കൊച്ചി: കൊച്ചിയിൽ വ്യാപകമായി മയക്ക് മരുന്ന് വിതരണം നടത്തുന്ന "നൈറ്റ് റൈഡേഴ്സ് ടാസ്ക് ടീം" തലവൻ പിടിയിലായി. മയക്ക് മരുന്ന് വിതരണ ശ്യംഖലയിലെ പ്രധാനി ഐ ടി വിദഗ്ധനായ ഹരികൃഷ്ണനാണ് എംഡിംഎംഎ യുമായി പിടിയിലായത്. ഹരികൃഷ്‌ണൻ ഇലക്ട്രോണിക് എഞ്ചിനിയറിംഗ് ബിടെക് ബിരുദധാരിയാണ്. എറണാകുളം എക്സൈസ് സ്പെഷ്യൽ സ്ക്വാഡിന്റെയും എറണാകുളം സിറ്റി എക്സൈസ് റേഞ്ചിന്റെയും സംയുക്ത നീക്കത്തിലാണ് പ്രതിയെ പിടികൂടിയത്.
ചേർത്തല - അരൂർ പള്ളി, കടവിൽ പറമ്പിൽ വീട്ടിൽ രാമചന്ദ്ര ബാബു മകനാണ് പിടിയിലായ ഹരികൃഷ്‌ണൻ. ഇയാളിൽ നിന്ന് 5 ഗ്രാം എംഡിഎംഎ കണ്ടെടുത്തു. ഇയാൾ സഞ്ചരിച്ച സ്കൂട്ടറും കസ്റ്റഡിയിൽ എടുത്തിട്ടുണ്ട്. നൂതന സാങ്കേതിക വിദ്യകൾ പ്രയോജനപ്പെടുത്തിയായിരുന്നു ഇയാൾ മയക്ക് മരുന്ന് ശ്യംഖല വ്യാപിപ്പിച്ചിരുന്നത്. ഏജന്റ് മുഖേന ബാംഗ്ലൂരിൽ നിന്ന് മൊത്തമായി എംഡിഎംഎ വാങ്ങിയ ശേഷം " നൈറ്റ് റൈഡേഴ്സ് ടാസ്ക് ടീം " എന്ന പ്രത്യേക ടെലിഗ്രാം ഗ്രൂപ്പ് ഉണ്ടാക്കി യുവാക്കളെ ഉപയോഗിച്ച് വിൽപ്പന നടത്തിവരുകയായിരുന്നു.
ALSO READ: Crime: പിടിയിലാവാതിരിക്കാൻ മതം മാറി,പേര് മാറ്റി; എന്നിട്ടും പൊക്കി കേരളാ പോലീസ്
മയക്ക് മരുന്നുമായി അർദ്ധരാത്രിക്ക് ശേഷം മാത്രം വില്പനയ്ക്കിറങ്ങുന്ന ഇയാൾ, ഒരിക്കൽ പോലും നേരിട്ട് വിൽപ്പന നടത്താറില്ല. എംഡിഎംഎ അടങ്ങിയ പോളിത്തീൻ പാക്കറ്റ് ടൗൺ ഭാഗങ്ങളിൽ തിരക്കൊഴിഞ്ഞ ഇട റോഡുകളിൽ സുരക്ഷിതമായ സ്ഥലത്ത് വെക്കുകയാണ് പതിവ്. തുടർന്ന് മയക്കുമരുന്ന് വെച്ചിരിക്കുന്ന സ്ഥലം വിതരണം ചെയ്യുന്നവർക്ക് ടെലിഗ്രാം വഴി ലൊക്കേഷൻ അയക്കും. ഇതിന് പ്രത്യേകം കോഡും ഉണ്ട്. "പണി ഡ്രോപ്പ് ചെയ്തിട്ടുണ്ട് " എന്നാണ് മയക്കുമരുന്ന് വെക്കുന്നയാളുടെ കോഡ്. മയക്ക് മരുന്ന് എടുത്ത ശേഷം വിതരണക്കാരൻ "ടാസ്ക് കംപ്ലീറ്റഡ്" എന്ന മറുകോഡ് കൺഫർമേഷൻ ആയി നൽകും.
ഇയാളിൽ നിന്ന് ഇത്തരത്തിൽ എംഡിഎംഎ എടുത്ത് വിതരണം ചെയ്യുന്ന ഏതാനും യുവാക്കൾ അടുത്തിടെ പിടിയിലായിയിരുന്നു. വിതരണക്കാരിൽ പലരും മയക്കുമരുന്ന് നല്കുന്നയാളെ കണ്ടിട്ടു പോലും ഇല്ല എന്നുള്ളതാണ് വാസ്തവം. വ്യത്യസ്ത ഫോൺ നമ്പറുകളും, വെവ്വേറ ടെലിഗ്രാം ഐഡികളും, വാഹനങ്ങും ഉപയോഗിച്ച് അതീവ സമർത്ഥമായാണ് ഇയാൾ മയക്ക് മരുന്ന് കൈമാറ്റം നടത്തി വന്നിരുന്നത്. ഒരു ഗ്രാം എംഡിഎംഎ വിൽപ്പന നടത്തിയാൽ വിതരണക്കാരന് ഇയാൾ 1000 രൂപ കമ്മീഷൻ നൽകിയിരുന്നു.
പ്രധാനമായും ഹോസ്റ്റലുകളിൽ താമസിച്ച് വരുന്ന യുവാക്കളെയാണ് മയക്ക് മരുന്ന് സംഘം ലക്ഷ്യം വെയ്ക്കുന്നത്. എക്സൈസ് സ്പെഷ്യൽ സ്ക്വാഡും, എറണാകുളം സിറ്റി എക്സൈസ് റേഞ്ചും സംയുക്തമായി ടൗൺ ഭാഗങ്ങളിൽ നിരീക്ഷണം ശക്തമാക്കിയതോടെയാണ് ഇയാൾ പിടിയിലായത്. വൈറ്റിലക്കടുത്ത് ചളിക്കവട്ടം കുഴുവേലി ക്ഷേത്രത്തിന് തെക്ക് ഭാഗത്തുള്ള ഇടറോഡിൽ എംഡിഎംഎ യുമായി എത്തിയിട്ടുണ്ടെന്ന് ഷാഡോ ടീം ന് വിവരം ലഭിച്ചിരുന്നു. ഇതിന്റെ അടിസ്ഥാനത്തിൽ ഇയാളെ പിൻതുടർന്ന് എത്തിയ എക്സൈസ് സംഘം ഇയാളെ വളഞ്ഞ് പിടികൂടുകയായിരുന്നു.
പിടിക്കപ്പെടുമെന്ന് ഉറപ്പായപ്പോൾ വാഹനം ഉപേക്ഷിച്ച് കടന്ന് കളയുവാൻ ശ്രമിച്ചെങ്കിലും വിജയിച്ചില്ല. അര ഗ്രാം എംഡിഎംഎ കൈവശം വയ്ക്കുന്നത് 10 വർഷം വരെ കഠിന തടവ് ലഭിക്കുന്ന കുറ്റമാണെന്നിരിക്കെ ഇയാളിൽ നിന്ന് പിടിച്ചെടുത്തത് 5 ഗ്രാം MDMA ആണ്. വെറും മൈക്രോ ഗ്രാം മാത്രം മതി മണിക്കൂറുകളോളം ഇതിന്റെ രാസലഹരി നീണ്ടു നിൽക്കാൻ. അളവ് അൽപം കൂടിയാൽ ഒരു പക്ഷേ ഉപഭോക്താവ് മരണപ്പെട്ടേക്കാം.
ഈ മയക്ക് മരുന്നിന്റെ ഉറവിടം സംബന്ധിച്ച് സമഗ്രമായ അന്വേഷണം നടത്തുമെന്ന് അധികൃതർ അറിയിച്ചു. എറണാകുളം സ്പെഷ്യൽ സ്ക്വാഡ് സർക്കിൾ ഇൻസ്പെക്ടർ എം. സജീവ് കുമാർ , അസ്സി. ഇൻസ്പെക്ടർ കെ.ആർ രാം പ്രസാദ്, പ്രിവന്റീവ് ഓഫീസർമാരായ സത്യ നാരായണൻ ഇ.എസ്, രമേശൻ കെ.കെ, സിറ്റി മെട്രോ ഷാഡോയിലെ എൻ.ഡി. ടോമി, എൻ.ജി അജിത് കുമാർ , സിവിൽ എക്സൈസ് ഓഫീസർ ജിതീഷ്, വിമൽ രാജ് എന്നിവരടങ്ങിയ സംഘമാണ് പ്രതിയെ കസ്റ്റഡിയിലെടുത്തത്. കോടതിയിൽ ഹാജരാക്കിയ പ്രതിയെ റിമാന്റ് ചെയ്തു.
ഏറ്റവും പുതിയ വാര്‍ത്തകൾക്കും വിശേഷങ്ങൾക്കുമായി സീ മലയാളം ന്യൂസ് ടെലഗ്രാം ചാനല്‍ സബ്‌സ്‌ക്രൈബ് ചെയ്യൂ. ഞങ്ങളുടെ സോഷ്യൽ മീഡിയ പേജുകൾ സബ്‌സ്‌ക്രൈബ് ചെയ്യാൻ Twitter, Facebook ലിങ്കുകളിൽ ക്ലിക്കുചെയ്യുക.
