યૌન શોષણના સાક્ષીની હત્યા કરનાર આસારામ સાથે જોડાયેલા શૂટરને રાજકોટ પોલીસે ઝડપ્યો, વધી શકે છે બાપુની મુશ્કેલી

રાજકોટઃ યૌન શોષણના કેસમાં આજીવન કેદની સજા ભોગવી રહેલા આસારામ બાપુને ફરી એકવાર મુશ્કેલીનો સામનો કરવો પડી શકે છે. એક તરફ જોધપુર કેસમાં સુપ્રીમ કોર્ટે આસારામ બાપુને 31 માર્ચ સુધી વચગાળાના જામીન આપ્યા છે, તો બીજી તરફ ગુજરાતની રાજકોટ પોલીસની ક્રાઈમ બ્રાંચે આસારામ સાથે જોડાયેલા યૌન શોષણના સાક્ષીની હત્યાના આરોપી કેશવની કર્ણાટકમાંથી ધરપકડ કરી છે. એવું માનવામાં આવે છે કે આસારામના પૂર્વ સાધક અને શાર્પ શૂટર કેશવે 10 વર્ષ પહેલા અમૃત પ્રજાપતિ નામના સાક્ષીની હત્યા કરી હતી. સુત્રોના જણાવ્યા તે બીજા સાક્ષીની હત્યાની ફિરાકમાં હતો ત્યારે રાજકોટ ક્રાઈમ બ્રાન્ચે તેને ઝડપી લીધો છે.

દર્દી બની પહોંચ્યો હતો હુમલાખોર
આસારામ બાપુના પૂર્વ સહયોગી અને યૌન શોષણ કેસમાં સાક્ષી અમૃત પ્રજાપતિ પર 23 મેએ રાજકોટની આયુર્વેદિક હોસ્પિટલમાં ફાયરિંગ કરવામાં આવ્યું હતું. બાદમાં અમૃત પ્રજાપતિનું હોસ્પિટલમાં મોત થઈ ગયું હતું. સાક્ષી પર હોસ્પિટલમાં દર્દી રૂપે આવેલ અજાણ્યા બંદૂકધારીએ પ્રજાપતિને ગોળી મારી હતી. અમૃત પ્રજાપતિએ મરતા પહેલા પોલીસને નિવેદન આપ્યું હતું જેમાં હુમલો કરનારમાં આસારામના છ સાધકોના નામ લીધા હતા. તેમાં વિકાસ ખેમકા, કેડી પટેલ, અજય શાહ, મેઘજી, કૌશિક અને રામભાઈના નામ સામેલ હતા. અમૃત પ્રજાપતિની હત્યા બાદ આ કેસની તપાસ સીઆઈડી ક્રાઈમ પાસે છે. પોલીસ અનુસાર પ્રજાપતિ હત્યા કેસમાં સામેલ કેશવ કર્ણાટકના એક ગામમાં છુપાયેલો હતો. તે આસારામના સાધકોની સાથે સંપર્કમાં હતો. 

આ પણ વાંચોઃ HMPV ના ગુજરાતમાં અત્યાર સુધી ત્રણ કેસ, આરોગ્ય મંત્રીએ લોકોને આપી સલાહ

આસારામને મળ્યા છે વચગાળાના જામીન
સુપ્રીમ કોર્ટે છેલ્લા 11 વર્ષથી જેલમાં રહેલા આસારામ બાપુને તબીબી આધાર પર વચગાળાના જામીન મંજૂર કર્યા છે, જોકે કોર્ટે જામીન પર એવી શરત મૂકી છે કે તેઓ તેમના અનુયાયીઓને મળશે નહીં કે કોઈ સાક્ષીને પ્રભાવિત કરશે નહીં. સુપ્રીમ કોર્ટે વચગાળાના જામીનની મુદત 31 માર્ચ નક્કી કરી છે. સુપ્રીમ કોર્ટે બે વખત પેરોલ મંજૂર કર્યા બાદ આસારામ બાપુને વચગાળાના જામીન મંજૂર કર્યા છે. જો કે, ઘણા કેસમાં દોષિત ઠર્યા હોવાના કારણે તે ટેકનિકલ કારણોસર હજુ સુધી જેલમાંથી બહાર આવી શક્યો નથી.