ઓલ ઈંગ્લેન્ડ ચેમ્પિયનશિપઃ સાઇના અને શ્રીકાંત ક્વાર્ટર ફાઇનલમાં, સાઈ પ્રણીત બહાર

બર્મિંઘમઃ ઓલ ઈંગ્લેન્ડ બેડમિન્ટન ચેમ્પિયનશિપમાં ભારતની સાઇના નેહવાલ અને કિદાંબી શ્રીકાંતે ક્વાર્ટર ફાઇનલમાં જગ્યા બનાવી લીધી છે. સાઇનાએ ડેનમાર્કની જર્સફેલ્ટને 8-21, 21-16, 21-13થી પરાજય આપ્યો હતો. આ મેચ 51 મિનિટ સુધી ચાલી હતી. સાઇનાએ સતત ત્રીજીવાર જર્સફેલ્ટની વિરુદ્ધ જીત હાસિલ કરી છે. સાઇના 9મી વખત ટૂર્નામેન્ટના અંતિમ-8માં જગ્યા બનાવવામાં સફળ રહી છે. સાઇના હવે ક્વાર્ટર ફાઇનલમાં નંબર-1 તાઇવાનની જાઈ ઝૂ યિંગ સામે ટકરાઈ શકે છે. 

અશ્વિની પોનપ્પા-એન સિક્કી રેડ્ડીની જોડી પણ હારી
કિબાંદી શ્રીકાંતે ઈન્ડોનેશિયાના જોનાથન ક્રિસ્ટીને 21-17, 11-21, 21-12થી હરાવ્યો હતો. શ્રીકાંત પ્રથમવાર ક્વાર્ટર ફાઇનલમાં રમશે. તે હવે નંબર-1 જાપાનના કેન્તો મોમોતા સામે ટકરાશે. 

અન્ય પુરૂષ સિંગલ્સ મેચમાં બી સાઈ પ્રણીત પોતાનો મેચ હારીને ટૂર્નામેન્ટમાંથી બહાર થઈ ગયો છે. પ્રણીતને હોંગકોંગના એનજી કા લોંગ એંગસે 21-12, 21-17થી પરાજય આપ્યો હતો. 

મહિલા ડબલ્સમાં ભારતની અશ્વિની પોનપ્પા-એન સિક્કી રેડ્ડીની જોડી જાપાનની શિહો તનાકા-કોહારૂ યોનોમોતીની જોડી સામે 21-16, 26-28, 16-21થી હારી ગઈ હતી. 

આ પહેલા સાઇનાએ મહિલા સિંગલ્સના પ્રથમ રાઉન્ડમાં સ્કોટલેન્ડની ક્રિસ્ટી ગિલમોઉરને 21-17, 21-18થી હરાવીને પ્રી-ક્વાર્ટર ફાઇનલમાં જગ્યા બનાવી હતી.