ஷமியின் மனைவி தாக்கல் செய்த வழக்கில் அலிப்பூர் நீதிமன்றம் ஜாமீன் வழங்கியுள்ளது.
முகமது ஷமி இப்போது ஆஸ்திரேலிய அணிக்கு எதிரான ஒருநாள் போட்டியில் இந்திய அணியில் விளையாடிக் கொண்டிருக்கிறார்.
ஷமி மற்றும் அவரது சகோதரர் மீது மனைவி ஹசின் ஜஹான் குடும்ப வன்முறை வழக்கு அலிப்பூர் நீதிமன்றத்தில் விசாரணை நடைபெற்று வந்தது.
அந்த வழக்கில் தான் அலிப்பூர் நீதிமன்றம் ஷமி மற்றும் அவரது சகோதரருக்கு ஜாமீன் வழங்கியுள்ளது. இந்த வழக்கு பல ஆண்டுகளாக நீதிமன்றத்தில் நடைபெற்று வந்தது.
முகமது ஷமிக்கும் அவரது மனைவி ஹசின் ஜஹானுக்கும் இடையே 2018 ஆம் ஆண்டுக்கு முன்பு இருந்து கருத்து வேறுபாடு ஏற்பட்டது.
இருவரும் பரஸ்பரம் பகிரங்க குற்றச்சாட்டுகளை பொதுவெளியில் வைத்தனர். ஷமி தன்னை உடல் ரீதியாகவும், மன ரீதியாகவும் துன்புறுத்துவதாக அவருடைய மனைவி ஹசின் ஜஹான் தெரிவித்தார்.
இதனை மறுத்த முகமது ஷமி, தன் மீது வைக்கப்பட்ட குற்றச்சாட்டுகள் அபாண்டமானவை என தெரிவித்தார். இந்த வழக்கு நீதிமன்றத்தில் தொடர்ந்து நடைபெற்று வந்தது.
இந்த வழக்கால் முகமது ஷமியின் கிரிக்கெட் வாழ்க்கையும் பாதிக்கப்பட்டது. அவர் கவனச் சிதறல்கள் காரணமாக சிறப்பாக பந்துவீச முடியாமல் திணறினார். இதனால் இந்திய கிரிக்கெட் அணியில் இருந்தும் ஒதுக்கப்பட்டார்.
தற்போது அதில் இருந்து மீண்டு வந்திருக்கும் அவர், ஆஸ்திரேலிய அணிக்கு எதிராக சிறப்பாக பந்துவீசி 5 விக்கெட்டுகளை வீழ்த்தினார். இந்திய மண்ணில் ஆஸ்திரேலிய அணிக்கு எதிராக 5 விக்கெட்டுகளை வீழ்த்திய முதல் இந்திய வேகப்பந்துவீச்சாளர் என்ற சிறப்பை பெற்றிருக்கிறார்.
இந்த நேரத்தில் தான் முகமது ஷமியின் மனைவி தொடர்ந்த வழக்கில் இருந்து அவருக்கு ஜாமீன் கிடைத்திருக்கிறது. அதேநேரத்தில் வழக்கு இன்னும் தொடர்கிறது. இறுதி விசாரணையின் முடிவில் தான் தீர்ப்பு வெளியாகும்.
