ആക്രമണവും പ്രത്യാക്രമണവുമായി റഷ്യയും യുക്രൈനും നിൽക്കുമ്പോൾ മറ്റൊരു മഹായുദ്ധത്തിനാണ് ലോകം സാക്ഷ്യം വഹിച്ച് കൊണ്ടിരിക്കുന്നത്. റഷ്യൻ പ്രസിഡന്റ് വ്ലാഡിമിർ പുതിൻ യുക്രൈനെതിരെ യുദ്ധം പ്രക്യാപിച്ചതോടെ ഭീതിയോടെയാണ് ലോകം മുഴുവൻ ഇതിനെ നിരീക്ഷിക്കുന്നത്. യുക്രൈൻ തലസ്ഥാനമായ കീവിന് സമീപം സ്ഫോടനങ്ങൾ ഉണ്ടായി. 2 യുക്രൈൻ നഗരങ്ങൾ റഷ്യം നിയന്ത്രണത്തിലാക്കി, നൂറുകണക്കിന് സേനാംഗങ്ങൾ കൊല്ലപ്പെട്ടു, അങ്ങനെ റഷ്യയുടെ ഭാഗത്ത് നിന്ന് ആക്രമണങ്ങൾ തുടരുകയാണ്.
എന്നാൽ തങ്ങളുടെ സ്വാതന്ത്ര്യം വിട്ടുകൊടുക്കില്ലെന്ന നിലപാടിൽ തിരിച്ചടിച്ച് യുക്രൈനും നിൽക്കുന്നു. പ്രത്യാക്രമണത്തിൽ റഷ്യയുടെ 6 വിമാനങ്ങള്‍ തകര്‍ത്തെന്ന് യുക്രൈൻ അവകാശപ്പെടുന്നു. 50 റഷ്യന്‍ സൈനികര്‍ കൊല്ലപ്പെട്ടതായും റിപ്പോർട്ടുകളുണ്ട്.
1991ൽ ആണ് യുക്രൈൻ മോസ്കോയിൽ നിന്ന് സ്വാതന്ത്ര്യം നേടുന്നത്. അതിന് ശേഷമുള്ള യുക്രൈന്റെ രാഷ്ട്രീയ ചരിത്രത്തിലെ പ്രധാന സംഭവങ്ങളുടെ ടൈംലൈൻ ഇങ്ങനെയാണ്...
1991: മോസ്കോയിൽ നിന്ന് തങ്ങൾക്ക് സ്വാതന്ത്ര്യം ലഭിച്ചതായി സോവിയറ്റ് റിപ്പബ്ലിക് ഓഫ് യുക്രൈൻ നേതാവ് ലിയോനിഡ് ക്രാവ്ചുക് പ്രഖ്യാപിച്ചു. അഭിപ്രായ വോട്ടെടുപ്പ് നടത്തി യുക്രൈൻകാർ സ്വാതന്ത്ര്യം ലഭിച്ചത് അംഗീകരിക്കുകയും ക്രാവ്ചുക്കിനെ പ്രസിഡന്റായി തിരഞ്ഞെടുക്കുകയും ചെയ്തു.
1994: പ്രസിഡന്റ് തിരഞ്ഞെടുപ്പിൽ ലിയോനിഡ് കുച്ച്മ ക്രാവ്ചുക്കിനെ തോൽപ്പിച്ചു.
1999: ക്രമക്കേടുകൾ നിറഞ്ഞ വോട്ടെടുപ്പിൽ കുച്ച്മ വീണ്ടും തിരഞ്ഞെടുക്കപ്പെട്ടു.
2004: റഷ്യൻ അനുകൂല സ്ഥാനാർത്ഥി വിക്ടർ യാനുകോവിച്ചിനെ പ്രസിഡന്റായി പ്രഖ്യാപിച്ചെങ്കിലും വോട്ട് ചോർച്ച പ്രതിഷേധത്തിന് കാരണമായി. ഇതാണ് ഓറഞ്ച് വിപ്ലവം എന്നറിയപ്പെട്ടിരുന്നത്. തുടർന്ന് വീണ്ടും തിരഞ്ഞെടുപ്പ് നടത്തി. അതിൽ പാശ്ചാത്യ അനുകൂല മുൻ പ്രധാനമന്ത്രി വിക്ടർ യുഷ്‌ചെങ്കോ പ്രസിഡന്റായി തിരഞ്ഞെടുക്കപ്പെട്ടു.
2005: ക്രെംലിനിൽ നിന്നും യുക്രൈനെ നാറ്റോയിലേക്കും യൂറോപ്യൻ യൂണിയനിലേക്കും എത്തിക്കുമെന്ന് വാഗ്ദാനം നൽകി കൊണ്ടാണ് യുഷ്‌ചെങ്കോ അധികാരം ഏറ്റെടുത്തത്. മുൻ എനർജി കമ്പനി ബോസ് യൂലിയ തൈമോഷെങ്കോയെ അദ്ദേഹം പ്രധാനമന്ത്രിയായി നിയമിച്ചു. എന്നാൽ പാശ്ചാത്യ അനുകൂല ക്യാമ്പിലെ പോരാട്ടത്തിന് ശേഷം അവർ പുറത്താക്കപ്പെട്ടു.
2008: ഒരിക്കൽ സഖ്യത്തിൽ ചേരുമെന്ന് നാറ്റോ യുക്രൈന് വാഗ്ദാനം നൽകി.
2010: പ്രസിഡന്റ് തിരഞ്ഞെടുപ്പിൽ യാനുകോവിച്ച് തൈമോഷെങ്കോയെ പരാജയപ്പെടുത്തി. യുക്രേനിയൻ കരിങ്കടൽ തുറമുഖത്ത് റഷ്യൻ നാവികസേനയുടെ പാട്ടം നീട്ടുന്നതിന് പകരമായി റഷ്യയും യുക്രൈനും ഗ്യാസ് വിലനിർണ്ണയ കരാർ ഉറപ്പിക്കുന്നു.
2013: യാനുകോവിച്ചിന്റെ സർക്കാർ നവംബറിൽ യൂറോപ്യൻ യൂണിയനുമായുള്ള വ്യാപാര-അസോസിയേഷൻ ചർച്ചകൾ നിർത്തിവെക്കുകയും മോസ്കോയുമായുള്ള സാമ്പത്തിക ബന്ധം പുനരുജ്ജീവിപ്പിക്കാൻ തീരുമാനിക്കുകയും ചെയ്തു. ഇത് കീവിൽ മാസങ്ങളോളം ബഹുജന റാലികൾക്ക് കാരണമായി.
2014: കീവിലെ മൈതാൻ സ്ക്വയറിന് ചുറ്റും കേന്ദ്രീകരിച്ചുള്ള പ്രതിഷേധങ്ങൾ അക്രമാസക്തമായി. നിരവധി പ്രതിഷേധക്കാരാണ് കൊല്ലപ്പെട്ടത്.
ഫെബ്രുവരിയിൽ, രാജ്യത്ത് നിന്ന് പലായനം ചെയ്ത യാനുകോവിച്ചിനെ പുറത്താക്കാൻ പാർലമെന്റ് വോട്ട് ചെയ്തു. ദിവസങ്ങൾക്കുള്ളിൽ, സായുധരായ ആളുകൾ ക്രിമിയയിലെ പാർലമെന്റ് പിടിച്ചെടുത്ത് റഷ്യൻ പതാക ഉയർത്തി. മാർച്ച് 16ന് റഷ്യൻ ഫെഡറേഷനിൽ ചേരുന്നതിന് ക്രിമിയയിൽ വലിയ പിന്തുണ പ്രകടമാക്കിയ അഭിപ്രായ വോട്ടെടുപ്പിന് ശേഷം മോസ്കോ ഈ പ്രദേശം കൂട്ടിച്ചേർക്കുന്നു.
ഏപ്രിലിൽ, ഡോൺബാസിന്റെ കിഴക്കൻ മേഖലയിലെ റഷ്യൻ അനുകൂല വിഘടനവാദികൾ സ്വാതന്ത്ര്യം പ്രഖ്യാപിച്ചു. പതിവ് വെടിനിർത്തലുകൾ ഉണ്ടായിട്ടും 2022 വരെ യുദ്ധം പൊട്ടിപ്പുറപ്പെടുകയും ഇടയ്ക്കിടെ തുടരുകയും ചെയ്തു. മേയിൽ, വ്യവസായി പെട്രോ പൊറോഷെങ്കോ പാശ്ചാത്യ അനുകൂല അജണ്ടയുമായി ഒരു പ്രസിഡന്റ് തിരഞ്ഞെടുപ്പിൽ വിജയിച്ചു.
ജൂലൈയിൽ, MH 17 എന്ന വിമാനത്തിന് നേരെ നടത്തിയ മിസൈൽ ആക്രമണത്തിൽ 298 യാത്രക്കാരാണ് കൊല്ലപ്പെട്ടത്. ആംസ്റ്റർഡാമിൽ നിന്ന് ക്വാലാലംപൂരിലേക്കുള്ള യാത്രാമധ്യേ ആക്രമണം ഉണ്ടായത്. ആക്രമണത്തിന് ഉപയോഗിച്ച ആയുധം അന്വേഷകർ റഷ്യയിൽ നിന്ന് കണ്ടെത്തി. എന്നാൽ ആക്രമണത്തിൽ പങ്കില്ലെന്ന് റഷ്യ വ്യക്തമാക്കി.
2017: യുക്രൈനും യൂറോപ്യൻ യൂണിയനും തമ്മിലുള്ള ഒരു അസോസിയേഷൻ ഉടമ്പടി പാസാക്കി. ചരക്കുകളുടെയും സേവനങ്ങളുടെയും സ്വതന്ത്ര വ്യാപാരത്തിനും യുക്രൈൻകാർക്ക് യൂറോപ്യൻ യൂണിയനിലേക്കുള്ള വിസ രഹിത യാത്രയ്ക്കും ഇത് വഴിവച്ചു.
2019: ഒരു പുതിയ യുക്രേനിയൻ ഓർത്തഡോക്സ് പള്ളി ക്രെംലിനിനെ ചൊടിപ്പിച്ചുകൊണ്ട് ഔപചാരികമായ അംഗീകാരം നേടി. മുൻ നടനും ഹാസ്യനടനുമായ വോലോഡൈമർ സെലെൻസ്കി, ഏപ്രിലിൽ നടന്ന പ്രസിഡന്റ് തിരഞ്ഞെടുപ്പിൽ പൊറോഷെങ്കോയെ പരാജയപ്പെടുത്തി. അഴിമതിയെ നേരിടുമെന്നും കിഴക്കൻ യുക്രൈനിൽ പുകഞ്ഞുകൊണ്ടിരിക്കുന്ന സംഘർഷം അവസാനിപ്പിക്കുമെന്നും വാഗ്ദാനം ചെയ്തു. അദ്ദേഹത്തിന്റെ സെർവന്റ് ഓഫ് പീപ്പിൾ പാർട്ടി ജൂലൈയിൽ നടന്ന പാർലമെന്റ് തിരഞ്ഞെടുപ്പിൽ വിജയിച്ചു.
അമേരിക്കൻ പ്രസിഡന്റ് ജോ ബൈഡനെതിരെയും അദ്ദേഹത്തിന്റെ മകനെതിരെയും അന്വേഷണം നടത്താൻ അന്നത്തെ യുഎസ് പ്രസിഡന്റ് ഡൊണാൾഡ് ട്രംപ് ജൂലൈയിൽ സെലെൻസ്‌കിയോട് ആവശ്യപ്പെട്ടുg. പക്ഷേ അതൊടുgവിൽ ഒടുവിൽ ട്രംപിനെ ഇംപീച്ച് ചെയ്യാനുള്ള വിഫലശ്രമത്തിലേക്ക് നയിക്കുന്നു.
മാർച്ച് 2020 : കോവിഡ് പ്രതിരേധത്തിനായി രാജ്യത്ത് ലോക്ക്ഡൗൺ പ്രഖ്യാപിച്ചു.
ജൂൺ 2020: കോവിഡിനെ നേരിടാൻ യുക്രൈന് ഐഎംഎഫ് 5 ബില്യൺ ഡോളർ നൽകാൻ അംഗീകരിച്ചു.
ജനുവരി 2021: യുക്രൈൻ നാറ്റോയിൽ ചേരാൻ ബൈഡനോട് സെലെൻസ്കി അഭ്യർത്ഥിക്കുന്നു
ഫെബ്രുവരി 2021: പ്രതിപക്ഷ നേതാവും യുക്രൈനിലെ ക്രെംലിനിലെ ഏറ്റവും പ്രമുഖ സഖ്യകക്ഷിയുമായ വിക്ടർ മെദ്‌വെഡ്‌ചുക്കിനെതിരെ സെലെൻസ്‌കിയുടെ സർക്കാർ ഉപരോധം ഏർപ്പെടുത്തി.
2021ൽ തന്നെ യുക്രൈൻ അതിർത്തിയിൽ റഷ്യ സൈന്യത്തെ കൂട്ടത്തോടെ വിന്യസിക്കുന്നു.
ഒക്ടോബർ 2021: റഷ്യയെ ചൊടിപ്പിച്ച് കിഴക്കൻ യുക്രൈനിൽ ആദ്യമായി ടർക്കിഷ് ബെയ്രക്തർ ടിബി2 ഡ്രോൺ ഉപയോഗിക്കുന്നു.
റഷ്യ വീണ്ടും യുക്രൈന് സമീപം സൈന്യത്തെ വിന്യസിക്കാൻ തുടങ്ങി.
ഡിസംബർ 2021: യുക്രൈനെ ആക്രമിച്ചാൽ പാശ്ചാത്യ സാമ്പത്തിക ഉപരോധം നേരിടേണ്ടി വരുമെന്ന് ബൈഡൻ റഷ്യക്ക് മുന്നറിയിപ്പ് നൽകി. കിഴക്കൻ യൂറോപ്പിലെയും യുക്രൈനിലെയും ഏത് സൈനിക പ്രവർത്തനവും നാറ്റോ ഉപേക്ഷിക്കുമെന്ന നിയമപരമായ ഉറപ്പ് ഉൾപ്പെടെ വിശദമായ സുരക്ഷാ ആവശ്യങ്ങൾ റഷ്യ അവതരിപ്പിക്കുന്നു.
ജനുവരി 2022: യുഎസ്, റഷ്യൻ നയതന്ത്രജ്ഞർ യുക്രൈനുമായുള്ള ചർച്ചകൽ പരാജയപ്പെട്ടു. യുക്രേനിയൻ സർക്കാർ വെബ്സൈറ്റുകളിൽ സൈബർ ആക്രമണം തുടങ്ങി. രാജ്യദ്രോഹ കേസിൽ കുറ്റാരോപിതരായ പൊറോഷെങ്കോ യുക്രൈനിലേക്ക് മടങ്ങുന്നു. സംയുക്ത അഭ്യാസത്തിനായി റഷ്യൻ സൈന്യം യുക്രൈന്റെ വടക്ക് ബെലാറസിൽ എത്തിത്തുടങ്ങി.
നാറ്റോ സൈന്യത്തെ സ്റ്റാൻഡ്‌ബൈയിൽ നിർത്തുകയും കൂടുതൽ കപ്പലുകളും യുദ്ധവിമാനങ്ങളും ഉപയോഗിച്ച് കിഴക്കൻ യൂറോപ്പിനെ ശക്തിപ്പെടുത്തുകയും ചെയ്യുന്നു. ചില പാശ്ചാത്യ രാജ്യങ്ങൾ കീവിൽ നിന്ന് അനിവാര്യമല്ലാത്ത എംബസി ജീവനക്കാരെ ഒഴിപ്പിക്കാൻ തുടങ്ങി. റഷ്യയുടെ പ്രധാന സുരക്ഷാ ആവശ്യങ്ങൾ അഭിസംബോധന ചെയ്തിട്ടില്ലെന്നും എന്നാൽ സംസാരിക്കാൻ മോസ്കോ തയ്യാറാണെന്നും പുതിൻ പറയുന്നു.
റഷ്യ - യുക്രൈൻ യുദ്ധം മണിക്കൂറുകൾ കഴിയുതോറും രൂക്ഷമായി കൊണ്ടിരിക്കുകയാണ്. ഖാർകിവ് പട്ടണത്തിൽ വെച്ച് റഷ്യൻ സൈനികർ സഞ്ചരിച്ചിരുന്ന 4 ടാങ്കുകൾ കത്തിച്ചുവെന്നാണ് റിപ്പോർട്ട്. അതേസമയം യുക്രൈനിന്റെ 5 സൈനികർ കൊല്ലപ്പെട്ടതായും അറിയിച്ചിട്ടുണ്ട്. റഷ്യയുമായുള്ള നയതന്ത്രബന്ധം ഇതോടെ അവസാനിപ്പിക്കുകയാണെന്ന് യുക്രൈനിയൻ പ്രസിഡന്റ് സെലെൻസ്കി പറഞ്ഞു. റഷ്യ ഭീരുക്കളെ പോലെയാണ് ആക്രമിച്ചതെന്ന് അദ്ദേഹം പറഞ്ഞു. റഷ്യയുടെ ആക്രമണം നാസിക്കാരുടെ ആക്രമണം പോലെയായിരുന്നുവെന്നും അദ്ദേഹം കൂട്ടിച്ചേർത്തു. ഒരു കാരണവശാലും യുക്രൈൻ സ്വാതന്ത്ര്യം വിട്ടുകൊടുക്കില്ലെന്നും യുക്രൈൻ പ്രസിഡന്റ് സെലെൻസ്കി പറഞ്ഞു.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
![Anand Sreebala Review: മിഷേൽ കേസ് വീണ്ടും ചർച്ചയാകുന്നു; "ആനന്ദ് ശ്രീബാലയിലൂടെ തന്റെ മകളെ കണ്ടുവെന്ന് മിഷേലിന്റെ അച്ഛൻ](https://malayalam.cdn.zeenews.com/malayalam/sites/default/files/styles/zm_175x100/public/2024/11/18/293472-anandsreebalarev.png?itok=4SbnRIGh "Anand Sreebala Review: മിഷേൽ കേസ് വീണ്ടും ചർച്ചയാകുന്നു; "ആനന്ദ് ശ്രീബാലയിലൂടെ തന്റെ മകളെ കണ്ടുവെന്ന് മിഷേലിന്റെ അച്ഛൻ")
