Motidungari Ganesh ji: ଏହି ମନ୍ଦିରରେ ମିଳୁଥିବା ମେହେନ୍ଦୀରୁ ହୋଇଯାଏ ବାହାଘର; ଭକ୍ତ ଦିଅନ୍ତି ପ୍ରଥମ ବିବାହ କାର୍ଡ

Motidungari Ganesh ji: ଆଉ ଅଳ୍ପ ଦିନ ପରେ ବିବାହ ଋତୁ (Wedding season) ଆରମ୍ଭ ହେବାକୁ ଯାଉଛି । ସେଥିପାଇଁ ଅଧିକାଂଶ ପରିବାରରେ ବିବାହ ଯୋଗ୍ୟ ପିଲାଙ୍କ ପାଇଁ ପ୍ରସ୍ତାବ ଖୋଜାଖୋଜି ମଧ୍ୟ ଆରମ୍ଭ ହୋଇଗଲାଣି । କିନ୍ତୁ ଅନେକ ଜଣଙ୍କ କ୍ଷେତ୍ରରେ ଯେତେ ଚେଷ୍ଟା କଲେ ମଧ୍ୟ ବାହାଘର (Marriage) ହୋଇପାରେନାହିଁ । କୌଣସି ନା କୌଣସି କାରଣରୁ ବିବାହ ବିଳମ୍ୱ ହେବା ସହ ଅନେକଙ୍କ କ୍ଷେତ୍ରରେ ବାହାଘର ଭାଙ୍ଗିଯାଇଥାଏ । ତେବେ ଏପରି ପରିସ୍ଥିତିରେ ଆମେ ଆପଣଙ୍କୁ ଏକ ଆଶ୍ଚର୍ଯ୍ୟଜନକ ଘଟଣା ବିଷୟରେ କହିବାକୁ ଯାଉଛୁ । ଲୋକଙ୍କ ବିଶ୍ୱାସ ରହିଛି ଯେ, ଯେଉଁମାନଙ୍କର ବିବାହରେ ସମସ୍ୟା ହେଉଛି ସେମାନେ ରାଜସ୍ଥାନର ଜୟପୁରରେ ଅବସ୍ଥିତ ମୋତି ଡଙ୍ଗ୍ରି ଗଣେଶ ଜୀ (Lord Ganesh) ମନ୍ଦିରରେ ପହଞ୍ଚି ଭଗବାନଙ୍କ ଦର୍ଶନ ଓ ପୂଜାପାଠ କରିଲେ ରିଷ୍ଟ ଖଣ୍ଡନ ହୋଇଥାଏ । ପ୍ରଭୁ ଗଣେଷଙ୍କୁ ନିଜର ମନସ୍କାମନା ଜଣାଇବା ସହ ମନ୍ଦିରରେ ପ୍ରସାଦ ରୂପକ ଭାବରେ ମେହେନ୍ଦୀ ଚଢାଇ ତାହାକୁ ପିନ୍ଧିଲେ ଘରେ ଖୁବ ଶୀଘ୍ର ଶୁଭ ଖବର ଆସିଥାଏ । ପରେ ଭକ୍ତମାନେ ପ୍ରଥମେ ବାହାଘର କାର୍ଡ (Marriage Card) ଭଗବାନ ଗଣେଶଙ୍କୁ ଅର୍ପଣ କରିଥାନ୍ତି ।

ସୂଚନା ମୁତାବକ ପ୍ରଭୁ ଗଣେଶଙ୍କୁ ପ୍ରଥମ ବିବାହ କାର୍ଡ ଦେବାର ପରମ୍ପରା ଏଠାରେ ଦୀର୍ଘ ବର୍ଷ ଧରି ଚାଲିଆସୁଛି। ହିନ୍ଦୁ ଧର୍ମରେ କୌଣସି ଶୁଭ କାର୍ଯ୍ୟ କରିବା ପୂର୍ବରୁ ଅଗ୍ରପୁଜ୍ୟ ଭଗବାନ ଗଣେଶଙ୍କୁ ଯଥା ବିଧି ଅନୁସାରେ ପୂଜା କରାଯାଏ । ଏହା ସହିତ ଶ୍ରୀ ଗଣେଶଙ୍କ ଫଟୋକୁ ବିବାହ କାର୍ଡରେ ସ୍ଥାନିତ କରାଯାଇଥାଏ । ବିବାହ ପରି ଅନ୍ୟ ଶୁଭ କାମ ଗୁଡିକ କରିବା ପୂର୍ବରୁ ଶ୍ରୀ ଗଣେଶଙ୍କୁ ପ୍ରଥମ କାର୍ଡ ଦିଆଯାଏ । ସେଥିପାଇଁ ଜୟପୁରର ମୋତିଡୁଙ୍ଗାରୀ ମନ୍ଦିରକୁ ଦୂର ଦୂରାନ୍ତରୁ ଅନେକ ଭକ୍ତ ଆସି ପ୍ରଭୁ ଗଣେଶ ଜୀଙ୍କୁ ପ୍ରଥମ ବିବାହ କାର୍ଡ ଅର୍ପଣ କରିଥାନ୍ତି । ଯେଉଁମାନଙ୍କର ବିବାହ କୌଣସି କାରଣରୁ ବିଳମ୍ୱ ହେଉଛି ସେମାନେ ପ୍ରଭୁ ଗଣେଶଙ୍କୁ ପୂଜା କରି ମୋତିଡୁଙ୍ଗାରୀରେ ମିଳୁଥିବା ମେହେନ୍ଦୀକୁ ପ୍ରସାଦ ଭାବରେ ନିଜ ଘରକୁ ନେଇଯାଆନ୍ତି । ଉକ୍ତ ମେହେନ୍ଦୀକୁ ହାତରେ ଲଗାଇଲେ ଶୀଘ୍ର ବିବାହ ହୋଇଯାଏ ବୋଲି ଲୋକଙ୍କ ମନରେ ଦୃଢ ବିଶ୍ୱାସ ରହିଛି । ଲୋକମାନେ ଏହି ମେହେନ୍ଦୀ ନେବା ପାଇଁ ଦୂରଦୂରାନ୍ତରୁ ଶ୍ରୀ ଗଣେଶଙ୍କ ମନ୍ଦିରରେ ପହଞ୍ଚନ୍ତି । ଘଣ୍ଟା ଘଣ୍ଟା ଧରି ଲାଇନରେ ଠିଆ ହେବା ପରେ ସେମାନେ ମେହେନ୍ଦୀ ନେଇ ନିଜକୁ ଭାଗ୍ୟବାନ ମନେକରି ଘରକୁ ଫେରିଥାନ୍ତି ।

କେବଳ ସେତିକି ନୁହେଁ, ସହରରେ ବାସ କରୁଥିବା ବ୍ୟକ୍ତିମାନେ ଘର ପାଇଁ ନୂଆ ଗାଡିଟିଏ କିଣିଲେ ସେମାନେ ପ୍ରଥମେ ଏହି ମନ୍ଦିରକୁ ଆଣି ପୂଜାର୍ଚ୍ଚନା କରିବାର ପରମ୍ପରା ମଧ୍ୟ ଅନେକ ପୂର୍ବରୁ ରହିଛି । ବିଶ୍ୱକର୍ମା ପୂଜା, ରାମନବମୀ, ଧନତେରାସ, ଦୀପାବଳି ସମୟରେ ଏହି ମନ୍ଦିରରେ ନୂଆ ଗାଡି ପୂଜା କରିବା ପାଇଁ ଅଧିକ ଭିଡ ଦେଖିବାକୁ ମିଳିଥାଏ । ଲୋକଙ୍କ ମନରେ ଏହା ବିଶ୍ୱାସ ରହିଛି ଯେ, ଏହି ମନ୍ଦିରରେ ଗାଡି ପୂଜା କଲେ ଭଗବାନଙ୍କ ଆଶୀର୍ବାଦ ମିଳିଥାଏ ଓ ଗାଡ଼ି ଦୁର୍ଘଟଣା ଘଟେନାହିଁ । ଗଣେଶ ଚତୁର୍ଥୀ ଅବସରରେ ମନ୍ଦିରରେ ସ୍ୱତନ୍ତ୍ର ପୂଜାର୍ଚ୍ଚନା କରାଯାଇଥାଏ । ସେହିଦିନ ଏହି ମନ୍ଦିରରେ ଅଧିକ ଭକ୍ତଙ୍କ ଭିଡ଼ ଲାଗିଥାଏ । ଫୁଲ, ଫଳ, ନୈବେଦ୍ୟରେ ପ୍ରଭୁ ଗଣେଶଙ୍କ ପ୍ରତିମୁର୍ତ୍ତି ଅଧିକ ସୁନ୍ଦର ଦେଖାଯାଆନ୍ତି । ଅନେକ ଭକ୍ତ ନିଜର ମାନସିକ ଅନୁସାରେ ସୁନା, ରୂପା ଅଳଙ୍କାର ସମେତ ବିଭିନ୍ନ ପ୍ରକାରର ମୁକୁଟ ମଧ୍ୟ ଭଗବାନ ଗଣେଶଙ୍କୁ ଦାନ କରିଥାନ୍ତି । ଜୟପୁର ସହରରେ ଥିବା ଏହି ମନ୍ଦିରଟି ଲୋକଙ୍କ ବିଶ୍ୱାସର ମନ୍ଦିର । ଏହି ମନ୍ଦିରକୁ ଆସୁଥିବା ଅନେକ ଭକ୍ତ ପ୍ରଭୁ ଗଜାନନଙ୍କୁ ସିନ୍ଦୁର ଅର୍ପଣ କରିଥାନ୍ତି ।

ସୂଚନା ଅନୁସାରେ, ଐତିହାସିକଙ୍କ ମତରେ ଏହି ଗଣେଶ ମନ୍ଦିରଟି ୧୭୬୧ ମସିହାରେ ନିର୍ମାଣ କରାଯାଇଥିଲା । ସେତେବେଳେ ଜୟପୁରର ରାଜା ମାଧୋ ସିଂ ଏହାକୁ ନିର୍ମାଣ କରିଥିଲେ । ପ୍ରଭୁ ଶ୍ରୀ ଗଣେଶଙ୍କ ପ୍ରତିମୂର୍ତ୍ତିକୁ ଗୁଜୁରାଟର ଏକ ସ୍ଥାନରୁ ଅଣାଯାଇଥିଲା ।

Also Read- Money Saving Tips: କମ ଦରମାରେ କେମିତି କରିବେ ସଞ୍ଚୟ? ଜାଣନ୍ତୁ ଏହି ଖାସ୍ ଟିପ୍ସ