ನವದೆಹಲಿ: ಕೇಂದ್ರದಲ್ಲಿ ಮತ್ತೆ ಅಧಿಕಾರಕ್ಕೆ ಬಂದ ನಂತರ 370 ನೇ ವಿಧಿಯನ್ನು ತೆಗೆದುಹಾಕುವ ಮೋದಿ ಸರ್ಕಾರದ ನಿರ್ಧಾರವು ಭಾರತೀಯ ಜನತಾ ಪಕ್ಷ(ಬಿಜೆಪಿ)ದ ಸದಸ್ಯತ್ವ ಅಭಿಯಾನದ ಮೇಲೆ ಭಾರಿ ಪರಿಣಾಮ ಬೀರಿದೆ. ಈ ವರ್ಷ, ಪಕ್ಷದ ಸದಸ್ಯತ್ವ ಚಾಲನೆಯು ಹಿಂದಿನ ಎಲ್ಲಾ ದಾಖಲೆಗಳನ್ನು ಮುರಿದಿದೆ.
ಜುಲೈ 6 ರಿಂದ ಆಗಸ್ಟ್ 20ರವರೆಗೆ ಬಿಜೆಪಿ ಸದಸ್ಯತ್ವ ಅಭಿಯಾನದಡಿಯಲ್ಲಿ ಸುಮಾರು 3.8 ಕೋಟಿ ಮಂದಿ ಬಿಜೆಪಿ ಸದಸ್ಯತ್ವ ಪಡೆದಿದ್ದಾರೆ. ಆದಾಗ್ಯೂ ಈ ಬಗ್ಗೆ ಅಧಿಕೃತ ಹೇಳಿಕೆ ಹೊರಬೀಳಬೇಕಿದೆ. ಪಕ್ಷದ ಐಟಿ ತಂಡ ಸದಸ್ಯರ ನೋಂದಣಿ ಪರಿಶೀಲಿಸಿದ ಬಳಿಕವೇ ಈ ಅಂಕಿ-ಅಂಶ ಹೊರಬೀಳಲಿದೆ.
ಉತ್ತರ ಪ್ರದೇಶ ಒಂದರಲ್ಲೇ ಅತಿ ಹೆಚ್ಚು ಅಂದರೆ 1.8 ಕೋಟಿ ಮಂದಿ ಬಿಜೆಪಿ ಸದಸ್ಯತ್ವ ಪಡೆದಿದ್ದಾರೆ ಎನ್ನಲಾಗಿದೆ. 2015 ರಲ್ಲಿ ರಾಜ್ಯ ಬಿಜೆಪಿ ಒಟ್ಟು 1.13 ಕೋಟಿ ಸದಸ್ಯರನ್ನು ಹೊಂದಿದ್ದು, ಈ ಬಾರಿ ಅಭಿಯಾನದಲ್ಲಿ ಸದಸ್ಯತ್ವವನ್ನು ಶೇಕಡಾ 20ರಷ್ಟು ಅಂದರೆ 22.6 ಲಕ್ಷ ಹೆಚ್ಚಿಸುವ ಗುರಿಯನ್ನು ಹೊಂದಿತ್ತು. ಆದರೆ ಸದಸ್ಯತ್ವ ಡ್ರೈವ್ ಎಲ್ಲಾ ದಾಖಲೆಗಳನ್ನು ಮುರಿಯಿತು, ಈ ವರ್ಷ 55 ಲಕ್ಷ ಹೊಸ ಸದಸ್ಯರು ಸೇರಿದ್ದಾರೆ.
ಇನ್ನು ಕೆಲವೇ ತಿಂಗಳುಗಳಲ್ಲಿ ವಿಧಾನಸಭೆ ಚುನಾವಣೆ ಎದುರಿಸಲು ಸಜ್ಜಾಗುತ್ತಿರುವ ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ 15 ಲಕ್ಷ ಹೊಸ ಸದಸ್ಯರು ಬಿಜೆಪಿಗೆ ಸೇರ್ಪಡೆಗೊಂಡಿದ್ದಾರೆ. ಪಕ್ಷವು ಪ್ರತಿ ಆರು ವರ್ಷಗಳಿಗೊಮ್ಮೆ ತನ್ನ ಸದಸ್ಯತ್ವ ಚಾಲನೆ ನೀಡುತ್ತಿದ್ದು, ಸದಸ್ಯರನ್ನು ಶೇಕಡಾ 20 ರಷ್ಟು ಹೆಚ್ಚಿಸುವ ಗುರಿಯನ್ನು ಹೊಂದಿದೆ.
1 ಲಕ್ಷ ಸದಸ್ಯರನ್ನು ಪಕ್ಷಕ್ಕೆ ಸೇರಿಸುವ ಮೂಲ ಗುರಿ ಹೊಂದಿದ್ದ ಜಮ್ಮು ಮತ್ತು ಕಾಶ್ಮೀರದಲ್ಲೂ ಪಕ್ಷವು ಉತ್ತಮ ಯಶಸ್ಸನ್ನು ಕಂಡಿದ್ದು 3.5 ಲಕ್ಷ ಹೊಸ ಸದಸ್ಯರು ಬಿಜೆಪಿಗೆ ಸೇರ್ಪಡೆಗೊಂಡರು. ಆದಾಗ್ಯೂ, ಸೆಕ್ಷನ್ 370 ರನ್ನು ರದ್ದುಪಡಿಸಿದ ನಂತರ ರಾಜ್ಯದಲ್ಲಿ ಅಂತರ್ಜಾಲ ಸೇವೆಗಳಲ್ಲಿನ ಅಡಚಣೆಯಿಂದಾಗಿ ಸದಸ್ಯತ್ವ ಚಾಲನೆಯ ಮೇಲೆ ಪರಿಣಾಮ ಬೀರಿದೆ ಎಂದು ಪಕ್ಷ ಅಭಿಪ್ರಾಯಪಟ್ಟಿದೆ. ಈ ಅಭಿಯಾನವನ್ನು ಈಗ ರಾಜ್ಯದಲ್ಲಿ ಆಗಸ್ಟ್ 25 ರವರೆಗೆ ವಿಸ್ತರಿಸಲಾಗಿದೆ ಮತ್ತು ಪಕ್ಷಕ್ಕೆ ಸುಮಾರು 12 ಲಕ್ಷ ಸದಸ್ಯರು ಸೇರುವ ನಿರೀಕ್ಷೆಯಿದೆ ಎಂದು ಅಂದಾಜಿಸಲಾಗಿದೆ.
ಹರಿಯಾಣದಲ್ಲಿ ಬಿಜೆಪಿಗೆ ಒಟ್ಟು 7,14,784, ಹಿಮಾಚಲ ಪ್ರದೇಶದಲ್ಲಿ 4,62,804, ಪಂಜಾಬ್‌ನಲ್ಲಿ 5,5,422, ಉತ್ತರಾಖಂಡದಲ್ಲಿ 10 ಲಕ್ಷ, ಗುಜರಾತ್‌ನಲ್ಲಿ 33.73 ಲಕ್ಷ, ಕರ್ನಾಟಕದಲ್ಲಿ 16.90 ಲಕ್ಷ, ಮಹಾರಾಷ್ಟ್ರದಲ್ಲಿ 19.97 ಲಕ್ಷ, ಮಧ್ಯಪ್ರದೇಶದಲ್ಲಿ 24.53 ಲಕ್ಷ ಜನರು ಬಿಜೆಪಿ ಜೊತೆ ಸೇರ್ಪಡೆಗೊಂಡಿದ್ದಾರೆ.
