ನವದೆಹಲಿ: ದೇಶಾದ್ಯಂತ ರೈತ ಸಂಘಟನೆಗಳು ಕನಿಷ್ಠ ಬೆಂಬಲ ಬೆಲೆಗೆ ಆಗ್ರಹಿಸಿ ಸತ್ಯಾಗ್ರಹವನ್ನು ಹಮ್ಮಿಕೊಂಡಿದ್ದಾರೆ. ಮೊದಲ ಹಂತದ ಕನಿಷ್ಠ ಬೆಂಬಲ ಬೆಲೆ ಸತ್ಯಾಗ್ರಹವು ಕರ್ನಾಟಕದಲ್ಲಿ ಯಾದಗಿರ್ ಜಿಲ್ಲೆಯಿಂದ ಮಾರ್ಚ್ 14 ಕ್ಕೆ ಪ್ರಾರಂಭವಾಗಲಿದೆ.
ಒಟ್ಟು 11 ದಿನಗಳ ನಡೆಯುವ ಈ ರೈತರ ಹೋರಾಟದಲ್ಲಿ ಜೈಕಿಸಾನ್ ಆಂದೋಲನ್, ಕರ್ನಾಟಕ ರಾಜ್ಯ ರೈತ ಸಂಘ, ರೈತು ಜಂಟಿ ಕಾರ್ಯ ಸಮಿತಿ, ಕಿಸಾನ್ ಸಂಘರ್ಷ ಸಮಿತಿ ಹಾಗೂ ಇನ್ನು ಹಲವಾರು ರೈತ ಸಂಘಟನೆಗಳು ಈ ಹೋರಾಟದಲ್ಲಿ ಭಾಗವಹಿಸಲಿವೆ ಎಂದು ತಿಳಿದುಬಂದಿದೆ.
ಈ ಸತ್ಯಾಗ್ರಹ ರೂಪುರೇಷೆಗಳ ಕುರಿತಾಗಿ ಪ್ರತಿಕ್ರಯಿಸಿರುವ ಸ್ವರಾಜ್ ಇಂಡಿಯಾದ ಯೋಗೇಂದ್ರ ಯಾದವ್ "ಕನಿಷ್ಠ ಬೆಂಬಲ ಬೆಲೆ ಸತ್ಯಾಗ್ರಹ ಪ್ರಮುಖವಾಗಿ ಗಾಂಧೀಜಿಯವರ ಸತ್ಯಾಗ್ರಹದಿಂದ ಸ್ಪೂರ್ತಿಗೊಂಡು ಸಿದ್ದಗೊಳಿಸಿದಂತಹ ಹೋರಾಟದ ಮಾದರಿಯಾಗಿದ್ದು. ಈ ಹೋರಾಟದಲ್ಲಿ ಅಧಿಕಾರಿಗಳು ,ಹೋರಾಟಗಾರರು,ಪತ್ರಕರ್ತರಿಗೂ ಕೂಡಾ ಆಹ್ವಾನ ನೀಡಲಾಗಿದೆ" ಎಂದು ತಿಳಿಸಿದ್ದಾರೆ.
ಕರ್ನಾಟಕದ ಯಾದಗೀರ್ ಜಿಲ್ಲೆಯಿಂದ ಆರಂಭವಾಗುವ ಈ ಕನಿಷ್ಠ ಬೆಂಬಲ ಬೆಲೆ ಸತ್ಯಾಗ್ರಹವು ಕೃಷಿ ಮಾರುಕಟ್ಟೆಗಳಿಗೆ ಭೇಟಿ ನೀಡಿ ಕನಿಷ್ಠ ಬೆಂಬಲ ಬೆಲೆಯನ್ನು ಕಾನೂನಾತ್ಮಕಗೊಳಿಸಿ ರೈತರ ಲೂಟಿಯನ್ನು ತಡೆಗಟ್ಟುವ ವಿಚಾರವಾಗಿ ಜಾಗೃತಿ ಮೂಡಿಸುವ ನಿಟ್ಟಿನಲ್ಲಿ ಈ ಸತ್ಯಾಗ್ರಹವನ್ನು ಹಮ್ಮಿಕೊಳ್ಳಲಾಗಿದೆ.
ಮೊದಲ ಹಂತದ ಕನಿಷ್ಠ ಬೆಂಬಲ ಬೆಲೆ ಸತ್ಯಾಗ್ರಹದ ವಿವರ ಇಂತಿದೆ:
* ಮಾರ್ಚ್ 13, 2018: - ಯೋಗೇಂದ್ರ ಯಾದವ್ ಮತ್ತು ಪ್ರೊಫೆಸರ್ ಕೋದಂಡರಾಮ್ ರಿಂದ ಹೈದರಾಬಾದ್ ನಲ್ಲಿ ಕನಿಷ್ಠ ಬೆಂಬಲ ಬೆಲೆ ಸತ್ಯಾಗ್ರಹದ ಕುರಿತಾಗಿ ಪತ್ರಿಕಾಗೋಷ್ಠಿ
* ಮಾರ್ಚ್ 14, 2018: ಯಾದಗೀರ್, ಕರ್ನಾಟಕ
* ಮಾರ್ಚ್ 15, 2018: ಕರ್ನೂಲ್, ಆಂಧ್ರ
* ಮಾರ್ಚ್ 16, 2018: ಸೂರ್ಯಪೇಟ್ & ಕೋಡಾದ್, ತೆಲಂಗಾಣ
* ಮಾರ್ಚ್ 18 ಮತ್ತು 19, 2018: ಶ್ರೀ ಗಂಗಾನಗರ್, ರಾಜಸ್ಥಾನ
* ಮಾರ್ಚ್ 20, 2018: ಅಲ್ವಾರ್, ರಾಜಸ್ಥಾನ
* ಮಾರ್ಚ್ 21, 2018: ರೆವಾರಿ, ಹರಿಯಾಣ
* ಮಾರ್ಚ್ 22 2018: ನುಹ್, ಹರಿಯಾಣ
* ಮಾರ್ಚ್ 25, 2018: ರುದ್ರಪುರ, ಉತ್ತರಖಂಡ್
* ಮಾರ್ಚ್ 26, 2018: ಪ್ರತಾಪ್ ಘಡ್, ಉತ್ತರ ಪ್ರದೇಶ
* ಮಾರ್ಚ್ 27 ಮತ್ತು 31, 2018: ಮಧ್ಯಪ್ರದೇಶ(ಸ್ಥಳ ಘೋಷಣೆ ಮಾಡಬೇಕಿದೆ)
