દિવાળી ટાંણે ફટાકડાના ભાવમાં સીધો જ 30થી 40 ટકા વધારો

ગૌરવ પટેલ/અમદાવાદ :આ દિવાળીમાં વેપારીઓથી માંડીને લોકોને મંદીનો સામનો કરવો પડી રહ્યો છે. એક તરફ ગ્રાહકો વસ્તુ ખરીદીમાં નિરસતા દાખવી રહ્યા છે, તો ઓછા વેચાણને કારણે વેપારીઓ પણ ટેન્શનમાં છે. ત્યારે હાલ દિવાળી ટાંણે ગુજરાતમાં ફટાકડા બજારમાં ભારે મંદી જોવા મળી છે. તો સામે ફટાકડાના ભાવોમાં ૩૦ થી ૪૦ ટકાનો ભાવ વધારો દેખાયો છે. સુપ્રિમ કોર્ટમાં રહેલી પેન્ડિંગ પિટીશનને કારણે ફટાકડાના કારખાના છ મહિના સુધી બંધ રહેતા તેની સીધી અસર ભાવ પર પડી છે.  

વેપારીઓએ જણાવ્યું કે, ગ્રીન ફટાકડાનું રો-મટીરિયલ અને કેમિકલ મોંઘું હોવાથી ફટાકડા આ વર્ષે મોંઘા થયા છે. તો મોંઘાદાટ ફટાકડાની અસર બજાર પર પડી છે. ભાવ વધવાથી ગ્રાહકો પણ પરેશાન દેખાયા છે. તો ગ્રાહકોએ પણ ફટાકડા મોંઘા હોવાથી બજેટમાં ઘટાડો કરવો પડ્યો છે. શીવાકાશી ખાતે ૬ મહિના ફટાકડાનું પ્રોડક્શન બંધ રહેતા તેની અસર સીધી જ ભાવ પર થઈ છે.