ಪಾಟ್ನಾ: ತಮಗೆ ಯಾವುದಾದರು ಒಂದು ಮಗುವಾದರೆ ಸಾಕಪ್ಪ ಎಂದು ಮಂದಿರ, ಮಸೀದಿ ಸುತ್ತುವವರು ಒಂದೆಡೆಯಾದರೆ, ಜನ್ಮ ಕೊಟ್ಟ ಮಗುವನ್ನು ಕಸದ ತೊಟ್ಟಿಯಲ್ಲಿ ಬಿಸಾಡಿ ಹೋಗುವ ಮಂದಿ ಇನ್ನೊಂದೆಡೆ. ಅಂತಹದ್ದೇ ಒಂದು ಘಟನೆ ಪಾಟ್ನಾದಲ್ಲಿ ನಡೆದಿದೆ. ಇಲ್ಲಿ, ಯಾರೋ ನವಜಾತ ಶಿಶುವನ್ನು ಚೀಲದಲ್ಲಿ ಮುಚ್ಚಿ ಕಸದ ರಾಶಿಯಲ್ಲಿ ಎಸೆದು ಹೋಗಿದ್ದಾರೆ.
ಪಾಟ್ನಾದ ಕದಮ್ ಕುವಾನ್ ಪೊಲೀಸ್ ಠಾಣೆ ಪ್ರದೇಶದಲ್ಲಿ ಕಸದ ರಾಶಿಯಲ್ಲಿ ಸೋಮವಾರ ನವಜಾತ ಶಿಶು ಕಂಡು ಬಂದಿದೆ. ನವಜಾತ ಶಿಶು ಕಸದ ರಾಶಿಯಲ್ಲಿ ಸಿಕ್ಕಿರುವ ಸುದ್ದಿ ಇಡೀ ಪ್ರದೇಶದಲ್ಲಿ ಸಂವೇದನೆಯನ್ನು ಉಂಟುಮಾಡಿತು. ಬೆಳಿಗ್ಗೆ ಶೌಚಾಲಯಕ್ಕೆ ಹೋದ ಮಹಿಳೆಗೆ ಕಸದ ರಾಶಿಯಿಂದ ಮಗುವಿನ ಕೂಗು ಕೇಳಿಸಿತು. ಈ ಧ್ವನಿ ರಾಶಿಯಲ್ಲಿ ಬಿದ್ದಿದ್ದ ಚೀಲದಿಂದ ಬರುತ್ತಿತ್ತು. ಮಹಿಳೆ ಹತ್ತಿರ ಹೋಗಿ ನೋಡಿದಾಗ, ಚೀಲದಲ್ಲಿ ಮಗು ಇದ್ದದ್ದು ಕಂಡು ಬಂದಿದೆ. ಅದನ್ನು ಕಂಡ ಮಹಿಳೆಗೆ ಆಶ್ಚರ್ಯವಾಗಿದೆ.
ಮಹಿಳೆ ತಕ್ಷಣ ಮುಚ್ಚಿದ ಚೀಲ ತೆರೆದು ನವಜಾತ ಶಿಶುವನ್ನು ತಬ್ಬಿಕೊಂಡಳು. ಈ ಸುದ್ದಿ ಆ ಪ್ರದೇಶದಲ್ಲಿ ಬೆಂಕಿಯಂತೆ ಹರಡಿತು. ಜನರು ಸ್ಥಳದಲ್ಲಿ ಸೇರಲು ಪ್ರಾರಂಭಿಸಿದರು. ಎಲ್ಲರ ಬಾಯಿಯಲ್ಲಿ ಒಂದೇ ಒಂದು ಮಾತು ಇತ್ತು, ತನ್ನ ಕರುಳ ಬಳ್ಳಿಯನ್ನು ಕಸದ ರಾಶಿಗೆ ಎಸೆದ ಕ್ರೂರ ತಾಯಿ ಯಾರು? ಎಂಬುದು. ಅದೇ ಸಮಯದಲ್ಲಿ, ಇಡೀ ಘಟನೆಯ ಬಗ್ಗೆ ಪೊಲೀಸರಿಗೆ ತಿಳಿದಾಗ, ಅಧಿಕಾರಿಗಳು ತಕ್ಷಣ ಘಟನೆಯ ಸುತ್ತಲೂ ಸ್ಥಾಪಿಸಲಾದ ಸಿಸಿಟಿವಿ ಕ್ಯಾಮೆರಾಗಳನ್ನು ತನಿಖೆ ಮಾಡಲು ಪ್ರಾರಂಭಿಸಿದರು.
ಇದೀಗ ಕಸದ ರಾಶಿಯಲ್ಲಿ ಮಗು ಪತ್ತೆಹಚ್ಚಿದ ಮಹಿಳೆ ಬಳಿ ನವಜಾತ ಶಿಶು ಇದೆ. ಆಕೆ ತಾಯಿಯಂತೆ ಮಗುವನ್ನು ನೋಡಿಕೊಳ್ಳುತ್ತಿದ್ದಾಳೆ. ಪೊಲೀಸ್ ತನಿಖೆ ಪೂರ್ಣಗೊಂಡ ನಂತರವೇ ಮಗುವನ್ನು ಅಲ್ಲಿಗೆ ಎಸೆದವರು ಮತ್ತು ಅವರ ನಿಜವಾದ ತಾಯಿ-ತಂದೆ ಯಾರು ಎಂಬುದು ಸ್ಪಷ್ಟವಾಗುತ್ತದೆ. ಈ ಘಟನೆಯ ರಹಸ್ಯವನ್ನು ಶೀಘ್ರದಲ್ಲೇ ಪರಿಹರಿಸಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.
