Gujarat Election 2022: ନିର୍ବାଚନ ପୂର୍ବରୁ ଦଳର ବିଦ୍ରୋହୀ ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କଲା ବିଜେପି

Gujarat Assembly Election 2022: ଚଳିତ ବର୍ଷ ଅନୁଷ୍ଠିତ ହେଉଥିବା ଗୁଜୁରାଟ ବିଧାନସଭା ନିର୍ବାଚନ ପାଇଁ ବିଭିନ୍ନ ଦଳ ପକ୍ଷରୁ ଜାରି ରହିଛି ପ୍ରସ୍ତୁତି। ନିର୍ବାଚନ ପ୍ରଚାରକୁ ଜୋରଦାର କରିବା ସହ ବିଭିନ୍ନ ଆସନ ଲାଗି ପ୍ରାର୍ଥୀ ଘୋଷଣା କରିଛନ୍ତି ବିଭିନ୍ନ। ଦଳୀୟ ଟିକେଟ ପାଇବାରୁ ବଞ୍ଚିତ ହୋଇଥିବା ବିଭିନ୍ନ ଦଳର ନେତା ଏବେ ବିଦ୍ରୋହୀ ଭୂମିକାରେ ଅବତୀର୍ଣ୍ଣ ହୋଇଛନ୍ତି। ଏହି କ୍ରମରେ ବିଜେପି ଦଳର ୧୨ ଜଣ ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି। 

ଚଳିତ ବର୍ଷ ଅନୁଷ୍ଠିତ ହେଉଥିବା ଗୁଜୁରାଟ ବିଧାନସଭା ନିର୍ବାଚନକୁ ଅତି ଗମ୍ଭୀରତାର ସହ ନେଇଛି ବିଜେପି। ଏହି କ୍ରମରେ ଦଳ ନିର୍ବାଚନ ପୂର୍ବରୁ ବିଦ୍ରୋହୀ ଭୂମିକାରେ ଅବତୀର୍ଣ୍ଣ ହୋଇଥିବା ଦଳୀୟ ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ  କରିଛି। ବିଜେପି ଏହାର ୬ ଥରର ବିଧାୟକ ମଧୁ ଶ୍ରୀବାସ୍ତବ ଏବଂ ଅନ୍ୟ ୨ ଜଣ ପୂର୍ବତନ ବିଧାୟକଙ୍କ ସମେତ ଅନ୍ୟ ୧୨ ଜଣ ଦଳୀୟ ନେତାଙ୍କୁ ଦଳରୁ ନିଲମ୍ବିତ କରିଛି। ଦଳରୁ ନିଲମ୍ବିତ ହୋଇଥିବା ବିଜେପି ନେତାଙ୍କୁ ଚଳିତ ବର୍ଷ ଅନୁଷ୍ଠିତ ହୋଇଥିବା ବିଧାନସଭା ନିର୍ବାଚନରେ ​​ଟିକେଟ୍ ନ ମିଳିବା ପରେ ସ୍ୱାଧୀନ ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଥିଲେ।

ଆସନ୍ତା ଡିସେମ୍ବରରେ ଅନୁଷ୍ଠିତ ହେଉଥିବା ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟରେ ସ୍ୱାଧୀନ ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଥିବା ୭ ଜଣ ବିଜେପି ନେତାଙ୍କୁ ଦଳରୁ ନିଲମ୍ବିତ କରିବାର କିଛି ଦିନ ପରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏନେଇ ବିଜେପି ଗୁଜୁରାଟ ଶାଖା ପକ୍ଷରୁ ଜାରି ହୋଇଥିବା ବିଜ୍ଞପ୍ତିରେ କୁହାଯାଇଛି ଯେ ଡିସେମ୍ବର ୫ ତାରିଖରେ ହେବାକୁ ଥିବା ଦ୍ୱିତୀୟ ପର୍ଯ୍ୟାୟ ବିଧାନସଭା ନିର୍ବାଚନରେ ଦଳୀୟ ପ୍ରାର୍ଥୀଙ୍କ ବିରୋଧରେ ପ୍ରତିଦ୍ୱନ୍ଦ୍ୱିତା କରୁଥିବା ଆଉ ୧୨ ଜଣ ନେତାଙ୍କୁ ଗୁଜୁରାଟ ବିଜେପି ସଭାପତି ସିଆର ପାଟିଲ ଦଳରୁ ନିଲମ୍ବିତ କରିଛନ୍ତି।

ଚଳିତ ବର୍ଷ ଅନୁଷ୍ଠିତ ହେଉଥିବା ଗୁଜୁରାଟ ବିଧାନସଭା ନିର୍ବାଚନ (Gujarat Assembly Election 2022) ଲାଗି ୨ ପର୍ଯ୍ୟାୟରେ ଅନୁଷ୍ଠିତ ହେଉଛି ମତଦାନ। ଡିସେମ୍ବର ୧ ତାରିଖ ପ୍ରଥମ ପର୍ଯ୍ୟାୟରେ ୮୯ ଏବଂ ୫ ତାରିଖ ଦ୍ୱିତୀୟ ପର୍ଯ୍ୟାୟରେ ୯୩ ଆସନ ଲାଗି ଅନୁଷ୍ଠିତ ହେବ ଭୋଟ ଗ୍ରହଣ। ଏହି ନିର୍ବାଚନରେ ​​ମୋଟ ୪.୯୧ କୋଟି ଭୋଟର ସେମାନଙ୍କ ମତାଧିକାର ସାବ୍ୟସ୍ତ କରିବେ। ଡିସେମ୍ବର ୮ ତାରିଖରେ ପ୍ରକାଶ ପାଇବ ନିର୍ବାଚନ ଫଳାଫଳ। 

ଦ୍ୱିତୀୟ ପର୍ଯ୍ୟାୟରେ ଯେଉଁ ୯୩ ଆସନରେ ମତଦାନ ଅନୁଷ୍ଠିତ ହେଉଛି, ସେହି ପର୍ଯ୍ୟାୟ ଲାଗି ନାମାଙ୍କନ ପ୍ରତ୍ୟାହାରର ଶେଷ ତାରିଖ ଥିଲା ୨୧ ନଭେମ୍ବର। ଗତ ୨୧ ତାରିଖ ସୁଦ୍ଧା କୌଣସି ବିଦ୍ରୋହୀ ବିଜେପି ନେତା ସେମାନଙ୍କ ନାମାଙ୍କନ ପ୍ରତ୍ୟାହାର କରିନଥିଲେ। ଯାହା ପରେ ସେମାନଙ୍କୁ ଦଳ ପକ୍ଷରୁ ଶୃଙ୍ଖଳାଗତ କାର୍ଯ୍ୟାନୁଷ୍ଠାନର ସାମ୍ନା କରିବାକୁ ପଡିଥିଲା।

ଦଳରୁ ନିଲମ୍ବିତ ହୋଇଥିବା ନେତା ଏବେ ଉତ୍ତର ଏବଂ କେନ୍ଦ୍ରୀୟ ଗୁଜୁରାଟରେ ଅବସ୍ଥିତ ୧୧ ଆସନରେ ବିଜେପି ପ୍ରାର୍ଥୀଙ୍କ ବିରୋଧରେ ପ୍ରତିଦ୍ୱନ୍ଦ୍ୱିତା କରିବେ। ଏହି ନେତାଙ୍କ ମଧ୍ୟରେ ଭଦୋଦରା ଜିଲ୍ଲାର ୱାଘୋଡିଆ ଆସନର ବର୍ତ୍ତମାନର ବିଧାୟକ ମଧୁ ଶ୍ରୀବାସ୍ତବ ଅନ୍ତର୍ଭୂକ୍ତ ଅଛନ୍ତି। ଏହା ସହିତ ବିଜେପି ଦ୍ୱାରା ଶୃଙ୍ଖଳାଗତ କାର୍ଯ୍ୟାନୁଷ୍ଠାନର ସାମ୍ନା କରିଥିବା ୧୨ ଜଣ ନେତାଙ୍କ ମଧ୍ୟରେ ପାଡରା ଆସନର ପୂର୍ବତନ ବିଧାୟକ ଦୀନୁ ପଟେଲ ଏବଂ ୱାୟଡ ଆସନର ପୂର୍ବତନ ବିଧାୟକ ଧୱଲସିଂହ ଜାଲା ମଧ୍ୟ ସାମିଲ ଅଛନ୍ତି। ସେହିପରି ଅନ୍ୟ ନେତା ହେଉଛନ୍ତି ସାୱଲୀର ଆସନର କୁଲଦୀପସିଂହ ରାଉଲ, ଶେହରା ଆସନର ଖାଟୁଭାଇ ପାଗି, ଲୁନାୱାଡା ଆସନର ଏସ୍.ଏମ୍ ଖାଣ୍ଟ ଏବଂ ଜେପି ପଟେଲ, ଅମରେଠ ଆସନର ରମେଶ ଜାଲା, ଖମ୍ଭାତ ଆସନର ଅମରଶି ଜାଲା, ଖେରଲୁ ଆସନର ରାମସିଂହ ଠାକୁର, ଧନେରା ଆସନରୁ ମାବଜୀ ଦେଶାଇ ଏବଂ ଡୀସା ଆସନରୁ ଲେବଜୀ ଠାକୋର।