2000 ரூபாய் நோட்டுகளை புழக்கத்தில் இருந்து திரும்பப் பெற இந்திய ரிசர்வ் வங்கி முடிவு செய்துள்ளதாக வங்கி வெள்ளிக்கிழமை வெளியிட்ட ஒரு அறிக்கையில் தெரிவித்துள்ளது. எனினும் ₹2000 நோட்டு தற்போது செலுபடியாகும் எனவும் கூறப்பட்டுள்ளது. வரும் செப்டெம்பர் மாதம் 30ம் தேதி வரை 2000 ரூபாய் நோட்டுக்களை மாற்றிக் கொள்ள கால அவகாசம் அளிக்கப்படுகிறது.
வெள்ளிக்கிழமை வெளியிடப்பட்ட அறிக்கையில், மத்திய வங்கி கூறியது: “இந்திய ரிசர்வ் வங்கியின் “Clean Note Policy” என்ற கொள்கையின் படி, புழக்கத்தில் இருந்து ₹2000 மதிப்புள்ள ரூபாய் நோட்டுகளை திரும்பப் பெற முடிவு செய்யப்பட்டுள்ளது. ரூபாய் 2000 மதிப்பிலான ரூபாய் நோட்டுகள் தொடர்ந்து செல்லுபடியாகும். இதனை திரும்ப பெறும் நடவடிக்கையை நிறைவு செய்ய பொதுமக்களுக்கு போதுமான போதுமான கால அவகாசம் வழங்கும் வகையில், அனைத்து வங்கிகளும் செப்டம்பர் 30, 2023 வரை ₹2000 ரூபாய் நோட்டுகளுக்கு டெபாசிட் மற்றும்/அல்லது மாற்றும் வசதியை வழங்க வேண்டும்” என கூறியுள்ளது.
இந்த நடவடிக்கையை விளக்கிய ரிசர்வ் வங்கி கூறியதாவது: ரூ.2000 மதிப்பிலான ரூபாய் நோட்டுகளில் சுமார் 89% மார்ச் 2017க்கு முன் வெளியிடப்பட்டது மற்றும் அவற்றின் ஆயுட்காலம் 4-5 ஆண்டுகள் என மதிப்பிடப்பட்டுள்ளது. புழக்கத்தில் உள்ள இந்த ரூபாய் நோட்டுகளின் மொத்த மதிப்பு, மார்ச் 31, 2018 அன்று (புழக்கத்தில் உள்ள நோட்டுகளில் 37.3%) உச்சத்தில் இருந்த ₹6.73 லட்சம் கோடியிலிருந்து ₹3.62 லட்சம் கோடியாகக் குறைந்துள்ளது. இது மார்ச் 31, 2023 அன்று புழக்கத்தில் உள்ள நோட்டுகளில் 10.8% மட்டுமே. இந்த மதிப்பை பொதுவாக பரிவர்த்தனைகளுக்கு பயன்படுத்துவதில்லை என்பதும் கவனிக்கப்படுகிறது. மேலும், பொதுமக்களின் நாணயத் தேவையைப் பூர்த்தி செய்ய மற்ற வகை ரூபாய் நோட்டுகளின் இருப்பு தொடர்ந்து போதுமானதாக உள்ளது.
பண மதிப்பிழப்பு நடவடிக்கைக்கு பிறகு, புதிய ₹ 2000 நோட்டு அறிமுகப்படுத்தப்பட்டது. 1934 ஆம் ஆண்டு ஆர்பிஐ சட்டத்தின் பிரிவு 24(1) இன் கீழ், பொருளாதாரத்தின் நாணயத் தேவையை விரைவாகப் பூர்த்தி செய்யும் நோக்கத்துடன், நவம்பர் 2016 இல் ₹2000 மதிப்புள்ள ரூபாய் நோட்டு அறிமுகப்படுத்தப்பட்டது. அந்த நேரத்தில் புழக்கத்தில் இருந்த ₹500 மற்றும் ₹1000 ரூபாய் நோட்டுகள் செல்லாது என அறிவிக்கப்பட்டன.
பணமதிப்பு நீக்கம் அறிவிக்கப்பட்ட நேரத்தில், தடை செய்யப்பட்ட ரூ.500 மற்றும் ரூ.1,000 நோட்டுகள் புழக்கத்தில் இருந்த நோட்டுகளின் மதிப்பில் 80 சதவீதத்திற்கும் அதிகமாக இருந்தன. ரிசர்வ் வங்கியின் கரன்சி பிரஸ்கள் இடைவிடாமல் வேலை செய்தாலும், இவ்வளவு பெரிய எண்ணிக்கையை ஒரே இரவில் மாற்றுவது சாத்தியமில்லை என்பதால் 2000 ரூபாய் நோட்டுகள் அச்சடிக்கப்பட்டன.
மேலும், பண மதிப்பிழப்பு நடவடிக்கையின் போது, ஒரு நபர் தனது கணக்கில் இருந்து எவ்வளவு பணம் எடுக்கலாம் என்பதற்கு ஆரம்பத்தில் வரம்புகள் விதிக்கப்பட்டது மட்டுமல்லாமல், ரூ.2,000 நோட்டின் அதிக மதிப்பு காரணமாக, குறைவான எண்ணிக்கையிலான நோட்டுகளுடன் அதிக மதிப்பிலான ரூபாய் நோட்டுகளை உருவாக்க உதவியது. மார்ச் 31, 2017 நிலவரப்படி, ரூ.2,000 நோட்டுகள் புழக்கத்தில் உள்ள கரன்சி மதிப்பில் 50.2 சதவீதம் ஆக இருந்தது.
ஆனால் அவற்றின் புழக்கம் கணிசமாகக் குறைந்து வந்தது, முதன்மையாக ரிசர்வ் வங்கி FY20, FY21 மற்றும் FY22 இல் இந்த நோட்டுகளில் ஒன்றைக்கூட அச்சிடவில்லை என்று மத்திய வங்கியின் சமீபத்திய ஆண்டு அறிக்கை கூறுகிறது. இதன் விளைவாக, மார்ச் 31, 2022 நிலவரப்படி, மதிப்பு அடிப்படையில், புழக்கத்தில் உள்ள அனைத்து கரன்சி நோட்டுகளிலும் இந்த நோட்டுகள் 13.8 சதவீதம் மட்டுமே.
பல ஆண்டுகளாக இந்த நோட்டுகளின் எண்ணிக்கை தொடர்ந்து குறைந்து வரும் நிலையில், ரிசர்வ் வங்கி நோட்டுகளை திரும்பப் பெறுவதற்கான அறிவிப்பை வெளியிட்டுள்ளது. 2020 நிதியாண்டின் முடிவில் 274 கோடியாக இருந்த ரூ.2,000 கரன்சி நோட்டுகளின் எண்ணிக்கை 2022ஆம் நிதியாண்டின் முடிவில் 214 கோடியாக குறைந்தது குறிப்பிடத்தக்கது.
கடந்த வாரம், நாடாளுமன்றத்தில் மாநிலங்களவை உறுப்பினர் ராஜ்மணி படேல் 2000 ரூபாய் நோட்டு தொடர்பாக அரசிடமும், நிதி அமைச்சகத்திடமும் சில கேள்விகளை எழுப்பினார். இந்திய ரிசர்வ் வங்கி புதிய 2000 ரூபாய் நோட்டுகளை வெளியிடப்போகிறதா, ₹2000 நோட்டை விநியோகிக்க வேண்டாமென வங்கிகளுக்கு அரசு உத்தரவிட்டிருக்கிறதா என்று கேள்விகளை அவர் எழுப்பினார். இதற்கு நிதி அமைச்சகத்தின் தரப்பில் பதில் அளிக்கப்பட்டது. மத்திய நிதித்துறை இணையமைச்சர் பங்கஜ் சௌத்ரி கூறுகையில், ``இந்திய ரிசர்வ் வங்கி புதிய 2000 ரூபாய் நோட்டுகளை 2016-ல் வெளியிட்டது. மேலும், 2000 ரூபாய் நோட்டுகளை விநியோகிக்க வேண்டாம் என வங்கிகளுக்கு அரசுத் தரப்பிலிருந்து எந்த அறிவுறுத்தல்களும் வழங்கப்படவில்லை" என்றார். நாட்டில் 2000 ரூபாய் நோட்டு புழக்கம் மிகவும் குறைந்து விட்ட நிலையில், 2000 நோட்டு இன்னும் அச்சிடப்படுகிறதா என்ற கேள்வி அவ்வப்போது எழுந்து வந்தது.
மேலும் படிக்க - காங்கிரஸின் தேர்தல் வாக்குறுதிகளை நிறைவேற்ற ஆண்டுக்கு ₹62000 கோடி தேவை!
சார்பில்லாத சமரசமில்லாத செய்திகள் உங்கள் உள்ளங்கைகளில்!
உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்.
முகநூலில் @ZEETamilNews, ட்விட்டரில் @ZeeTamilNews மற்றும் டெலிக்ராமில் https://t.me/ZeeTamilNews என்ற பக்கத்தை லைக் செய்யவும்.
கல்வி, பொழுதுபோக்கு, அரசியல், விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!
Android Link: https://bit.ly/3AIMb22
Apple Link: https://apple.co/3yEataJ
