கொரோனா முழு அடைப்பு காலத்தில் காய்கறி, மளிகை போன்ற அத்தியாவசிய பொருட்களின் விலை கண்காணிக்க பட்டு வருவதாக அமைச்சர் RB உதயகுமார் தெரிவித்துள்ளார்.
மளிகை மற்றும் காய்கறிகளின் விலை உயர்வு குறித்த திமுக தலைவர் MK ஸ்டாலின் குற்றச்சாட்டுகளை முன்வைத்துள்ள நிலையில்., வருவாய், பேரிடர் மேலாண்மை மற்றும் தகவல் தொழில்நுட்ப அமைச்சர் RB உதயகுமாரின் அறிவிப்பு வெளியாகியுள்ளது. மேலும்., சந்தை விலையை கட்டுப்படுத்த மாநில அரசு தேவையான அனைத்து நடவடிக்கைகளையும் எடுத்து வருவதாகவும் அவர் குறிப்பிட்டுள்ளார்.
"தனது கட்சியினருடன் ஸ்டாலின் மேற்கொள்ளும் வீடியோ மாநாட்டு கூட்டங்களின் விவரங்கள் வெளியாவது, ஊடக கவனத்தை ஈர்ப்பதற்காக மட்டுமே" என்றும் அவர் குற்றம் சாட்டினார்.
உணவு பொருள் இருப்பு குறித்து பேசிய அவர்., மாநிலத்தில் நிறுவப்பட்ட 2,061 நெல் கொள்முதல் மையங்களில் இருந்து ஏப்ரல் 10-ஆம் தேதி வரை 21 லட்சம் மெட்ரிக் டன் நெல் கொள்முதல் செய்யப்பட்டுள்ளதாகவும், இந்த ஆண்டு இறுதிக்குள் 7 லட்சம் டன் நெல் கொள்முதல் செய்யப்படும் என்றும் அமைச்சர் தெரிவித்தார்.
“ஏப்ரல் 10, 2018 மற்றும் ஏப்ரல் 10, 2019-க்கு இடையில் 1,766 கொள்முதல் மையங்கள் மட்டுமே இருந்தன, இதன் மூலம் 18.56 லட்சம் மெட்ரிக் டன் கொள்முதல் செய்யப்பட்டது. 2020 இறுதிக்குள் 28 லட்சம் மெட்ரிக் டன் கொள்முதல் செய்யப்படும், இது தமிழ்நாட்டில் ஒரு சாதனையாக இருக்கும்,” என்றும் அவர் தெரிவித்துள்ளார்.
9,915-க்கும் மேற்பட்ட மொபைல் வேன்கள் 5,478 மெட்ரிக் டன் காய்கறிகளையும் பழங்களையும் மாநிலம் முழுவதும் விநியோகித்து வருகின்றன என்று அவர் கூறினார். "இது பழங்கள் மற்றும் காய்கறிகளின் சந்தை விலையை கட்டுப்படுத்த வழிவகுத்தது. தவிர, மாநிலத்தில் எங்கும் காய்கறிகளுக்கு பற்றாக்குறை இல்லை,” என்றும் அமைச்சர் குறிப்பிட்டார்.
அரசாங்கம் வழங்கிய மானியங்களின் காரணமாக, ஒழுங்குமுறை சந்தைகளில் சேமிப்பு ஒரு வருடத்தில் 69,698 மெட்ரிக் டன்னிலிருந்து 90,739 டன்னாக அதிகரித்துள்ளது. மேலும், தயாரிப்பு கடன் ரூ.3 கோடியிலிருந்து ரூ.4.14 கோடியாக உயர்ந்துள்ளது. ஒழுங்குமுறை சந்தைகளில் பரிவர்த்தனை 3,278 மெட்ரிக் டன்னாக உயர்ந்துள்ளது எனவும் அவர் தெரிவித்தார்.
இதனிடையே அமைச்சர் உதயகுமார் வியாழக்கிழமை கோவிட் -19 அவசரகால செயல்பாட்டு மையத்தில் ஆய்வு செய்து, தொற்றுநோயை எதிர்ப்பதில் மாவட்ட நிர்வாகம், குடிமை அமைப்பு, காவல்துறை மற்றும் சுகாதாரத் துறைகள் மேற்கொண்ட முயற்சிகளைப் பாராட்டினார். ஊடகவியலாளர்களுடன் உரையாற்றிய அவர், “நகர்ப்புறங்களில் மக்கள் அடர்த்தி இருப்பதால், மக்கள் சமூக தொலைதூர விதிமுறைகளுக்கு கட்டுப்படுகிறார்கள் என்பதை உறுதிப்படுத்துவது கடினம். எவ்வாறாயினும், சமூக தூரத்தை உறுதி செய்வதற்காக சந்தைப் பகுதிகள் மற்றும் பிற பொது இடங்களை பரவலாக்கப்பட்ட குழு கண்காணித்து வருகிறது” எனவும் தெரிவித்தார்.
