മാസ്സ് സിനിമകളിലേക്ക് മലയാള സിനിമ ഒരിടവേളയ്ക്ക് ശേഷം വീണ്ടും തിരിച്ച് വരുന്ന സമയമാണ്. കടുവയും , പാപ്പനും തീയറ്ററുകളിൽ വലിയ വിജയമായത് തന്നെ പ്രേക്ഷകർ അത്തരം സിനിമകൾ കാണാൻ കൂടുതൽ താത്പര്യം പ്രകടിപ്പിക്കുന്നു എന്ന സൂചനയാണ് നൽകുന്നത്. ഈ ഒരവസരത്തിലാണ് വലിയ മുതൽമുടക്കുമായി ഖാലിദ് റഹ്മാൻ സംവിധാനം ചെയ്ത 'തല്ലുമാല' തീയറ്ററുകളിൽ എത്താൻ ഒരുങ്ങുന്നത്. കളർഫുൾ എന്റർടൈനർ എന്ന ഗണത്തിൽ പെടുത്താവുന്ന സിനിമ ഓഗസ്റ്റ് 12നാണ് റിലീസ് ചെയ്യുന്നത്.ടൊവിനോ തോമസ് , കല്യാണി പ്രിയദർശൻ , ഷൈൻ ടോം ചാക്കോ , ജോണി ആന്റണി, ബിനു പപ്പു, ലുക്ക്മാൻ അവറാൻ തുടങ്ങി ഒരു നീണ്ട താരനിര തന്നെ ചിത്രത്തിലുണ്ട്. സിനിമയ്ക്ക് വേണ്ടി അണിയറ പ്രവർത്തകർ നടത്തുന്ന പ്രൊമോഷൻ പരിപാടികളും ഇപ്പോൾ ശ്രദ്ധേയമാകുകയാണ്.
തിരുവനന്തപുരം ലുലു മാളിൽ വച്ച് നടന്ന പ്രൊമോഷൻ പരിപാടിയിൽ ആയിരങ്ങളാണ് പങ്കെടുത്തത്. സിനിമയിലെ താരങ്ങൾ ഒക്കെ തന്നെ ചടങ്ങിൽ പങ്കെടുത്തിരുന്നു. ചടങ്ങിനോടനുബന്ധിച്ച് പുറത്തിറക്കിയ 'തല്ലുമാല' സ്പെഷ്യൽ ടീ ഷർട്ടുകൾ സോഷ്യൽ മീഡിയയിൽ ഇപ്പോൾ തന്നെ വൈറലാണ്. മൈ ഡെസിഗ്നേഷനുമായി ചേർന്നാണ് തല്ലുമാല സംഘം ടീ ഷർട്ട് പുറത്തിറക്കിയത്.സൗത്ത് ഇന്ത്യയിൽ ആദ്യമായാണ് സിനിമ പ്രൊമോഷന് റെയിൻ ബോ റിഫ്ളക്ടീവ് പ്രിൻറ് ഉപയോഗിച്ചുള്ള ടീ ഷർട്ടുകൾ പുറത്തിറക്കുന്നത്. അടുത്ത കാലത്ത് തങ്ങൾക്ക് ഏറ്റവുമധികം റെസ്പോൺസ് ലഭിച്ച പ്രൊഡക്ടുകളിൽ ഒന്ന് തല്ലുമാലയുടെ ടീ ഷർട്ടുകളാണ് എന്നാണ് മൈ ഡെസിഗ്നേഷൻറെ പിന്നണിയിൽ പ്രവർത്തിക്കുന്നവർ വ്യക്തമമാക്കിയിരിക്കുന്നത്. നേരത്തെ കുറുപ്പ് , കടുവ , മഹാവീര്യർ എന്നീ സിനിമകളുടെയും ഒഫിഷ്യൽ മർച്ചൻഡൈസർ പാർട്ണർമാരായിരുന്നു മൈ ഡെസിഗ്നേഷൻ.
ലുലു മാളിലെ ചടങ്ങിന് ശേഷം ദുബായിയിൽ എത്തി ചേർന്ന തല്ലുമാല സംഘത്തിന് അവിടെയും ലഭിച്ചത് വലിയ സ്വീകരണമാണ്. പ്രൊമോഷൻ പരിപാടികളുടെ ഭാഗമായി മലയാള സിനിമയുടെ ചരിത്രത്തിലാദ്യമായി ദുബായ് ഫെസ്റ്റിവൽ സിറ്റി മാളിൽ എൽ ഈ ഡി ഷോയും നടന്നു. ജി സി സി യിൽ ആരംഭിച്ച ബുക്കിങ്ങിന് വലിയ പ്രതികരണമാണ് ലഭിച്ചുകൊണ്ടിരിക്കുന്നത്. മണവാളൻ വസീം, വ്ലോഗർ ബീപാത്തു എന്നീ കഥാപാത്രങ്ങളായാണ് ടൊവിനോയും കല്ല്യാണിയും എത്തുന്നത്.സിനിമയുടെ ഗാനങ്ങൾക്കും ട്രെയിലറിനും വലിയ പ്രതികരണമാണ് സോഷ്യൽ മീഡിയയിൽ ലഭിക്കുന്നത്. വിഷ്ണു വിജയ് സംഗീതം നിർവഹിച്ചിരിക്കുന്ന ഗാനങ്ങൾ ഇപ്പോൾ തന്നെ ഹിറ്റ് ചാർട്ടിൽ ഇടം പിടിച്ച് കഴിഞ്ഞു.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
