గుంటూరు: 50 మంది విద్యార్థిని, విద్యార్థులను పాఠశాలకు తీసుకుని వెళ్తున్న ఓ స్కూల్ బస్సు మార్గం మధ్యలో అదుపుతప్పి కల్వర్ట్‌లోకి దూసుకుపోయిన ఘటన గుంటూరు జిల్లా వెల్దుర్తి మండలం మండాది వాగు వద్ద సోమవారం ఉదయం చోటుచేసుకుంది. ఈ ఘటనలో మొత్తం 20 మంది వరకు గాయపడగా వారిలో ముగ్గురికి తీవ్ర గాయాలు అయినట్టు తెలుస్తోంది. మాచర్లలోని ఓ ప్రైవేటు పాఠశాల బస్సు ఉప్పలపాడు గ్రామం నుంచి మాచర్ల వైపు వెళ్తుండగా ఈ ప్రమాదం జరిగింది. ఎదురుగా వచ్చిన మరో వాహనాన్ని తప్పించబోయే క్రమంలో బస్సు డ్రైవర్ కాస్త పక్కకు తిప్పగా బస్సు ఆ పక్కనే వున్న వాగులో పడిపోయింది.
స్వల్పగాయాలతో బయటపడిన వారిని మాచర్ల ఆస్పత్రిలో చికిత్స అందిస్తుండగా తీవ్రంగా గాయపడిన వారిని గుంటూరు జిల్లా కేంద్రంలోని ప్రభుత్వాస్పత్రికి తరలించారు. ఘటనపై కేసు నమోదు చేసుకున్న పోలీసులు స్కూల్ బస్ డ్రైవర్‌ని అదుపులోకి తీసుకుని ప్రశ్నిస్తున్నారు.
