Gujarat Election 2022: ଗୁଜୁରାଟ ନିର୍ବାଚନରେ କେଉଁ ଦଳକୁ ମିଳିବ କେତେ ଆସନ? ସର୍ଭେରୁ ମିଳିଲା ଆଶ୍ଚର୍ଯ୍ୟଜନକ ଫଳାଫଳ

Gujarat Assembly Election 2022: ଗୁଜୁରାଟ ବିଧାନସଭା ନିର୍ବାଚନ ୨୦୨୨ ପାଇଁ କାର୍ଯ୍ୟସୂଚୀ ଘୋଷଣା କରିଛନ୍ତି ନିର୍ବାଚନ ଆୟୋଗ। ଏଥର ରାଜ୍ୟର ଦୁଇଟି ପର୍ଯ୍ୟାୟରେ ଅନୁଷ୍ଠିତ ହେବ ନିର୍ବାଚନ। ପ୍ରଥମ ପର୍ଯ୍ୟାୟ ୧ ଡିସେମ୍ବରରେ ଏବଂ ଦ୍ୱିତୀୟ ପର୍ଯ୍ୟାୟ ୫ ଡିସେମ୍ବରରେ ଅନୁଷ୍ଠିତ ହେବ। ଆସନ୍ତା ୮ ଡିସେମ୍ବରରେ ନିର୍ବାଚନର ଫଳାଫଳ ଘୋଷଣା କରାଯିବ। ଗତ ୨୦୧୭ ନିର୍ବାଚନରେ ​​ବିଜେପି-କଂଗ୍ରେସ ମଧ୍ୟରେ ସିଧାସଳଖ ପ୍ରତିଯୋଗିତା ହୋଇଥିଲା। ହେଲେ ଏଥର ତ୍ରିକୋଣୀୟ ମୁକାବିଲା ହେବାକୁ ଯାଉଛି। କାରଣ ଏଥର ଆମ୍ ଆଦମୀ ପାର୍ଟି ମଧ୍ୟ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଛି। ଚଳିତ ଥର ଆପ୍ ଗୁଜୁରାଟ ମଇଦାନରେ ବିଜେପି-କଂଗ୍ରେସ ସହ କଡା ମୁକାବିଲା କରିବାକୁ  ଅଣ୍ଟାଭିଡିଛି। 

ଗୁଜୁରାଟ ବିଧାନସଭା ନିର୍ବାଚନ ୨୦୨୨ ବିଜେପି ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। କାରଣ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ରମନ୍ତ୍ରୀ ଅମିତ ଶାହଙ୍କ ଗୃହରାଜ୍ୟ ହେଉଛି ଗୁଜୁରାଟ। ବିଜେପି ଏବଂ କଂଗ୍ରେସ ମଧ୍ୟରେ ହୋଇଥିବା ଯୁଦ୍ଧରେ ଆମ୍ ଆଦମୀ ପାର୍ଟି ସମ୍ପୂର୍ଣ୍ଣ କଳ ବଳ କୌଶଳ ସହ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଛି। ଦିଲ୍ଲୀ ଏବଂ ପଞ୍ଜାବରେ ପାଇଥିବା ସଫଳତାକୁ ଗୁଜୁରାଟ ନିର୍ବାଚନରେ ଦୋହରାଇବାକୁ ଚାହୁଁଛି ଆପ। ଚଳିତ ବର୍ଷ ଅନୁଷ୍ଠିତ ହେଉଥିବା ଗୁଜୁରାଟ ବିଧାନସଭା ନିର୍ବାଚନରେ ​​କେଉଁ ଦଳ ଜିତିବ, ତାହା କେବଳ ସମୟ କହିବ। ଏହାର ପ୍ରଭାବ ଆସନ୍ତା ୨୦୨୪ ଲୋକସଭା ନିର୍ବାଚନରେ ​​ମଧ୍ୟ ଅନୁଭୂତ ହେବ। ଏହି ନିର୍ବାଚନରେ କେଉଁ ଦଳ କେତେ ଆସନ ପାଇଁ ସେ ନେଇ ସଂସ୍ଥା ପକ୍ଷରୁ କରାଯାଇଛି ସର୍ଭେ। ଯେଉଁଥିରୁ ଚମକାଇବା  ଭଳି ଆଶ୍ଚର୍ଯ୍ୟଜନକ ଫଳାଫଳ ମିଳିଛି। 

ABP-C Voter Survey 
ବିଗତ ୨ ଦଶନ୍ଧି ଧରି ଗୁଜୁରାଟରେ କ୍ଷମତାସୀନ ରହିଛି ବିଜେପି। ଅନ୍ୟପଟେ ଆମ୍ ଆଦମୀ ପାର୍ଟି ବିଜେପିର ଏହି ପାରମ୍ପରିକ ଗଡ଼ରେ ଧସେଇ ପଶିବାକୁ ଚେଷ୍ଟା କରୁଛି। ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ନେତୃତ୍ୱରେ ଆପ୍ ଗୁଜରାଟରେ ପୂରା ତାକତ ଲଗାଇଦେଇଛି। କୁହାଯାଉଛି ଯେ ଆପ୍ ଉଭୟ କଂଗ୍ରେସ ଏବଂ ବିଜେପି ଭୋଟ୍ ଅଂଶ ନିଜ ପକ୍ଷକୁ ନେଇପାରେ। ABP-C Voter ସର୍ଭେରେ ବିଜେପି ପୁଣି ଥରେ ଗୁଜୁରାଟରେ କ୍ଷମତାକୁ ପ୍ରତ୍ୟାବର୍ତ୍ତନ କରୁଥିବା ଜଣାପଡିଛି। ଅକ୍ଟୋବର ଆରମ୍ଭରେ କରାଯାଇଥିବା ସର୍ଭେ ଅନୁଯାୟୀ ବିଜେପି ୧୩୫-୧୪୩ ସିଟ୍ ଜିତୁଥିବା ଜଣାପଡିଛି। ଯଦି ଏହି ସର୍ଭେକୁ ବିଶ୍ୱାସ କରାଯାଏ, ତାହେଲେ ବିଜେପି ଭୋଟ୍ ଅଂଶ ହ୍ରାସ ପାଇପାରେ। ଅନ୍ୟପଟେ କଂଗ୍ରେସକୁ ଝଟକା ଦେଇ ଆପ୍ ଏହାର ତିଛି ଭୋଟ୍ ଅଂଶ ନିଜ ସପକ୍ଷରେ ଟାଣୁଥିବାର ଜଣାପଡ଼ିଛି। ଗୁରୁତ୍ୱପୂର୍ଣ୍ଣ ଏହି ସର୍ଭେରେ ଆମ୍ ଆଦମୀ ପାର୍ଟି ଦୁଇଟିରୁ ଅଧିକ ସିଟ୍ ପାଇବା ଭଳି ମନେ ହେଉନାହିଁ।

CSDS-Lokniti Survey
ଲୋକନୀତି-ସେଣ୍ଟର ଫର ଷ୍ଟଡି ଅଫ୍ ଡେଭଲପମେଣ୍ଟ ସୋସାଇଟି ଏହାର ସର୍ଭେରେ ଗୁଜୁରାଟର ଲୋକଙ୍କୁ ବିଗତ ୫ ବର୍ଷ ମଧ୍ୟରେ ଗୁଜୁରାଟ ସରକାରଙ୍କ ପ୍ରଦର୍ଶନ ଉପରେ ମତାମତ ଲୋଡିଛି। ସର୍ଭେରେ ସାମିଲ ହୋଇଥିବା ପ୍ରାୟ ଦୁଇ-ତୃତୀୟାଂଶ ଲୋକ କହିଛନ୍ତି ଯେ ରାଜ୍ୟ ସରକାରଙ୍କ କାର୍ଯ୍ୟକଳାପରେ ସେମାନେ ସନ୍ତୁଷ୍ଟ ଅଛନ୍ତି। ଅବଶିଷ୍ଟ ଏକ-ତୃତୀୟାଂଶ ସରକାରଙ୍କ ପ୍ରଦର୍ଶନକୁ ନେଇ ଅସନ୍ତୋଷ ପ୍ରକାଶ କରିଛନ୍ତି। ଗତ ୨୦୧୭ ବିଧାନସଭା ନିର୍ବାଚନ ସମୟରେ କରାଯାଇଥିବା ସର୍ଭେ ତୁଳନାରେ ଏଥର ସରକାରଙ୍କ କାର୍ଯ୍ୟରେ ସନ୍ତୁଷ୍ଟ ଥିବା ଲୋକଙ୍କ ସଂଖ୍ୟାରେ ୧୧ ପ୍ରତିଶତ ବୃଦ୍ଧି ଘଟିଛି। ଗତ ୨୦୧୭ ବର୍ଷରେ ସରକାରଙ୍କ ପ୍ରଦର୍ଶନରେ ଯେଉଁମାନେ ସନ୍ତୁଷ୍ଟ ଥିଲେ ସେମାନଙ୍କ ସଂଖ୍ୟା ମାତ୍ର ୮% ଥିଲା। ଯାହା ବର୍ତ୍ତମାନ ୩୧ ପ୍ରତିଶତକୁ ବୃଦ୍ଧି ପାଇଛି।

Times Now Navbharat Opinion Poll 
ଟାଇମ୍ସ ନାଓ ନବଭାରତ-ଇଟିଜି ଓପିନିଅନ ପୋଲ ମଧ୍ୟ ପ୍ରକାଶିତ ହୋଇଛି। ଏନେଇ ହୋଇଥିବା ସର୍ଭେ ଅନୁଯାୟୀ ଗୁଜୁରାଟରେ ବିଜେପି ୧୨୫-୧୩୧ ସିଟ୍ ପାଇପାରେ। କଂଗ୍ରେସ ଖାତାରେ ୨୯-୩୩ ଆସନ ଆସିପାରେ। ଅନ୍ୟପଟେ ଉଭୟ ବିଜେପି-କଂଗ୍ରେସ ଦଳକୁ ଟକ୍କର ଦେଉଥିବା ଆମ ଆଦମୀ ପାର୍ଟି କୁ ୧୮-୨୨ ସିଟ୍ ମିଳିପାରେ। ଅନ୍ୟ ଦଳ ଖାତାକୁ ୨-୪ ସିଟ୍ ଯାଇପାରେ। ଏହି ନିର୍ବାଚନରେ ​​ଭୋଟ୍ ପ୍ରତିଶତ ପାଇବା ମାମଲାରେ କଂଗ୍ରେସ, ଆପ୍ ଠାରୁ ପଛରେ ପଡିଥିବା ଜଣାପଡିଛି। କଂଗ୍ରେସକୁ ୨୧ ପ୍ରତିଶତ ଭୋଟ୍ ମିଳିବ ବୋଲି ସର୍ଭେ ରିପୋର୍ଟ ଦର୍ଶାଉଛି। ଅନ୍ୟପଟେ ଆପ୍ କଂଗ୍ରେସକୁ ପଛରେ ପକାଇ ୨୪ ପ୍ରତିଶତ ଭୋଟ୍ ପାଉଥିବା ଜଣାପଡିଛି। ଏହି ଦୁଇ ଦଳ ବ୍ୟତୀତ ବିଜେପି ୪୮ ପ୍ରତିଶତ ଭୋଟ୍ ସହ ଶୀର୍ଷରେ ରହିଛି।