ചിത്രത്തിൽ ഗ്രാമീണ നായകനും നായികയുമായിട്ടാണ് കാർത്തിയും അദിതിയും എത്തുന്നത്. ഇതിൻ്റെ സ്റ്റില്ലുകളും നേരത്തെ പുറത്തു വന്നിരുന്നു.
കാർത്തി നായകനാകുന്ന ഏറ്റവും പുതിയ ചിത്രമാണ് വിരുമൻ. ചിത്രം നാളെ ഓഗസ്റ്റ് 12ന് തിയേറ്ററുകളിൽ റിലീസ് ചെയ്യും. 2ഡി എൻ്റർടെയ്ൻമെൻ്റിൻ്റെ ബാനറിൽ സൂര്യയും ജ്യോതികയുമാണ് ചിത്രം നിർമ്മിക്കുന്നത്. വൻ പ്രമോഷനാണ് കാർത്തി ചിത്രത്തിന് അണിയറക്കാർ നൽകിയത്. ഇതുവരെ ഒരു കാർത്തി ചിത്രത്തിനും ഇത്രയും പ്രചാരണം നൽകിയിട്ടില്ല. കഴിഞ്ഞ ദിവസം തിരുവനന്തപുരത്ത് കാർത്തിയും അദിതിയും പങ്കെടുത്ത പ്രചരണ പരിപാടികൾ മാധ്യമങ്ങളിലൂടെ വലിയ ശ്രദ്ധയാകർഷിച്ചിരുന്നു.
ഇപ്പോഴിത ഇരുവരുടെയും മോഡേൻ ലുക്ക് ചിത്രങ്ങൾ വൈറലാകുകയാണ്. മുത്തയ്യ രചനയും സംവിധാനവും നിർവഹിക്കുന്ന വിരുമനിൽ സംവിധായകൻ ഷങ്കറിൻ്റെ ഇളയ മകൾ, പുതുമുഖം അതിഥി ഷങ്കറാണ് നായിക. 'പരുത്തി വീരൻ ' എന്ന അരങ്ങേറ്റ ചിത്രത്തിലൂടെ തന്നെ തമിഴ് സിനിമയിൽ വേരോട്ടം നടത്തിയ കാർത്തിക്ക് ഗ്രാമീണ വേഷത്തിൽ മറ്റൊരു വഴിത്തിരിവായിരുന്നു മുത്തയ്യ സംവിധാനം ചെയ്ത ' കൊമ്പൻ '.
കൊമ്പൻ എന്ന സിനിമയ്ക്ക് ശേഷം കാർത്തിയും മുത്തയ്യയും ഒന്നിക്കുന്ന ചിത്രമാണ് ' വിരുമൻ'. ഇത് ഗ്രാമീണ പശ്ചാത്തലത്തിലുള്ള വൈകാരികമായ ആക്ഷൻ എൻ്റർടൈനറായിരിക്കുമെന്ന് അണിയറക്കാർ പറയുന്നു.
അച്ഛനും മകനും തമ്മിലുള്ള പോരാണ് ഇതിവൃത്തം. പ്രകാശ് രാജാണ് കാർത്തിയുടെ അച്ഛൻ കഥാപാത്രത്തെ അവതരിപ്പിക്കുന്നത്. ഇരുവരുടെയും കടുത്ത മത്സരാഭിനയത്തിനാണ് പ്രേക്ഷകർ സാക്ഷികളാവാനിരിക്കുന്നത്.
എസ്.കെ. ശെൽവകുമാർ ഛായഗ്രഹണവും യുവൻ ഷങ്കർരാജ സംഗീത സംവിധാനവും നിർവഹിക്കുന്നു. അനൽ അരശാണ് ചിത്രത്തിലെ സാഹസികമായ സംഘടന രംഗങ്ങൾ ഒരുക്കിയിരിക്കുന്നത്.രാജശേഖർ കർപ്പൂര സുന്ദരപാണ്ഡ്യനാണ് സഹ നിർമ്മാതാവ്. ഫോർച്യൂൺ സിനിമാസാണ് കേരളത്തിൽ നൂറിൽ പരം തിയേറ്ററുകളിൽ ' വിരുമൻ 'റീലീസ് ചെയ്യുന്നത്.
