અમદાવાદના જૂહાપૂરામાં ભારે વરસાદને કારણે પડેલા ભૂવામાં કાર ખાબકી

અમદાવાદ. અમદાવાદમાં આજે વહેલી સવારથી જ ધોધમાર વરસાદ પડવાનો શરૂ થઈ ગયો હતો. શહેરના અનેક નિચાણવાળા વિસ્તારમાં પાણી ભરાઈ ગયાં હતાં. શહેરમાં શુક્રવારે બપોર સુધીમાં સરેરાશ 5 ઈંચ જેટલો વરસાદ નોંધાતા વાતાવરણમાં ઠંડક પ્રસરી ગઈ હતી. વરસાદની સાથે જ શહેરમાં ભૂવા પડવાનું પણ શરૂ થઈ ગયું હતું. 

અમદાવાદના જૂહાપુરામાં અલબૂર્જ એપાર્ટમેન્ટ, હૈદરી પાર્કની પાસે રિલાયન્સ પેટ્રોલ પંપની નજીક રોડ પર જઈ રહેલી કાર અચાનક જ ભૂવો પડી જતાં સીધી ખાડામાં ખાબકી હતી. જોકે, સદનસીબે કારચાલકનો બચાવ થયો હતો. તેને કોઈ ખાસ ઈજા પહોંચી ન હતા. અહીં હાજર લોકોએ દોડી જઈને કાર ચાલકને ભૂવામાં પડેલી કારમાંથી બહાર આવવામાં મદદ કરી હતી.