ತಿರುಪತಿಗೆ ತೆರಳುವ ಭಕ್ತಾದಿಗಳಿಗೆ ಗುಡ್ ನ್ಯೂಸ್

ತಿರುಮಲ, ಆಂಧ್ರಪ್ರದೇಶ: ತಿರುಪತಿ ತಿಮ್ಮಪ್ಪನ ದರ್ಶನ ಸಿಗುವುದು ಒಂದು ಆನಂದದ ಕ್ಷಣವಾದರೆ, ತಿರುಪತಿಯಲ್ಲಿ ಸಿಗುವ ಪ್ರಸಾದ ಲಡ್ಡೂ ಇನ್ನೊಂದು ರೀತಿಯ ಆನಂದ ತರುತ್ತದೆ. ತಿರುಪತಿ ಲಡ್ಡು ಹೆಸರೇಳಿದರೆ ಸಾಕು ಹಲವರ ಬಾಯಲ್ಲಿ ನೀರೂರುತ್ತದೆ. ತಿರುಪತಿಯಲ್ಲಿ ವೆಂಕಟೇಶ್ವರ ದರ್ಶನದ ನಂತರ ಭಕ್ತರಿಗೆ ತಿರುಮಲದ ಲಡ್ಡೂ ಪ್ರಸಾದವನ್ನು ನೀಡಲಾಗುತ್ತದೆ. ಆದರೆ, ಒಬ್ಬರಿಗೆ ಇಷ್ಟು ಎಂದು ಪ್ರಸಾದ ನೀಡಲಾಗುತ್ತದೆ. ಸಾಮಾನ್ಯವಾಗಿ ತಿರುಪತಿ ಲಡ್ಡುಗೆ ಹೆಚ್ಚಿನ ಬೇಡಿಕೆ ಇರುವುದರಿಂದ ಹೆಚ್ಚಿನ ಹಣ ನೀಡಿಯಾದರೂ ಭಕ್ತಾದಿಗಳು ಲಡ್ಡು ಖರೀದಿಸುತ್ತಾರೆ. ಇದನ್ನು ಮನಗಂಡಿರುವ ತಿರುಮಲ ತಿರುಪತಿ ದೇವಸ್ತಾನಂ (ಟಿಟಿಡಿ) ಜನವರಿ 20 ರಿಂದ ಪ್ರತಿ ಭಕ್ತನಿಗೆ 175 ಗ್ರಾಂ ತೂಕದ ಒಂದು ಉಚಿತ ಲಡ್ಡು ನೀಡಲು ಮುಂದಾಗಿದೆ. ಅವರು ಭಗವಂತನ ದರ್ಶನ ಪಡೆದು ಮುಖ್ಯ ದೇವಾಲಯದಿಂದ ಹೊರಬರುವ ವೇಳೆ ಇದು ಲಭ್ಯವಾಗಲಿದೆ.

ಗಮನಾರ್ಹವಾಗಿ ಈ ಮೊದಲು ಪ್ರತಿ ಭಕ್ತರಿಗೆ ಕೇವಲ 40 ಗ್ರಾಂ ತೂಕದ ಲಡ್ಡೂವನ್ನು ಉಚಿತವಾಗಿ ನೀಡಲಾಗಿದ್ದರೆ, ತಿರುಪತಿಯಿಂದ ತಿರುಮಲಕ್ಕೆ ಕಾಲ್ನಡಿಗೆಯಲ್ಲಿ ಬರುವ ಭಕ್ತರಿಗೆ ಮಾತ್ರ 175 ಗ್ರಾಂ ಲಡ್ಡೂವನ್ನು ಉಚಿತವಾಗಿ ನೀಡಲಾಗುತ್ತಿತ್ತು. ಇದೀಗ ಉಚಿತ ಅಥವಾ ವಿ.ಐ.ಪಿ ದ್ವಾರ ಸೇರಿದಂತೆ ಪ್ರತಿ ಭಕ್ತರಿಗೂ ಒಂದು 175 ಗ್ರಾಂ ಲಡ್ಡೂ ಅನ್ನು ಉಚಿತವಾಗಿ ನೀಡಲು ಟಿಟಿಡಿ ನಿರ್ಧರಿಸಿದೆ.

ಅಲ್ಲದೆ, ದಲ್ಲಾಳಿಗಳಿಂದ ಲಡ್ಡೂಗಳ ಮಾರಾಟವನ್ನು ತಡೆಯಲು, ಟಿಟಿಡಿ ಪ್ರತಿ ಹೆಚ್ಚುವರಿ ಲಡ್ಡೂಗಳಿಗೆ ತಲಾ 50 ರೂ.ಗೆ ಮಾರಾಟ ಮಾಡಲಿದೆ. ಬೇಡಿಕೆಯನ್ನು ಪೂರೈಸಲು ಲಡ್ಡೂ ಕೌಂಟರ್‌ಗಳನ್ನು ಸಹ ಹೆಚ್ಚಿಸಲಾಗುತ್ತಿದೆ. ಪ್ರಸ್ತುತ ನಾಲ್ಕು ಕೌಂಟರ್‌ಗಳಿವೆ, ಅದು ಹೆಚ್ಚುವರಿ ಲಡ್ಡೂಗಳನ್ನು ಮಾರಾಟ ಮಾಡುತ್ತದೆ. ಈಗ ಇನ್ನೂ ಎಂಟು ಕೌಂಟರ್‌ಗಳನ್ನು ಹೆಚ್ಚುವರಿಯಾಗಿ ತೆರೆಯಲಾಗುತ್ತಿದ್ದು, ಒಟ್ಟು 12 ಕೌಂಟರ್ ತೆರೆಯಲು ಯೋಜಿಸಲಾಗಿದೆ.

"ತಿರುಪತಿಯ ಲಡ್ಡೂಗಳಿಗೆ ಭಕ್ತರ ಹೆಚ್ಚು ಬೇಡಿಕೆಯಿರುವುದರಿಂದ, ನಾವು ಹೆಚ್ಚುವರಿ ಲಡ್ಡೂಗಳ ಮಾರಾಟಕ್ಕಾಗಿ ಕೌಂಟರ್‌ಗಳನ್ನು ಹೆಚ್ಚಿಸುತ್ತಿದ್ದೇವೆ ಮತ್ತು ಪ್ರತಿ ಲಡ್ಡೂ ದರವನ್ನು 50 ರೂ. ಅನೇಕ ಭಕ್ತರು ಹೆಚ್ಚುವರಿ ಲಡ್ಡೂಗಳನ್ನು ಸಂಬಂಧಿಕರು, ಕುಟುಂಬ ಅಥವಾ ಸ್ನೇಹಿತರಿಗೆ ನೀಡಲು ಮನೆಗೆ ಕೊಂಡೊಯ್ಯಲು ಬಯಸುತ್ತಾರೆ, ಆದ್ದರಿಂದ ನಾವು ಈ ಸೌಲಭ್ಯವನ್ನು ತೆರೆದಿದ್ದೇವೆ" ಎಂದು ಟಿಟಿಡಿಯ ಹೆಚ್ಚುವರಿ ಕಾರ್ಯನಿರ್ವಾಹಕ ಅಧಿಕಾರಿ ಧರ್ಮ ರೆಡ್ಡಿ ತಿಳಿಸಿದ್ದಾರೆ.

ಪ್ರತಿದಿನ ಸರಾಸರಿ 60,000 ರಿಂದ 70,000 ಯಾತ್ರಾರ್ಥಿಗಳು ಮತ್ತು ಶನಿವಾರ ಮತ್ತು ಭಾನುವಾರ ಸುಮಾರು ಒಂದು ಲಕ್ಷ ಯಾತ್ರಾರ್ಥಿಗಳು ತಿರುಮಲ ಭಗವಾನ್ ವೆಂಕಟೇಶ್ವರರ ದರ್ಶನ ಪಡೆಯುತ್ತಾರೆ. ಈ ಹಿಂದೆ ನೀಡಲಾದ ಸಬ್ಸಿಡಿಗಳ ಕಾರಣದಿಂದಾಗಿ, ಟಿಟಿಡಿ ಲಡ್ಡೂ ಮಾರಾಟದಲ್ಲಿ ಪ್ರತಿವರ್ಷ ಸುಮಾರು 250 ಕೋಟಿ ರೂ. ವ್ಯಯಿಸುತ್ತಿತ್ತು. ಈಗ ಹೊಸ ಕ್ರಮವು ಸುಮಾರು 100 ಕೋಟಿ ರೂ. ನಷ್ಟವನ್ನು ಕಡಿಮೆ ಮಾಡುತ್ತದೆ ಎಂದವರು ವಿವರಿಸಿದರು.

ಆದಾಗ್ಯೂ, ಈ ವಿಷಯದ ಬಗ್ಗೆ ಭಕ್ತರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. "ನಾನು ಬಡವ. ಈ ಮೊದಲು, ನಾನು ದೇವರ ದರ್ಶನಕ್ಕಾಗಿ ಕಾಲ್ನಡಿಗೆಯಲ್ಲಿ ಹೋಗುತ್ತಿದ್ದಂತೆ 175 ಗ್ರಾಂ ಲಡ್ಡೂವನ್ನು ಉಚಿತವಾಗಿ ಪಡೆಯುತ್ತಿದ್ದೆ ಮತ್ತು ನಾನು ಹೆಚ್ಚುವರಿ ಬಯಸಿದರೆ ನಾನು ಎರಡು ಲಡ್ಡೂಗಳಿಗೆ 20 ರೂ. ನೀಡುತ್ತಿದ್ದೆ ಮತ್ತು ನಂತರ ಬೇಕಿದ್ದರೆ ಎರಡು ಲಡ್ಡೂಗಳಿಗೆ 50 ರೂ. ಇದಕ್ಕೆ ಸಬ್ಸಿಡಿ ದರವಿರುತ್ತಿತ್ತು. ಹಾಗಾಗಿ ನಾಲ್ಕು ಹೆಚ್ಚುವರಿ ಲಡ್ಡೂಗಳಿಗೆ ನಾನು ಈ ಮೊದಲು 70 ರೂ. ನೀಡುತ್ತಿದ್ದೆ. ಈಗ ಪ್ರತಿ ಹೆಚ್ಚುವರಿ ಲಡ್ಡೂ ನನಗೆ 50 ರೂ. ವೆಚ್ಚವಾಗುತ್ತದೆ ಆದ್ದರಿಂದ ನಾನು ನಾಲ್ಕು ಲಡ್ಡೂಗಳನ್ನು ಖರೀದಿಸಿದರೆ ನನಗೆ 200 ರೂ. ವೆಚ್ಚವಾಗುತ್ತದೆ'' ಎಂದು ಭಕ್ತರಾದ ಶ್ರೀರಾಮುಲು ತಿಳಿಸಿದ್ದಾರೆ.

ಮತ್ತೊಂದೆಡೆ, ಹೊಸ ವ್ಯವಸ್ಥೆಯು ಭಕ್ತಾದಿಗಳಿಗೆ ಅನುಕೂಲವಾಗಲಿದೆ. "ನಾವು ದೇವರ ದರ್ಶನಕ್ಕೆ ಬಂದಿದ್ದೇವೆ. ನಮ್ಮ ಕುಟುಂಬ ಸದಸ್ಯರಲ್ಲಿ ಪ್ರತಿಯೊಬ್ಬರಿಗೂ 175 ಗ್ರಾಂ ಒಂದು ಲಡ್ಡೂ ಸಿಗುತ್ತದೆ, ಅದು ನಮ್ಮೆಲ್ಲರಿಗೂ ಸಾಕಾಗುತ್ತದೆ. ಒಂದೊಮ್ಮೆ ನಾವು ಹೆಚ್ಚುವರಿಯಾಗಿ ಬಯಸಿದರೆ ನಾವು ಲಡ್ಡೂಗೆ ತಲಾ 50 ರೂ. ನೀಡಲು ಸಮಸ್ಯೆಯಲ್ಲ, '' ಎಂದು ಮುಂಬೈನ ಭಕ್ತ ಜೆ.ಮೆನನ್ ಹೇಳುತ್ತಾರೆ.