രണ്ട് കേസുകൾ, രണ്ട് കാലഘട്ടം, ആയിരം ആശയങ്ങൾ, ഒരു കോടതി മുറി. 2 മണിക്കൂർ 20 മിനുറ്റിൽ എബ്രിഡ് ഷൈൻ പറഞ്ഞ് വയ്ക്കുന്നത് നൂറായിരം കാര്യങ്ങളാണ്. തീയേറ്ററിൽ നിന്ന് പുറത്തേക്ക് ഇറങ്ങുമ്പോൾ പല ആശയങ്ങൾ ഒരു ബാഡ്‌മിന്റൺ മത്സരം പോലെ അങ്ങോട്ടും ഇങ്ങോട്ടും തട്ടി തട്ടി കളിക്കും. തികച്ചും പുതുമയുള്ള ആശയം അത് മലയാളി പ്രേക്ഷകർക്ക് മാത്രമല്ല ഏത് പ്രേക്ഷകനും ഒരു ഫ്രഷ്‌നെസ് നൽകുന്ന ഒരു ഡീപ്പ് സ്ക്രിപ്റ്റാണ് മഹാവീര്യർ.
ഫാന്റസി എന്നാൽ കുട്ടികൾക്ക് വേണ്ടി മാത്രമുള്ള ചിത്രം എന്ന് അറിഞ്ഞോ അറിയാതെയോ ഒരു വ്യാഖ്യാനം നമുക്ക് ചുറ്റുമുണ്ട്. അതിനെ പൊളിച്ചെഴുതിക്കൊണ്ടാണ് മഹാവീര്യർ 2022ൽ എത്തുന്നത്. ഗൗരവകരമായ വിഷയങ്ങൾ പല തലങ്ങളിലൂടെ പറഞ്ഞ് പോകുന്നുണ്ട് ചിത്രം. കോടതി മുറിയിലെ രണ്ട് കേസുകൾ ഒരു നാൾ മുതൽ മറ്റൊരു നാൾ വരെയുള്ള മനുഷ്യന്റെ മാറ്റങ്ങൾ, സ്വഭാവങ്ങൾ എല്ലാം വരച്ചുകാണിക്കാൻ ശ്രമിക്കുന്നുണ്ട്. അതിൽ പൂർണമായും വിജയിക്കുകയും ചെയ്‌തിട്ടുണ്ട്‌. മഹാവീര്യർ എന്ന ചിത്രം കണ്ട് കഴിയുമ്പോൾ 2 സിനിമകൾ കണ്ടിറങ്ങിയ ഒരു അനുഭവം പ്രേക്ഷകന് ലഭിക്കുന്നുണ്ട്. ആദ്യ പകുതിയിൽ നിറഞ്ഞാടുന്ന നിവിൻ പോളിയും, മല്ലിക സുകുമാരനും, സുധീർ കരമനയും, കലാഭവൻ പ്രജോദും പെട്ടെന്ന് അവസാനിക്കുന്ന തരത്തിൽ വന്ന ഇടവേള പ്രേക്ഷകന്റെ രസത്തെ ബാധിച്ചു.
നല്ല രസകരമായി പോകുന്ന ആദ്യ പകുതി സഡൻ ബ്രേക്ക് ഇട്ടതുപോലെ നിന്നത് വലിയ വിഭാഗം പ്രേക്ഷകരെ ഞെട്ടിപ്പിച്ചു. തമാശയിലൂടെ കടന്ന് പോകുന്ന ആദ്യ പകുതി പല മുഹൂർത്തങ്ങളിലൂടെ പ്രേക്ഷകനെ ഒന്ന് ചിരിപ്പിക്കുന്നുണ്ട്. രണ്ടാം പകുതീയിൽ സാധാരണക്കാരായ ജനങ്ങൾ ഇപ്പോഴും അനുഭവിക്കുന്ന പല നിഷേധങ്ങൾ ബുദ്ധിപൂർവമായി രാജഭരണകാലവുമായി ബന്ധപ്പെടുത്തി സംസാരിക്കുന്നുണ്ട്.ഇഷാൻ ഛബ്രയുടെ മ്യൂസിക്ക് സിനിമയുടെ നെടുംതൂണായി മാറുന്നുണ്ട്. പ്രകടനമികവുകൊണ്ട് ലാലും ലാലു അലക്‌സും നായിക ഷാൻവിയും പ്രേക്ഷകർക്കിടയിൽ നല്ല അഭിപ്രായങ്ങൾ നേടുന്നുണ്ട്.
ഒരുപാട് വിഷയങ്ങൾ ഇന്നത്തെ സമൂഹം ചർച്ച ചെയ്യേണ്ട കാര്യങ്ങൾ ഒരു കാലഘട്ടത്തിൽ അതിമനോഹരമായി പ്ലേസ് ചെയ്‌ത്‌ ബുദ്ധിപൂർവമായ നെയ്തെടുത്ത സിനിമയാണ് മഹാവീര്യർ. മലയാള സിനിമ പ്രേക്ഷകരെ സംബന്ധിച്ചിടത്തോളം 100% പുതിയൊരു തിയേറ്റർ അനുഭവം സമ്മാനിക്കുമെന്ന് തീർച്ച. സിനിമയുടെ നായകൻ നിവിൻ പോളിയോ ആസിഫ് അലിയോ അല്ല.. സംവിധായകനും തിരക്കഥാകൃത്തുമായ എബ്രിഡ് ഷൈനാണ്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
