ENG vs AFG: ବିଶ୍ୱକପରେ ବଡ଼ ଓଲଟଫେର! ଡିଫେଣ୍ଡିଂ ଚାମ୍ପିଅନ୍ ଇଂଲଣ୍ଡକୁ ୬୯ ରନରେ ପରାସ୍ତ କଲା ଆଫଗାନିସ୍ତାନ

England vs Afghanistan Full Match Highlights: କୁହାଯାଏ କ୍ରିକେଟ୍ ଏକ ଅନିଶ୍ଚିତତାର ଖେଳ । ଆଇସିସି କ୍ରିକେଟ୍ ବିଶ୍ୱକପ୍ ୨୦୨୩ ର ୧୩ ତମ ମ୍ୟାଚ୍ ରେ ଏକ ବିରାଟ ଓଲଟଫେର ଦେଖିବାକୁ ମିଳିଛି । ଆଫଗାନିସ୍ତାନ କ୍ରିକେଟ୍ ଦଳ ରବିବାର ଦିନ ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ଡିଫେଣ୍ଡିଂ ଚାମ୍ପିଅନ୍ ଇଂଲଣ୍ଡକୁ ୬୯ ରନରେ ପରାସ୍ତ କରି ବିଶ୍ୱକପ ଇତିହାସରେ ଏକ ବଡ଼ ଓଲଟଫେର ସୃଷ୍ଟି କରିଛି । ହ୍ୟାରି ବ୍ରୁକଙ୍କୁ ଛାଡି ଦେଲେ ଇଂଲଣ୍ଡର ବ୍ୟାଟ୍ସମ୍ୟାନ ମାନେ ସହଜରେ ଆଫଗାନିସ୍ତାନର ବୋଲରଙ୍କ ନିକଟରେ ଆତ୍ମସମର୍ପଣ କରିଥିଲେ । ବ୍ରୁକ ଇନିଂସ ପରିଚାଳନା କରିବାକୁ ଚେଷ୍ଟା କରିଥିଲେ ମଧ୍ୟ ସେ ସଫଳ ହୋଇପାରିନଥିଲେ । ୩ ଟି ମ୍ୟାଚ୍ ଖେଳିଥିବା ଆଫଗାନିସ୍ତାନର ଏହା ପ୍ରଥମ ବିଜୟ ହୋଇଥିବାବେଳେ ୩ଟି ମ୍ୟାଚ ଖେଳିଥିବା ଏହା ଇଂଲଣ୍ଡର ଦ୍ୱିତୀୟ ପରାଜୟ ।

ଜୋସ୍ ବଟଲରଙ୍କ ଦ୍ୱାରା ପ୍ରଥମେ ବ୍ୟାଟିଂ କରିବାକୁ ଆମନ୍ତ୍ରିତ କରିବା ପରେ ହାଶମତୁଲ୍ଲା ଶାହିଦିଙ୍କ ନେତୃତ୍ୱରେ ଆଫଗାନିସ୍ତାନ ଦଳ ୪୯.୫ ଓଭରରେ ୨୮୪ ରନ୍ ସଂଗ୍ରହ କରିଥିଲା । ଏହାର ଜବାବରେ, ବଟଲରଙ୍କ ଟିମ୍ ୨୧୫ ରନ୍ କରି ଅଲ୍ ଆଉଟ୍ ହୋଇଯାଇଥଲା । ଇଂଲଣ୍ଡ ପାଇଁ ହାରି ବ୍ରୁକ୍ ସର୍ବାଧିକ ୬୬ ରନ୍ ସ୍କୋର କରିଥିଲେ । ତାଙ୍କୁ ମୁଜିବ ଉର ରହମାନ ବୋଲ୍ଡ କରିଥିଲେ । ଇଂଲଣ୍ଡ ପାଇଁ ଡେଭିଡ ମାଲାନ ୩୨ ରନ ସ୍କୋର କରିଥିବାବେଳେ ଜୋ ରୁଟ ୧୧ ରନ ସ୍କୋର କରିଥିଲେ ଓ ଏହା ପରେ ଲିଆମ ଲିଭିଙ୍ଗଷ୍ଟୋନ ଓ ସାମ କୁରନ ପ୍ରତ୍ୟେକ ୧୦ ରନ ଲେଖାଁଏ ରନ୍ କରିଥିଲେ । କ୍ୟାପଟେନ ଜୋସ୍ ବଟଲର୍ ୯ ରନ୍ ସ୍କୋର କରିବା ପରେ ପ୍ୟାଭିଲିୟନକୁ ଫେରିଥିଲେ । ଆଦିଲ ରସିଦ ୨୦ ରନର ଇନିଂସ ଖେଳିଥିଲେ । ଆଫଗାନିସ୍ତାନ ପାଇଁ ଯୁବ ସ୍ପିନର ମୁଜିବ ଉର ରହମାନ ସର୍ବାଧିକ ୩ ୱିକେଟ୍ ନେଇଥିଲେ ।

ଏହାପୂର୍ବରୁ ଓପନର୍ ରହମାନୁଲ୍ଲା ଗୁରୁବାଜଙ୍କ ୫୭ ବଲରେ ୮୦ ରନ୍ ସହାୟତାରେ ଆଫଗାନିସ୍ତାନ ୨୮୪ ରନ୍ ସଂଗ୍ରହ କରିଥିଲା । ଏଥିପାଇଁ ଗୁରୁବାଜ ୫୭ ବଲରେ ୮୦ ରନ୍ ସଂଗ୍ରହ କରିଥିଲେ, ଯେଉଁଥିରେ ୮ ଟି ଚୌକା ଓ ୪ଟି ଛକା ଥିଲା । ଗୁରୁବାଜଙ୍କ ବ୍ୟତୀତ ଇକ୍ରାମ ଅଲିଖିଲ ୬୬ ଟି ବଲରେ ତିନୋଟି ଚୌକା ଓ ଦୁଇଟି ଛକା ସହ ୫୮ ରନ ସ୍କୋର କରିଥିବାବେଳେ ନିମ୍ନ କ୍ରମରେ ଅଭିଜ୍ଞ ମୁଜିବ ଉର ରେହମାନ ୧୬ ବଲରେ ୨୮ ରନର ଆକ୍ରମଣାତ୍ମକ ଇନିଂସ ଖେଳିଥିଲେ ।

୩୩ଟି ବଲରେ ନିଜର ପଚାଶ ପୂରଣ କରିଥିଲେ ଗୁରୁବାଜ 
ପ୍ରଥମ ଦୁଇଟି ମ୍ୟାଚ୍ ହାରିଥିବା ଆଫଗାନିସ୍ତାନ ଦଳ ପ୍ରଥମେ ବ୍ୟାଟିଂ କରିବାକୁ ପଠାଯିବା ପରେ ଦୃଢ଼ ଆରମ୍ଭ କରିଥିଲା । ପ୍ରଥମ ଦୁଇଟି ମ୍ୟାଚରେ ବିଫଳ ହୋଇଥିବା ଗୁରୁବାଜ ଓ ଇବ୍ରାହିମ ଜାଦ୍ରାନ୍ ପ୍ରଥମ ୱିକେଟ୍ ଭାଗିଦାରୀରେ ୧୧୪ ରନ୍ ଯୋଡିଥିଲେ । ସେ ୩୯ ବଲରେ ଆଫଗାନିସ୍ତାନ ତରଫରୁ ୫୦ ରନ୍ ପୂରଣ କରାଯାଇଥିଲା ।