Thiruvananthapuram : കെ സുധാകരൻ (K Sudhakaran) ഇന്ന് രാവിലെ കെപിസിസി അധ്യക്ഷനായി (KPCC President) ചുമതലയേൽക്കും. ചുമതലയേറ്റെടുക്കുന്ന ചടങ്ങ് രാവിലെ 11 മണിക്കും 11 30 നും ഇടയ്ക്കാണ് സംഘടിപ്പിക്കുന്നത്. ചടങ്ങിന് മുമ്പായി കണ്ണൂർ എംപി കൂടിയായ കെ സുധാകരൻ തിരുവനന്തപുരത്ത് ഗാന്ധി പ്രതിമയിലും പാളയത്തെ രക്തസാക്ഷി മണ്ഡപത്തിലും ഹാരം സമർപ്പിച്ച ശേഷമാണ് ചടങ്ങിൽ പങ്കെടുക്കുക.
തിരുവനന്തപുരത്ത് കെപിസിസി (KPCC) ആസ്ഥാനമായ ശാസ്തമംഗലത്തെ ഇന്ദിരഭവനിൽ എത്തിയാണ് കെ സുധാകരൻ ചുമതലയേൽക്കുന്നത്. ഇതിന് ശേഷം അദ്ദേഹത്തിൻറെ ആമുഖ പ്രസംഗവും ഉണ്ടാകും. കെ സുധാകരന്റെ നിയമനത്തെ തുടർന്ന് പാർട്ടിക്കുള്ളിൽ തന്നെ നിരവധി അഭിപ്രായ വ്യത്യാസങ്ങൾ നിലനിൽക്കുന്നുണ്ട്.
കേരളത്തിലെ തിരഞ്ഞെടുപ്പ് (Kerala Election) തോൽവിക്ക് പിന്നാലെ ഉടലെടുത്ത പ്രശ്നമാണ് പാർട്ടിക്കുള്ളിൽ തലമുറക്കൈമാറ്റം വേണമെന്ന ആവശ്യം ഉയർന്ന് വന്നത്. തിരഞ്ഞെടുപ്പ് തോൽവിയെ കുറിച്ച് പഠിക്കാൻ എഐസിസി നിർദേശിച്ച അശോക് ചൗഹാൻ സമിതിയുടെ റിപ്പോർട്ടിന് പിന്നാലെ ഹൈക്കാമൻഡ് ഐക്യകണ്ഠേന സുധാകരന്റെ പേര് നിർദേശിക്കുകയായിരുന്നു.
ഇതിന് മുന്നോടിയായി എഐസിസി (AICC) ജനറൽ സെക്രട്ടറിയായി താരിഖ് അൻവർ സംസ്ഥാന നേതാക്കളുമായി നേരിട്ടും അല്ലാതെയും കൂടിക്കാഴ്ച നടത്തി. സംസ്ഥാനത്ത് നിന്നുള്ള എംപിമാരുടെയും എംഎൽഎമാരുടെയും കെപിസിസി കമ്മിറ്റിയിലെ അംഗങ്ങളുടെയും അഭിപ്രായം താരിഖ് അൻവർ ചോദിച്ചു അറിഞ്ഞിരുന്നു. ബഹുഭൂരിപക്ഷം പേരും കെ.സുധാകരന്റെ പേരാണ് നിർദേശിച്ചതെന്ന് താരിഖ് അൻവർ പറഞ്ഞിരുന്നു.
എന്നാൽ മുതിർന്ന് നേതാക്കളായ ഉമ്മൻ ചാണ്ടിയും രമേശ് ചെന്നിത്തലയും മുല്ലപ്പള്ളി രാമചന്ദ്രനും ആരുടെയും പേര് കെപിസിസി അധ്യക്ഷനായി നിർദേശിച്ചിരുന്നില്ല എന്നാണ് പുറത്ത് വന്ന റിപ്പോർട്ട്. അതിനിടയിൽ കെപിസിസി അധ്യക്ഷന്റെ പദവിയിലേക്ക് സുധാകരനെ കൂടാതെ മാവേലിക്കര എംപി കൊടിക്കുന്നിൽ സുരേഷും പരിഗണ പട്ടികയിൽ ഉണ്ടായിരുന്നുവെന്നും റിപ്പോർട്ടുകൾ ഉണ്ട്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
