டெபிட் கார்டு வைத்திருந்தாலே பாலிசி எண் இல்லாமல் இலவச ஆயுள் காப்பீடு இருக்கலாம். அதை கிளைம் செய்வது எப்படி? என்பதை பார்க்கலாம்
இந்தியாவில் பல வங்கிகள் தங்கள் டெபிட் கார்டு வைத்திருப்பவர்களுக்கு இலவச ஆயுள் காப்பீட்டை வழங்குகின்றன. இருப்பினும், இது சில நிபந்தனைகளுடன் வருகிறது. டெபிட் கார்டு வைத்திருப்பவர்கள் அந்த நிபந்தனைகளை பூர்த்தி செய்யவில்லை என்றால் ஆயுள் காப்பீடு பலன்கள் கிடைக்காது. அந்த நிபந்தனைகளில் ஒன்று, டெபிட் கார்டு வைத்திருப்பவர் குறிப்பிட்ட காலப்பகுதியில் குறைந்தபட்சம் ஒரு குறிப்பிட்ட வகை பரிவர்த்தனையையாவது செய்திருக்க வேண்டும்.
அப்படி செய்திருந்தால் உங்களுக்கு டெபிட் கார்டு மூலம் ஆயுள் காப்பீட்டை நீங்கள் கோர தகுதியுடையவராக இருப்பீர்கள். டெபிட் கார்டுடன் இலவச ஆயுள் காப்பீடு வழங்கும் நடைமுறை பொதுவானது. ஹெச்டிஎஃப்சி வங்கி, ஐசிஐசிஐ வங்கி, ஸ்டேட் பேங்க் ஆஃப் இந்தியா (எஸ்பிஐ), கோட்டக் மஹிந்திரா வங்கி போன்ற பல முக்கிய வங்கிகள் டெபிட் கார்டுகளில் இலவச காப்பீட்டுக் கொள்கையை வழங்குகின்றன. "டெபிட் கார்டு உபயோகத்தை உள்ளடக்கிய காப்பீட்டுக் கொள்கைகள் பொதுவாக தனிப்பட்ட விபத்து, கொள்முதல் பாதுகாப்பு, விமான விபத்து, கார்டு மோசடி போன்றவற்றுக்கு கவரேஜ் அளிக்கின்றன.
இவை குழுக் கொள்கைகள் என்பதால், கார்டு வைத்திருப்பவர்களுக்கு பாலிசி எண்கள் இல்லை. டெபிட் கார்டு வைத்திருப்பவரின் நாமினிகள், கார்டுதாரருக்கு துரதிர்ஷ்டவசமான மரணம் ஏற்பட்டால் காப்பீட்டுக் கோரிக்கையை எவ்வாறு தாக்கல் செய்யலாம் என்பது அடுத்த கேள்வியாக எழுகிறது. ஏனென்றால், பாரம்பரிய கால ஆயுள் காப்பீடு அல்லது பிற பாலிசி எண்கள் வங்கியால் வழங்கப்படுவதில்லை.
வங்கியின் விதிமுறைகள் மற்றும் நிபந்தனைகளைப் பொறுத்து, நாமினி அல்லது பாலிசிதாரரின் உரிமைகோருபவர் குறிப்பிட்ட ஆவணங்களுடன் குறிப்பிட்ட காலத்திற்குள் வங்கியை அணுக வேண்டும். சம்பவம் நடந்த 60 நாட்களுக்குள் உரிமைகோரல் தாக்கல் செய்யப்பட வேண்டும். இருப்பினும் வெவ்வேறு வங்கிகளுக்கு வெவ்வேறு விதிமுறைகள் இருக்கலாம்.
சில வங்கிகளில் இந்த ஆவணங்களை மின்னணு முறையில் சமர்ப்பிக்கும் வசதியும் உள்ளது. கார்டுதாரரின் துரதிர்ஷ்டவசமான மரணம் ஏற்பட்டால், தனிப்பட்ட விபத்துக் காப்பீட்டைப் பெற நாமினியின் உரிமைகோரல் படிவம், வாடிக்கையாளரின் இறப்புச் சான்றிதழ், குறிப்பிட்ட ஆவணங்கள் மற்றும் நாமினியின் KYC விவரங்களைச் சமர்ப்பிக்க வேண்டும்.
இந்த ஆவணங்களை வங்கிக் கிளையில் சமர்ப்பிக்கலாம். அல்லது கால் சென்டரை அழைத்து, தேவையான ஆவணங்களை மின்னஞ்சல் மூலம் சமர்ப்பிக்கலாம். அதாவது, முகவரி உட்பட நாமினியின் தொடர்பு விவரங்கள், முறையாக பூர்த்தி செய்யப்பட்ட காப்பீட்டு கோரிக்கை படிவம், அசல் இறப்பு சான்றிதழ், முழுமையான பிரேத பரிசோதனை அறிக்கை, FIR மற்றும் தேவையான ஆவணங்கள்.
பாலிசிதாரர் இறப்பு உள்ளூர் ஊடகங்களுக்குத் தெரிவிக்கப்பட்டால், அதன் செய்தித்தாள் கட்டிங்குகளையும் கொடுக்க வேண்டும். ஒருவேளை எதிர்பாராத விபத்துக்குப் பிறகு சிகிச்சை எடுத்துக் கொண்டிருக்கும் போது கார்டுதாரர் இறந்திருந்தால், மருத்துவமனையில் அனுமதிக்கப்பட்டதற்கான ஆவணங்கள் மற்றும் சேர்க்கை விவரம் கொடுக்கப்பட வேண்டும்,
இதுமட்டுமல்லாமல், மாதச் சம்பள சீட்டு, இறந்தவர் வாகனம் ஓட்டியிருந்தால், இறந்த அட்டைதாரரின் ஓட்டுநர் உரிமம் ஆகியவற்றை கொடுக்க வேண்டும். ஒருவேளை கார்டுதாரர் காப்பீட்டுக்கு நாமினி பரிந்துரைக்கப்படவில்லை என்றால், சட்டப்பூர்வ வாரிசு சான்றிதழை வங்கியில் சமர்ப்பிக்க வேண்டும். இவ்வாறு செய்வதன் மூலம் டெபிட் கார்டு வைத்திருப்பவர்களுக்கு இலவச ஆயுள் காப்பீட்டு பலன்கள் கிடைக்கும்.
