్లు తెలుస్తోంది. కరీనా తన అక్క కరిష్మా కపూర్‌తో కలిసి ఉన్నప్పుడు, ఈ విషయం తెలిసి వెంటనే అక్కడి నుంచి ఇంటికి బయలుదేరారు. ప్రస్తుతం ఈ విషయం సోషల్ మీడియాలో తెగ వైరల్ అవుతోంది. భర్త పై దాడి జరిగినప్పుడు కరీనా ఎక్కడ ఉంది అంటూ.. ఉదయం నుంచి ఎంతోమంది ప్రశ్నించసాగారు. ఇక ఈ విషయం తెలిసాక వారి ప్రశ్నలకు సమాధానం దొరికింది.
కాగా ఈ దాడి బాలీవుడ్ ప్రముఖుల భద్రతపై పెద్ద ఎత్తున చర్చలను ప్రేరేపించింది. ప్రముఖుల నివాసాల్లో ప్రత్యేక భద్రతా ఏర్పాట్లు ఉన్నప్పటికీ, ఇటువంటి ఘటనలు జరిగిపోవడం ఆందోళన కలిగిస్తోంది.
ముంబై పోలీసులు ఈ ఘటనపై దర్యాప్తు చేపట్టారు. ఈ దొంగతనానికి ముందే ప్రణాళిక ఉన్నదా లేదా అనే దానిపై వారు పరిశీలిస్తున్నారు. సైఫ్ ఆరోగ్యం గురించి తెలిసిన అభిమానులు ఆయన త్వరగా కోలుకోవాలని ప్రార్థిస్తున్నారు. ఈ ఘటనపై సెలబ్రిటీలు, ప్రేక్షకులు స్పందిస్తూ భద్రతా ప్రమాణాలను పునరాలోచించాలని కోరుతున్నారు.
