ଟଙ୍କା ଗଣି ଗଣି ଖରାପ ହେଲା ୨ଟି ମେସିନ୍, ୨୨୦କୋଟି ଗଣିବା ପରେ ଆହୁରି ବାକି...

ବଲାଙ୍ଗିର: ଆୟକର ବିଭାଗ ପକ୍ଷରୁ ସୁଦପଡା ମଦଭାଟିରେ ରେଡ୍ ହେବା ପରଠାରୁ ମୋଟ ସମ୍ପତ୍ତି ତଥ୍ୟ ହାସଲ ପାଇଁ ଚାଲିଛି ଟଙ୍କା ଗଣତି । ୫ ଦିନ ହେବ ଦିନ ରାତି ବସି ଟଙ୍କା ଗଣୁଥିଲେ ମଧ୍ୟ ଆଜି ଯାଏଁ ସରିନି ଟଙ୍କା ଗଣା । ଟଙ୍କା ଗଣୁଥିବା କର୍ମଚାରୀ କହିଛନ୍ତି ଯେ, ଆମ ଜୀବନକାଳ ମଧ୍ୟରେ ଏପରି ଘଟଣା ନା କେବେ ଦେଖିଥିଲୁ ନା କେବେ ଏତେ ଟଙ୍କା ଗଣିଥିଲୁ । ବିଡା ବିଡା ନୋଟ ବର୍ତ୍ତମାନ ଆମକୁ କାଗଜ ପରି ମନେ ହେଉଛି । ବର୍ତ୍ତମାନ ପ୍ରାୟ ୫୦ ଜଣ କର୍ମଚାରୀ ଟଙ୍କା ଗଣତି କାର୍ଯ୍ୟରେ ନିୟୋଜିତ ଅଛନ୍ତି ।  ଅନ୍ୟପଟେ ଟଙ୍କା ଗଣନା କାର୍ଯ୍ୟରେ ୨୫ଟି ମେସିନ (Cash counting machine) ମଧ୍ୟ ବ୍ୟବହାର କରାଯାଇଛି । ତେବେ ସୂଚନା ମିଳିଛି ଯେ, ଟଙ୍କା ଗଣି ଗଣି ଦୁଇଟି ମେସିନ୍ ଖରାପ ହୋଇଯାଇଛି । ବ୍ୟାକଅପରେ ଆହୁରି କିଛି ମେସିନ୍ ରଖିଛନ୍ତି କର୍ତ୍ତୁପକ୍ଷ । 

ସୂଚନା ମୁତାବକ, ବର୍ତ୍ତମାନ ପର୍ଯ୍ୟନ୍ତ ୨୨୦ କୋଟି ଟଙ୍କା ଗଣତି କରାଯାଇସାରିଛି । ଉକ୍ତ ଟଙ୍କା ୧୪୫ଟି ବ୍ୟାଗରେ ରହିଥିଲା । ତେବେ ଟଙ୍କା ଗଣତି କାଯ୍ୟ ସରିନଥିବାବେଳେ ଆହୁରି ୩୧ଟି ଟଙ୍କା ଭର୍ତ୍ତୀ ବ୍ୟାଗ ଗଣିବା ପାଇଁ ବାକି ରହିଛି । ବଲାଙ୍ଗିର ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆର ରିଜିଓନାଲ ମ୍ୟାନେଜର ଏ ସମ୍ପର୍କରେ ଗଣମାଧ୍ୟମକୁ କହିଛନ୍ତି । ଆଜି ରବିବାର ଛୁଟି ଦିନ ହୋଇଥିଲେ ମଧ୍ୟ କର୍ମଚାରୀଙ୍କ ଛୁଟି ବାତିଲ୍ କରାଯାଇ ଟଙ୍କା ଗଣନା କାର୍ଯ୍ୟ ଜାରି ରହିଛି ।

ଅନ୍ୟପଟେ ଆୟକର ବିଭାଗ (Income tax department) ଆଜି ପଞ୍ଚମ ଦିନରେ ମଧ୍ୟ ଚଢାଉ ଜାରି ରଖିଛି । ସୁଦପଡା ଅଞ୍ଚଳରେ ଥିବା ଏକ ମଦ ଭାଟିରେ ଚଢାଉ ହେବା ପରେ ସେଠାରୁ ମଧ୍ୟ ଟଙ୍କା ସମେତ ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟ୍ ଜବତ ହୋଇଛି । ଏଥି ସହିତ ମଦ ଭାଟି ମାଲିକଙ୍କୁ ପଚରା ଉଚରା କରାଯାଉଛି ।

Also Read- ଢେଙ୍କାନାଳରେ ଚାଞ୍ଚଲ୍ୟ, ପ୍ରେମିକର ହତ୍ୟା ପଛରେ ନାବାଳିକା ପ୍ରେମିକାର ଦାଦା

Also Read- Elephant attack: କଳାହାଣ୍ଡିରେ ଅଭାବନୀୟ ଘଟଣା, ହାତୀ ଆକ୍ରମଣରେ ରେଞ୍ଜର ମୃତ