ന്യൂഡല്‍ഹി: കോടതി കയറി സിബിഐ ഉദ്യോഗസ്ഥര്‍. നിര്‍ബന്ധിത അവധില്‍ പ്രവേശിക്കാനുള്ള കേന്ദ്ര സര്‍ക്കാര്‍ നടപടിയ്ക്കെതിരെ സിബിഐ മുന്‍ ഡയറക്ടര്‍ അലോക് വര്‍മ സുപ്രീംകോടതിയില്‍ ഹര്‍ജി നല്‍കി.
ചുമതലകളില്‍ നിന്ന് നീക്കിയ നടപടിയെ ചോദ്യം ചെയ്താണ് ഹര്‍ജി നല്‍കിയിരിക്കുന്നത്. ഹര്‍ജി സുപ്രിം കോടതി വെള്ളിയാഴ്ച പരിഗണിക്കും.
ചൊവ്വാഴ്ച അര്‍ധരാത്രിയാണ് കേന്ദ്രം നാടകീയമായ നീക്കങ്ങള്‍ നടത്തിയത്. അതനുസരിച്ച് ഡയറക്ടര്‍ അലോക് വര്‍മയോടും അഴിമതി ആരോപണ വിധേയനായ രാകേഷ് അസ്താനയോടും നിര്‍ബന്ധിത ലീവില്‍ പ്രവേശിക്കാന്‍ നിര്‍ദ്ദേശിച്ചിരുന്നു. കൂടാതെ, അഡീഷണൽ ഡയറക്ടർ എ.കെ. ശര്‍മയോടും അവധിയില്‍ പ്രവേശിക്കാന്‍ നിര്‍ദ്ദേശമുണ്ട്.
സിബിഐയുടെ ചരിത്രത്തില്‍ ആദ്യമായി അന്വേഷണ ഏജന്‍സിയുടെ മൂന്ന്‍ ഉന്നത ഉദ്യോഗസ്ഥരുടെ ഓഫീസുകള്‍ സീല്‍ ചെയ്തിരിക്കുകയാണ്. കൂടാതെ, ഇവരുമായി അടുത്ത ബന്ധമുള്ള മറ്റ് ഉദ്യോഗസ്ഥരും നിര്‍ബന്ധിത അവധിയിലാണെന്നാണ് റിപ്പോര്‍ട്ട്.
അതേസമയം, കേന്ദ്ര സര്‍ക്കാരിന്‍റെ നടപടി നിയമ വിരുദ്ധമാണെന്നും അലോക് കുമാര്‍ വര്‍മയെ സിബിഐ ഡയറക്ടര്‍ സ്ഥാനത്തുനിന്നും നീക്കിയ നടപടി സുപ്രീം കോടതിയില്‍ ചോദ്യം ചെയ്യുമെന്നും മുതിര്‍ന്ന അഭിഭാഷകന്‍ പ്രശാന്ത് ഭൂഷണ് പറഞ്ഞു.
സ്പെഷല്‍ ഡയറക്ടര്‍ രാകേഷ് അസ്താനയുടെ പകയ്ക്കു പാത്രമായതാണ് അലോക് വര്‍മയെ നീക്കാനുള്ള കാരണമെന്നും അദ്ദേഹം പറഞ്ഞു. അസ്താനയ്ക്കെതിരായ അഴിമതിക്കേസില്‍ കേന്ദ്ര സര്‍ക്കാര്‍ അദ്ദേഹത്തെ സംരക്ഷിക്കുകയാണ‌്.
അരുണ്‍ ഷൂരിയും യശ്വന്ത് സിന്‍ഹയും ചേര്‍ന്ന് റഫാല്‍ ഇടപാടില്‍ നല്‍കിയ പരാതി അലോക് വര്‍മ സ്വീകരിച്ചിരുന്നു. ഇതും അദ്ദേഹത്തിനോടുള്ള വിരോധത്തിനു കാരണമായി. അലോക് കുമാര്‍ വര്‍മയെ നീക്കിയതിനെതിരെ താന്‍ സുപ്രീം കോടതിയെ സമീപിക്കുമെന്നും പ്രശാന്ത് ഭൂഷണ് പറഞ്ഞു.
സിബിഐ ഡയറക്ടറുടെ കാലാവധി രണ്ടു വര്‍ഷമാണ്‌. അതനുസരിച്ച്, അലോക് വര്‍മയ്ക്ക് ഇനിയും നാല് മാസത്തെ കാലാവധി കൂടി ഉണ്ട്.
സി.ബി.ഐ നേതൃത്വത്തിലെ ഈ ഉന്നത ഉദ്യോഗസ്ഥര്‍ തമ്മിലുള്ള ചേരിപ്പോര് സര്‍ക്കാരിനും സിബിഐയ്ക്കും വലിയ തലവേദന സൃഷ്ടിച്ച സാഹചര്യത്തിലാണ് സര്‍ക്കാര്‍ നടപടി. ഇന്നലെ അര്‍ധരാത്രി പ്രധാനമന്ത്രി അടിയന്തരമായി വിളിച്ചുചേര്‍ത്ത അപ്പോയിന്‍മെന്‍റ് കമ്മറ്റി യോഗത്തിലാണ് തീരുമാനം. ഉത്തരവും ഇന്നലെ രാത്രി തന്നെ പുറത്തിറക്കിയിട്ടുണ്ട്. ജോയന്‍റ് ഡയറക്ടര്‍ നാഗേശ്വര റാവുവിനാണ് സിബിഐയുടെ ചുമതല.
