തിരുവനന്തപുരം: പി സി ജോര്‍ജ് ബിജെപിയിലേയ്ക്ക്. ജനപക്ഷം സെക്യുലര്‍ ബിജെപിയില്‍ ലയിക്കുമെന്നാണ് റിപ്പോര്‍ട്ട്. ഇതുമായി ബന്ധപ്പെട്ട അവസാനവട്ട ചര്‍ച്ചകള്‍ക്കായി പി സി ജോര്‍ജ് ഡല്‍ഹിയ്ക്ക് തിരിച്ചു.
ഇന്ന് ഉച്ച കഴിഞ്ഞാണ് ബിജെപിയുടെ കേന്ദ്ര നേതൃത്വവുമായി ചര്‍ച്ച നടക്കുക. പി സി ജോര്‍ജ് സംഘടനയില്‍ അംഗത്വം എടുക്കമെന്നാണ് ബിജെപിയുടെ നിലപാട്. എന്നാല്‍, മുന്നണി എന്ന നിലയില്‍ സഹകരിക്കണോ ജനപക്ഷം പിരിച്ചുവിട്ട് ബിജെപിയില്‍ ചേരണോ എന്ന കാര്യങ്ങളില്‍ അന്തിമ തീരുമാനം ആയിട്ടില്ലെന്ന് പി സി ജോര്‍ജ് പറഞ്ഞു. ബിജെപിയില്‍ ചേരണമെന്നാണ് പാര്‍ട്ടി അണികളുടെ പൊതുവികാരമെന്നും അണികളുമായി ഇക്കാര്യം സംസാരിച്ചെന്നും അദ്ദേഹം കൂട്ടിച്ചേര്‍ത്തു. ലോക്‌സഭ തിരഞ്ഞെടുപ്പിന് മുമ്പ് ലയനം ഉണ്ടാകുമെന്നാണ് സൂചന.
ALSO READ: കെ റെയില്‍ പോലെയല്ല; യൂണിഫോം സിവില്‍ കോഡ് വന്നിരിക്കുമെന്ന് സുരേഷ് ഗോപി
കൂടുവിട്ട് കൂട് മാറിയ പി സി ജോര്‍ജ് കഴിഞ്ഞ കുറേ കാലങ്ങളായി എന്‍ഡിഎ അനുകൂല നിലപാടുകളാണ് സ്വീകരിച്ചിരുന്നത്. ഘടക കക്ഷിയാകുന്നതിന് പകരം ബിജെപി അംഗത്വം സ്വീകരിച്ച് പാര്‍ട്ടിയുടെ ഭാഗമാകാനുള്ള തീരുമാനം ഔദ്യോഗികമായി എടുത്തു കഴിഞ്ഞെന്നാണ് പുറത്തുവരുന്ന റിപ്പോര്‍ട്ടുകള്‍ വ്യക്തമാക്കുന്നത്. ബിജെപിയില്‍ ചേരുകയെന്ന തീരുമാനം ശരിയോ എന്ന് പരിശോധിക്കാനായി അഞ്ചംഗ കമ്മിറ്റിയെ നിയോഗിച്ചിരുന്നു. കമ്മിറ്റിയുടെ റിപ്പോര്‍ട്ടിന്റെ അടിസ്ഥാനത്തിലാണ് ബിജെപി കേന്ദ്ര നേതൃത്വവുമായി പി സി ജോര്‍ജ് ബന്ധപ്പെട്ടത് എന്നും റിപ്പോര്‍ട്ടുകളുണ്ട്.
പി സി ജോര്‍ജ് 4 തവണ പൂഞ്ഞാറില്‍ നിന്ന് നിയമസഭയില്‍ എത്തിയിട്ടുണ്ട്. 1980, 1982, 1996, 2016 എന്നീ വര്‍ഷങ്ങളില്‍ പി സി ജോര്‍ജ് പൂഞ്ഞാറില്‍ നിന്നുള്ള നിയമസഭാംഗമായി. കേരള കോണ്‍ഗ്രസ് (ജെ), കേരള കോണ്‍ഗ്രസ് (എം) എന്നീ പാര്‍ട്ടികളില്‍ അദ്ദേഹം പ്രവര്‍ത്തിച്ചു. പിന്നീട് കേരള കോണ്‍ഗ്രസ് സെക്യുലര്‍ എന്ന പാര്‍ട്ടി രൂപീകരിച്ചു. വൈകാതെ തന്നെ കേരള കോണ്‍ഗ്രസ് സെക്യുലര്‍ പാര്‍ട്ടി കേരള കോണ്‍ഗ്രസ് എമ്മില്‍ ലയിച്ചു.
2017ലാണ് പി സി ജോര്‍ജ് ജനപക്ഷം സെക്യുലര്‍ എന്ന പുതിയ പാര്‍ട്ടി രൂപീകരിച്ചത്. തുടര്‍ന്ന് 2021ല്‍ നടന്ന നിയമസഭ തിരഞ്ഞെടുപ്പില്‍ മത്സരിച്ചെങ്കിലും പരാജയപ്പെട്ടു. ഇതിനെല്ലാം ഒടുവിലാണ് പി സി ബിജെപി അനുകൂല നിലപാട് സ്വീകരിച്ചത്. ലോക്‌സഭ തിരഞ്ഞെടുപ്പ് മുന്നില്‍ കണ്ടുള്ള പി സി ജോര്‍ജിന്റെയും ബിജെപിയുടെയും നീക്കം ഫലം കാണുമോ എന്നാണ് ഇനി അറിയാനുള്ളത്. റിപ്പോര്‍ട്ടുകള്‍ ശരിയെങ്കില്‍ പി സി ജോര്‍ജ് പത്തനംതിട്ടയില്‍ മത്സരിക്കാനാണ് സാധ്യത.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...ios Link - https://apple.co/3hEw2hy
ഞങ്ങളുടെ സോഷ്യൽ മീഡിയ പേജുകൾ സബ്‌സ്‌ക്രൈബ് ചെയ്യാൻ X (Twitter), Facebook ലിങ്കുകളിൽ ക്ലിക്കുചെയ്യുക. ഏറ്റവും പുതിയ വാര്‍ത്തകൾക്കും വിശേഷങ്ങൾക്കുമായി സീ മലയാളം ന്യൂസ് ടെലഗ്രാം ചാനല്‍ സബ്‌സ്‌ക്രൈബ് ചെയ്യൂ. അപ്ഡേറ്റുകൾ അറിയാൻ സീ മലയാളം ന്യൂസ് വാട്സാപ്പ് ചാനൽ സബ്‌സ്‌ക്രൈബ് ചെയ്യൂ.
