વર્લ્ડકપ 2019 AFGvsENG: ઈંગ્લેન્ડનો 150 રને વિજય, મેચમાં રેકોર્ડ 33 છગ્ગા લાગ્યા

માનચેસ્ટરઃ   આઈસીસી વિશ્વકપ-2019ની 24મી મેચમાં યજમાન ઈંગ્લેન્ડે અફઘાનિસ્તાનને 150 રને પરાજય આપીને પોઈન્ટ ટેબલમાં પ્રથમ સ્થાન હાસિલ કરી લીધું છે. ટોસ જીતીને પ્રથમ બેટિંગ કરતા કેપ્ટન ઇયોન મોર્ગન (148), જો રૂટ (88), જોની બેયરસ્ટો (90)ની શાનદાર ઈનિંગની મદદથી ઈંગ્લેન્ડે 50 ઓવરમાં 6 વિકેટ ગુમાવી 397 રન ફટકાર્યા હતા. જેના જવાબમાં અફઘાનિસ્તાનની ટીમ 50 ઓવરમાં 8 વિકેટ ગુમાવી 247 રન બનાવી શકી હતી. આ વિશ્વકપમાં રનના મામલે આ સૌથી મોટો વિજય છે. ઈંગ્લેન્ડની ટીમનો 5 મેચમાં આ ચોથો વિજય છે અને તે 8 પોઈન્ટ સાથે ટેબલમાં પ્રથમ સ્થાને પહોંચી ગઈ છે. જ્યારે અફઘાનિસ્તાનનો પાંચમી મેચમાં આ પાંચમો પરાજય છે. 

ઇયોન માર્ગને ફટકારી રેકોર્ડ 17 સિક્સ
ઈંગ્લેન્ડના કેપ્ટન ઇયોન મોર્ગને શાનદાર બેટિંગ કરતા માત્ર 57 બોલમાં સદી ફટકારી હતી. તેણે વિશ્વકપની એક ઈનિંગમાં સૌથી વધુ સિક્સ ફટકારવાના ક્રિસ ગેલના રેકોર્ડને પણ તોડ્યો હતો. મોર્ગન 71 બોલમાં 4 ચોગ્ગા અને 17 છગ્ગા સાથે 148 રન બનાવી આઉટ થયો હતો. તેણે જો રૂટ સાથે બીજી વિકેટ માટે 189 રનની ભાગીદારી કરી હતી. 

વનડેની એક ઈનિંગમાં સૌથી વધુ સિક્સ

બેયરસ્ટો-રૂટ સદી ચુક્યા
ટોસ જીતીને પ્રથમ બેટિંગ કરતા જોની બેયરસ્ટો અને જેમ્સ વિન્સેએ પ્રથમ વિકેટ માટે 44 રન જોડ્યા હતા. વિન્સે 31 બોલમાં 26 રન ફટકારીને આઉટ થયો હતો. ત્યારબાદ જોની બેયરસ્ટો અને જો રૂટે બીજી વિકેટ માટે 120 રનની ભાગીદારી કરી હતી. બેયરસ્ટો માત્ર 10 રનના સ્કોરથી પોતાની પ્રથમ વિશ્વકપ સદી ચુકી ગયો હતો. બેયરસ્ટો 99 બોલમાં 8 ચોગ્ગા અને 3 છગ્ગા સાથે 90 રન બનાવી આઉટ થયો હતો. તેને ગુલબદીન નાઇબે આઉટ કર્યો હતો. તો આ વિશ્વકપમાં જો રૂટનું શાનદાર પ્રદર્શન ચાલી રહ્યું છે. તે 82 બોલમાં 5 ચોગ્ગા અને 1 છગ્ગા સાથે 88 રન બનાવી આઉટ થયો હતો. 

જોસ બટલર અને બેન સ્ટોક્સ 2-2 રન બનાવી આઉટ થયા હતા. તો મોઇન અલી 9 બોલમાં 4 છગ્ગા અને 1 ચોગ્ગા સાથે 31 રન બનાવી અણનમ રહ્યો હતો. 

રાશિદ ખાને 9 ઓવરમાં આપ્યા 110 રન
ઈંગ્લેન્ડના બેટ્સમેનોએ અફઘાનિસ્તાનના સ્ટાર બોલર રાશિદ ખાન પર પ્રહાર કર્યાં હતા. રાશિદ ખાને પોતાના 9 ઓવરમાં સ્પેલમાં કોઈપણ વિકેટ ઝડપ્યા વિના 110 રન આપ્યા હતા. આ સાથે રાશિદ ખાન વિશ્વકપના ઈતિહાસમાં સૌથી વધુ રન આપનાર બોલર બની ગયો છે. ઓવર ઓલ તે બીજા સ્થાને આવી ગયો છે. 

વિશ્વકપના ઈતિહાસમાં સૌથી ઝડપી સદી ફટકારનાર બેટ્સમેન

પ્લેઇંગ ઇલેવન
ઈંગ્લેન્ડઃ જોની બેયરસ્ટો, જેમ્સ વિન્સે, જો રૂટ, ઇયોન મોર્ગન, જોસ બટલર, બેન સ્ટોક્સ, મોઇન અલી, ક્રિસ વોક્સ, આદિલ રાશિદ, જોફ્રા આર્ચર, માર્ક વુડ.

અફઘાનિસ્તાનઃ રહમદ શાહ, નૂર અલી જાદરાન, હઝરતુલ્લાહ જાદરાન, હસ્મતુલ્લાહ શાહિદી, અસગર અફઘાન, મોહમ્મદ નબી, ઇકરામ અલી, ગુલબદીન નાઇબ, રાશિદ ખાન, મુઝીબ ઉર રહમાન, દૌલત જાદરાન.