Plastic Ban: ഒറ്റത്തവണ ഉപയോ​ഗിക്കുന്ന പ്ലാസ്റ്റിക് ഉത്പന്നങ്ങൾ നിരോധിച്ചു; നിരോധനം അടുത്ത വർഷം ജൂലൈ ഒന്ന് മുതൽ

ന്യൂഡൽഹി: ഒറ്റത്തവണ ഉപയോഗിക്കുന്ന പ്ലാസ്റ്റിക് ഉത്പന്നങ്ങളൾ നിരോധിച്ച് കേന്ദ്ര സർക്കാർ (Central Government). 75 മൈക്രോണിൽ താഴെയുള്ള എല്ലാ പ്ലാസ്റ്റിക് ഉത്പന്നങ്ങളും നിരോധിച്ചു. അടുത്ത വർഷം ജൂലൈ ഒന്ന് മുതൽ നിരോധനം നിലവിൽ വരും. പ്ലാസ്റ്റിക് (Plastic) ഉപയോ​ഗിച്ച് നിർമിക്കുന്ന പ്ലേറ്റ്, കപ്പ്, ​ഗ്ലാസ്,  മിഠായി കവറുകൾ എന്നിവയ്ക്കെല്ലാം നിരോധനം ബാധകമാണ്.

നേരത്തേ 50 മൈക്രോണിൽ താഴെയുള്ള ഉത്പന്നങ്ങളെല്ലാം കേന്ദ്രം നിരോധിച്ചിരുന്നു. ഇനി മുതൽ 75 മൈക്രോണിൽ താഴെയുള്ള പ്ലാസ്റ്റിക് ഉത്പന്നങ്ങളും ഉപയോ​ഗിക്കാൻ സാധിക്കില്ല. 120 മൈക്രോൺ മുതൽ മുകളിലേക്ക് മാത്രമേ പോളിത്തീൻ ബാഗുകൾ നിർമിക്കാനോ ഉപയോഗിക്കാനോ പാടുള്ളൂ. സെപ്റ്റംബർ 30 മുതൽ 75 മൈക്രോണിൽ താഴെയുള്ള പ്ലാസ്റ്റിക് ഉത്പന്നങ്ങൾ ഉപയോ​ഗിക്കാൻ പാടില്ല. രണ്ട് ഘട്ടമായിട്ടാകും പ്ലാസ്റ്റിക് നിരോധനം നടപ്പാക്കുക. ആദ്യഘട്ടമാണ് സെപ്തംബർ 30ന് ആരംഭിക്കുന്നത്.

ALSO READ: 75th Independence Day: സ്വാതന്ത്ര്യ ദിനത്തിൽ പ്ലാസ്റ്റിക് പതാകകൾ വേണ്ടെന്ന് കേന്ദ്ര സർക്കാർ

കേന്ദ്രപരിസ്ഥിതി മന്ത്രാലയമാണ് ഈ വിജ്ഞാപനം പുറത്തിറക്കിയിരിക്കുന്നത്. ജൂലൈ ഒന്ന് മുതൽ 75 മൈക്രോണിൽ താഴെയുള്ള പ്ലാസ്റ്റിക് ഉത്പന്നങ്ങൾ നിർമിക്കുന്നതും വിൽപ്പന നടത്തുന്നതും ഉപയോ​ഗിക്കുന്നതും നിരോധിച്ചതായി വിജ്ഞാപനത്തിൽ വ്യക്തമാക്കുന്നു. കുറഞ്ഞ മൈക്രോണിലുള്ള പ്ലാസ്റ്റികിന്‍റെ നിർമാണം, കയറ്റുമതി, സംഭരണം, വിതരണം, വിൽപ്പന എന്നിങ്ങനെ എല്ലാ നടപടികളും നിരോധിച്ചിട്ടുണ്ട്.

ചെറുകിട വ്യവസായികളെയോ (Small scale industries) ഉത്പാദകരെയോ ബാധിക്കാത്ത തരത്തിലാണ് ചട്ടങ്ങളെന്നാണ് കേന്ദ്ര പരിസ്ഥിതി മന്ത്രാലയം വ്യക്തമാക്കുന്നത്. മാർച്ചിൽ ഈ വിജ്ഞാപനത്തിന്‍റെ കരട് മന്ത്രാലയം പ്രസിദ്ധീകരിച്ചിരുന്നു. നിർദേശങ്ങളെല്ലാം പരിശോധിച്ച് അവയെല്ലാം ഉൾപ്പെടുത്തിയ ശേഷമാണ് അന്തിമവിജ്ഞാപനം പുറത്തിറക്കിയത്. പുനരുപയോ​ഗിക്കാൻ സാധ്യമല്ലാത്ത പ്ലാസ്റ്റിക് വലിയ പാരിസ്ഥിതിക പ്രശ്നമാണ് രാജ്യത്ത് ഉയർത്തുന്നത്. ഈ സാഹചര്യത്തിലാണ് ​ഗുണനിലവാരം കുറഞ്ഞ പ്ലാസ്റ്റിക് നിരോധിക്കാൻ കേന്ദ്ര സർക്കാർ തീരുമാനിച്ചത്.

ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്...  മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...