తెలుగు సినిమాల్లో తిట్లను టైటిల్స్‌గా పెట్టి చిత్రాలు తీయడం కొత్తేమీ కాదు. దొంగ రాస్కెల్, ఇడియట్, స్టుపిడ్, పోరంబోకు, సోంబేరీ, జఫ్ఫా లాంటి సినిమాలు గతంలో వచ్చాయి. ఇప్పుడు అదే కోవలోకి మరో చిత్రం కూడా వస్తోంది.
ఆ చిత్రం పేరే "బేవార్స్". రాజేంద్రప్రసాద్ ముఖ్యపాత్రలో సంజోష్, హర్షిత హీరోహీరోయిన్లుగా నటిస్తున్న ఈ చిత్రానికి చెప్పాల రమేష్ దర్శకుడు. గతంలో ఈయన రాజేంద్రప్రసాద్ నటించిన మీ శ్రేయోభిలాషి అనే చిత్రానికి కథా సహకారం అందించారు.
ఎస్‌ క్రియేషన్స్‌ పతాకంపై పొన్నాల చందు, ఎమ్‌. అరవింద్‌ నిర్మిస్తున్న " బేవార్స్" చిత్రం ఇటీవలే సారధి స్టూడియోస్‌లో షూటింగ్ పూర్తి చేసుకుంది. ప్రస్తుతం పోస్టు ప్రొడక్షన్ పనులు జరుగుతున్నాయి.
సునీల్ కశ్యప్ సంగీతం అందించిన ఈ చిత్రంలో పాటలను సుద్దాల అశోకతేజ, భాస్కరభట్ల రాశారు. అభి, మధునందన్, అమృతం వాసు, విజయభాస్కర్, వెంకీ, షేకింగ్ షేషు ఇతర ముఖ్యపాత్రలు పోషిస్తున్నారు.
