ഇന്ത്യയിൽ നിലവിൽ ഒമ്പത് നഗരങ്ങളിൽ ഇവി ചാർജിംഗ് സ്റ്റേഷനുകളുണ്ടെന്ന് വൈദ്യുതി മന്ത്രാലയം. കഴിഞ്ഞ നാല് മാസത്തിനിടെ ഡൽഹി, മുംബൈ, ചെന്നൈ എന്നിവയുൾപ്പെടെ ഒമ്പത് മെഗാസിറ്റികളിൽ ഇവി ചാർജിംഗ് സ്റ്റേഷനുകൾ രണ്ടര മടങ്ങ് വർധിച്ചു.
ഇലക്ട്രിക് വെഹിക്കിൾ (ഇവി) ചാർജിംഗ് സ്റ്റേഷനുകൾ ഇപ്പോൾ സൂറത്ത്, പൂനെ, അഹമ്മദാബാദ്, ബെംഗളൂരു, ഹൈദരാബാദ്, ഡൽഹി, കൊൽക്കത്ത, മുംബൈ, ചെന്നൈ എന്നിവിടങ്ങളിൽ ലഭ്യമാണ്. ഈ ഒമ്പത് നഗരങ്ങളിലായി 2021 ഒക്ടോബറിനും 2022 ജനുവരിക്കും ഇടയിൽ 678 പബ്ലിക് ഇവി ചാർജിംഗ് സ്റ്റേഷനുകൾ അധികമായി സ്ഥാപിച്ചതായി പ്രസ്താവനയിൽ പറയുന്നു. ഇന്ത്യയിലെ 1,640 പബ്ലിക് ഇവി ചാർജറുകളിൽ 940 എണ്ണം ഈ നഗരങ്ങളിലാണ്.
4 മില്യണിലധികം ജനസംഖ്യയുള്ള ഒമ്പത് മെഗാസിറ്റികളിലാണ് സർക്കാർ ആദ്യം ശ്രദ്ധ കേന്ദ്രീകരിച്ചത്. 2022 ജനുവരി 14-ന് ഇവി ചാർജിംഗ് ഇൻഫ്രാസ്ട്രക്ചറിനായുള്ള പുതുക്കിയ ഏകീകൃത മാർഗ്ഗനിർദ്ദേശങ്ങളും മാനദണ്ഡങ്ങളും വൈദ്യുതി മന്ത്രാലയം പുറത്തിറക്കിയിരുന്നു.
സ്വകാര്യ നിക്ഷേപം വർദ്ധിക്കുന്നു
പബ്ലിക് ഇവി ചാർജിംഗ് ഇൻഫ്രാസ്ട്രക്ചറിൽ ഗണ്യമായ വിപുലീകരണത്തോടെ, ഇലക്ട്രിക് വാഹനങ്ങൾ ഇന്ത്യൻ വിപണിയിൽ നുഴഞ്ഞുകയറാൻ തുടങ്ങി. സ്വകാര്യ, പൊതു ഏജൻസികളെ (BEE, EESL, PGCIL, NTPC, മുതലായവ) ഉൾപ്പെടുത്തി പൊതു ചാർജിംഗ് ഇൻഫ്രാസ്ട്രക്ചർ വർധിപ്പിക്കുന്നതിന് സർക്കാർ ശ്രമങ്ങൾ നടത്തി. ഉപഭോക്താക്കളുടെ വിശ്വാസം നേടുന്നതിനായി സൗകര്യപ്രദമായ ചാർജിംഗ് നെറ്റ്‌വർക്ക് ഗ്രിഡ് വികസിപ്പിക്കുന്നതിന് ഇവി ചാർജിംഗ് സ്റ്റേഷനുകൾ സ്ഥാപിക്കാൻ നിരവധി സ്വകാര്യ സ്ഥാപനങ്ങളും മുന്നോട്ട് വന്നിട്ടുണ്ടെന്നും റിപ്പോർട്ടിൽ പറയുന്നു. ഈ മെഗാസിറ്റികളിലെ ഇവി ഇൻഫ്രാസ്ട്രക്ചർ പൂർത്തിയാക്കിയ ശേഷം, ഘട്ടംഘട്ടമായി മറ്റ് നഗരങ്ങളിലേക്കും കവറേജ് വ്യാപിപ്പിക്കാൻ സർക്കാരിന് പദ്ധതിയുണ്ട്.
എണ്ണ വിപണന കമ്പനികൾ നേതൃത്വം നൽകുന്നു
രാജ്യത്തെ പ്രമുഖ നഗരങ്ങളിലും ദേശീയ പാതകളിലുമായി 22,000 ഇവി ചാർജിംഗ് സ്റ്റേഷനുകൾ സ്ഥാപിക്കുമെന്ന് എണ്ണ വിപണന കമ്പനികൾ പ്രഖ്യാപിച്ചു. 22,000 ഇവി ചാർജിംഗ് സ്റ്റേഷനുകളിൽ 10,000 എണ്ണം ഐഒസിഎൽ (ഇന്ത്യൻ ഓയിൽ) സ്ഥാപിക്കും, 7,000 എണ്ണം ഭാരത് പെട്രോളിയം കോർപ്പറേഷൻ ലിമിറ്റഡും (ബിപിസിഎൽ), ബാക്കി 5,000 എണ്ണം ഹിന്ദുസ്ഥാൻ പെട്രോളിയം കോർപ്പറേഷൻ ലിമിറ്റഡും (എച്ച്പിസിഎൽ) സ്ഥാപിക്കും.
ഐഒസിഎൽ ഇതിനകം 439 ഇവി ചാർജിംഗ് സ്റ്റേഷനുകൾ സ്ഥാപിച്ചിട്ടുണ്ട്. അടുത്ത വർഷത്തിനുള്ളിൽ 2,000 ഇവി ചാർജിംഗ് സ്റ്റേഷനുകൾ കൂടി സ്ഥാപിക്കാനാണ് പദ്ധതിയിടുന്നത്. ബിപിസിഎൽ 52 ചാർജിംഗ് സ്റ്റേഷനുകളും എച്ച്പിസിഎൽ 382 ചാർജിംഗ് സ്റ്റേഷനുകളും സ്ഥാപിച്ചിട്ടുണ്ട്. ഘനവ്യവസായ വകുപ്പ് 25 ഹൈവേകൾക്കും എക്‌സ്പ്രസ് വേകൾക്കുമായി 1,576 പബ്ലിക് ചാർജിംഗ് സ്റ്റേഷനുകൾ ഈ ഹൈവേകളുടെ ഇരുവശങ്ങളിലും ഓരോ 25 കിലോമീറ്റർ പരിധിക്കുള്ളിലും സ്ഥാപിക്കാൻ അടുത്തിടെ അനുമതി നൽകിയിട്ടുണ്ട്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
