ನವದೆಹಲಿ: ಇತ್ತೀಚೆಗಷ್ಟೇ ಖ್ಯಾತ ಟೆನ್ನಿಸ್ ತಾರೆ ಸಾನಿಯಾ ಮಿರ್ಜಾ ಸಹೋದರಿ ಅನಮ್ ಮಿರ್ಜಾ ಹಾಗೂ ಭಾರತೀಯ ತಂಡದ ಮಾಜಿ ನಾಯಕ ಮೋಹಮ್ಮದ ಅಜರುದ್ದೀನ್ ಅವರ ಪುತ್ರ ಅಸದುದ್ದೀನ್ ವಿವಾಹ ನೆರವೇರಿದೆ. ಒಂದೆಡೆ ಈ ವಿವಾಹ ಸಮಾರಂಭ ಭಾರಿ ಸುದ್ದಿಯಲ್ಲಿದ್ದರೆ ಇನ್ನೊಂದೆಡೆ ಅವರ ಈ ವಿವಾಹ ಸಮಾರಂಭದಿಂದ ಹೊರಹೊಮ್ಮಿರುವ ಹಲವು ಫೋಟೋಗಳು ಹಾಗೂ ವಿಡಿಯೋಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರಿ ವೈರಲ್ ಕೂಡ ಆಗಿವೆ. ಆದರೆ, ಈ ಸಮಾರಂಭದಲ್ಲಿ ಸಾನಿಯಾ ಮಿರ್ಜಾ ಕುರಿತಾದ ಒಂದು ವಿಡಿಯೋ ಮಾತ್ರ ನೆಟ್ಟಿಗರ ವಿಶೇಷ ಗಮನ ಸೆಳೆದಿದೆ. ಈ ವಿಡಿಯೋದಲ್ಲಿ ಸಾನಿಯಾ ಬಾಲಿವುಡ್ ನ ಖ್ಯಾತ ನಿರ್ದೇಶಕಿ-ನೃತ್ಯ ನಿರ್ದೇಶಕಿ ಫರಾಹ್ ಖಾನ್ ಹಾಗೂ ದಕ್ಷಿಣ ಚಿತ್ರರಂಗದ ಸೂಪರ್ ಸ್ಟಾರ್ ರಾಮ್ ಚರಣ್ ಅವರ ಜೊತೆ ಸೇರಿ 'ಘುಂಗರೂ' ಹಾಡಿಗೆ ಹೆಜ್ಜೆ ಹಾಕಿದ್ದಾಳೆ. ಸಾನಿಯಾ ಮಿರ್ಜಾ ಅವರ ಈ ವಿಡಿಯೋವನ್ನು ರಾಮ್ ಚರಣ್ ಅವರ ಪತ್ನಿ ಉಪಾಸನಾ ಕಾಮಿನೆನಿ ಹಂಚಿಕೊಂಡಿದ್ದಾರೆ.
ಸಾನಿಯಾ ಮಿರ್ಜಾ, ಫರಾಹ್ ಖಾನ್ ಹಾಗೂ ರಾಮ್ ಚರಣ್ ಅವರ ವಿಡಿಯೋವನ್ನು ಶೇರ್ ಮಾಡಿರುವ ಉಪಾಸನಾ ಕಾಮಿನೇನಿ, 'ಪಾಪ್ಯುಲರ್ ಡಿಮಾಂಡ್ ಗಾಗಿ' ಎಂಬ ಶೀರ್ಷಿಕೆ ನೀಡಿದ್ದಾರೆ. ಈ ವಿಡಿಯೋವನ್ನು ಉಪಾಸನಾ ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹರಿಬಿಟ್ಟಿದ್ದಾರೆ. ಅಷ್ಟೇ ಅಲ್ಲ ಈ ವಿಡಿಯೋಗೆ ಸಾನಿಯಾ ಮಿರ್ಜಾ ಕೂಡ ಸ್ವಾರಸ್ಯಕರ ಟಿಪ್ಪಣಿ ಮಾಡಿದ್ದಾರೆ. ಉಪಾಸನಾ ಅವರು ಹರಿಬಿಟ್ಟಿರುವ ಈ ಪೋಸ್ಟ್ ಗೆ ಕಾಮೆಂಟ್ ಮಾಡಿರುವ ಸಾನಿಯಾ "ನೀವು ಈ ವಿಡಿಯೋ ಹಂಚಿಕೊಳ್ಳುವಿರಿ ಎಂಬುದು ನನಗೆ ನಂಬಿಕೆಯೇ ಬರುತ್ತಿಲ್ಲ" ಎಂದು ಬರೆದಿದ್ದಾರೆ. ಅದೇನೇ ಇದ್ದರು ವಿಡಿಯೋದಲ್ಲಿ ಸಾನಿಯಾ ಮಿರ್ಜಾ, ಫರಾಹ್ ಖಾನ್ ಹಾಗೂ ರಾಮ್ ಚರಣ್ ತೇಜಾ ಅವರು ಸ್ವಾರಸ್ಯಕರವಾಗಿ ಹೆಜ್ಜೆ ಹಾಕಿದ್ದು ಮಾತ್ರ ನೆಟ್ಟಿಗರ ಗಮನ ಸೆಳೆದಿದೆ. ಈಗಾಗಲೇ ಈ ವಿಡಿಯೋ ಅನ್ನು 5 ಲಕ್ಷಕ್ಕೂ ಅಧಿಕ ಬಾರಿ ವಿಕ್ಷೀಸಲಾಗಿದೆ.
ಡಿಸೆಂಬರ್ 12ರಂದು ಅನಮ್ ಮಿರ್ಜಾ ಹಾಗೂ ಅಸದುದ್ದೀನ್ ವಿವಾಹ ಬಂಧನಕ್ಕೆ ಒಳಗಾಗಿದ್ದರು. ಈ ವಿವಾಹ ಸಮಾರಂಭಕ್ಕೆ ಅಜರುದ್ದೀನ್ ಅವರ ಮಾಜಿ ಪತ್ನಿ ಸಂಗೀತಾ ಬಿಜಲಾನಿ ಕೂಡ ಬಂದಿದ್ದರು. ಅಜರುದ್ದೀನ್ ಅವರ ಜೊತೆಗಿನ ಸಂಗೀತಾ ಅವರ ಫೋಟೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿತ್ತು. ಇದೀಗ ಸಾನಿಯಾಗೆ ಸಂಬಂಧಿಸಿದ ಈ ವಿಡಿಯೋ ಅಬಿಮಾನಿಗಳ ಗಮನ ಸೆಳೆಯುತ್ತಿದೆ.
