ఆంధ్రప్రదేశ్ ప్రభుత్వం ఆధ్వర్యంలో ప్రారంభమైన ఎన్టీఆర్ విద్యోన్నతి పథకంలో భాగంగా బీసీ,ఈబీసీ, కాపు కులాల విద్యార్థులకు సివిల్స్ పరీక్ష ప్రిపరేషనుకు గాను ఉచిత శిక్షణ ఇవ్వనున్నట్లు బీసీ సంక్షేమ శాఖ తెలిపింది. అందుకు గాను నిర్వహించే ప్రవేశపరీక్షకు ఈ నెల 24వ తేది నుండి దరఖాస్తులను ఆహ్వానిస్తున్నారు. జూన్ 25, 26 తేదిల్లో అన్ని జిల్లా కేంద్రాల్లోనూ ఈ ప్రవేశ పరీక్ష జరగనుంది.
సివిల్స్ ప్రిలిమ్స్‌కు సంబంధించిన సిలబస్‌నే ఈ ఎంట్రన్స్ టెస్టుకు సిలబస్‌గా శాఖ నిర్ణయించింది. 32 ఏళ్ల వయసు కంటే తక్కువ ఉన్న అభ్యర్థులే ఈ ఎంట్రన్స్ టెస్టు రాయడానికి అర్హులు. అలాగే కుటుంబ వార్షిక ఆదాయం రూ.6 లక్షలకు మించరాదు.
ప్రవేశ పరీక్షకు ఎలాంటి ఫీజు చెల్లించనవసరం లేదు. ఆసక్తి గల అభ్యర్థులు www.jnanabhumi.ap.gov.in వెబ్‌సైటు ద్వారా దరఖాస్తు చేసుకోవచ్చు. 2015-16, 2016-17 సంవత్సరాల్లో ఉచితంగా శిక్షణ పొందినవారు మరల దరఖాస్తు చేసుకోవడానికి అనర్హులు.
