'ફોટો પડાવવા આયા છો...', 2 દિવસ બાદ હોસ્પિટલ પહોંચેલા રૂપાલા પર મૃતકોના પરિવારજનો ધૂઆંપૂઆં

Parshottam Rupala: રાજકોટમાં TRP ગેમ ઝોન આગની ઘટના હાલ ગુજરાત સહિત સમગ્ર દેશમાં ચર્ચામાં છે. 25 મેના રોજ લાગેલી આ આગકાંડમાં 27 લોકો જીવતા ભડથું થઈ ગયા હતા. આ આગ એટલી ભયાનક હતી કે મૃતદેહો ખરાબ રીતે બળી ગયા હતા. તે દરમિયાન રાજકોટ ભાજપના ઉમેદવાર પરશોત્તમ રૂપાલા સિવિલ હોસ્પિટલ પહોંચ્યા હતા, જ્યાં તેમને જોઈને મૃતકના સંબંધીઓ રોષે ભરાયા હતા.

રાજકોટ ભાજપના ઉમેદવાર અને કેન્દ્રીય મંત્રી પરશોત્તમ રૂપાલા મૃતકના પરિવારજનોને મળવા સિવિલ હોસ્પિટલ પહોંચ્યા હતા, જ્યાં તેમને જોઈને પરિવારજનોનો ગુસ્સો સાતમા આસમાને પહોંચી ગયો હતો અને કહ્યું હતું કે આ ઘટના 25 મેના રોજ બની હતી અને તમે આજે લોકોને મળવા આવ્યા છો.

આ અંગે રૂપાલાએ કહ્યું કે હું સતત અધિકારીઓના સંપર્કમાં છું. હું આ ઘટના અંગે સતત અપડેટ લેતો હતો. જેનાથી નારાજ થઈને પરિવારજનોએ કહ્યું કે, તો આટલા દિવસ ક્યાં હતા? લોકોએ કહ્યું કે તમે આજે શું મીડિયામાં ફોટો પડાવવા આવ્યા છો.

તમને જણાવી દઈએ કે આ પહેલા ગુજરાતના ગૃહમંત્રી હર્ષ સંઘવીએ કહ્યું હતું કે આ આગમાં મૃતદેહો એટલી ખરાબ રીતે સળગી ગયા છે કે તેમના ડીએનએ દ્વારા મૃતદેહોની ઓળખ કરવામાં આવી રહી છે. અત્યાર સુધીમાં ડીએનએ ટેસ્ટિંગ દ્વારા નવ મૃતદેહોની ઓળખ કરવામાં આવી છે. ફોરેન્સિક સાયન્સ લેબની મદદથી ડીએનએ પ્રોફાઇલિંગ દ્વારા વધુ મૃતદેહોની ઓળખ કરવામાં આવશે.

મૃતદેહોની ડીએનએ ટેસ્ટ દ્વારા ઓળખ
જોકે DNA ટેસ્ટની આ પ્રક્રિયામાં ઘણો સમય લાગી રહ્યો છે. દરમિયાન, પીડિતોના પરિવારો મૃતદેહને સોંપવા માટે રાજકોટ સિવિલ હોસ્પિટલની બહાર રાહ જોઈ રહ્યા છે, જેના કારણે સોમવારે સ્થાનિક પોલીસ સાથે ઝંપાઝપી પણ થઈ હતી.

ગૃહરાજ્યમંત્રી હર્ષ સંઘવીએ ગાંધીનગરમાં ફોરેન્સિક સાયન્સ લેબ (FSL)ની મુલાકાત લીધી હતી અને કહ્યું હતું કે અત્યાર સુધીમાં ડીએનએ સેમ્પલ દ્વારા નવ પીડિતોની ઓળખ કરવામાં આવી છે. તેમણે કહ્યું કે હું પીડિત પરિવારોની પીડા અને ગુસ્સો સમજી શકું છું જેમણે પોતાના પ્રિયજનોને ગુમાવ્યા છે. FSL ચોવીસ કલાક કામ કરી રહ્યું છે. એફએસએલના સમગ્ર સ્ટાફે તેમની રજાઓ અને અન્ય પ્લાન કેન્સલ કરી દીધા છે જેથી તમામ ડીએનએ સેમ્પલ વહેલી તકે મેચ કરી શકાય. મેં આ મામલે પરિસ્થિતિની સમીક્ષા કરી છે. મુખ્યમંત્રી ભૂપેન્દ્ર પટેલ પણ દર કલાકે આ બાબતે અપડેટ લઈ રહ્યા છે. 

રાજકોટ ગેમઝોનમાં 25મી મેના રોજ લાગી હતી આગ
25 મેના રોજ રાજકોટના TRP ગેમિંગ ઝોનમાં આગ લાગી હતી. આ ઘટનામાં બાળકો સહિત અત્યાર સુધીમાં 27 લોકોના મોત થયા છે. ટીઆરપી ગેમ ઝોનના છ ભાગીદારો સામે દોષિત હત્યાના આરોપમાં એફઆઈઆર નોંધવામાં આવી હતી. પોલીસે આ કેસમાં ચાર લોકોની ધરપકડ કરી છે.