ഒരു ശരാശരി ഡി.സി ആരാധകൻ ഇപ്പോൾ എന്താണ് ഏറ്റവും കൂടുതൽ മിസ്സ് ചെയ്യുന്നതെന്ന് ചോദിച്ചാൽ അതിന് ഒറ്റ ഉത്തരമേ ഉണ്ടാകൂ. സൂപ്പർ മാൻ. കുറച്ച് കൂടി വ്യക്തമാക്കി പറഞ്ഞാൽ ഹെന്റി കാവിലിന്‍റെ സൂപ്പർമാൻ. ഡി.സിയിൽ ഇതിന് മുൻപും ഒരുപാട് സൂപ്പർമാൻമാർ എത്തിയിട്ടുണ്ടെങ്കിലും മാൻ ഓഫ് സ്റ്റീൽ എന്ന ചിത്രത്തിലൂടെ ഹെന്റി കാവിൽ സൂപ്പർമാനായി ഉണ്ടാക്കിയ ഫാൻ ബെയിസും ഓളവും മറ്റൊരു നടനും ഉണ്ടാക്കാൻ സാധിച്ചിട്ടില്ലെന്ന് തന്നെ പറയാം.
എന്നാൽ 2017 ൽ പുറത്തിറങ്ങിയ ജസ്റ്റിസ് ലീഗ് എന്ന ചിത്രത്തിന് ശേഷം ഹെന്റി കാവിലിന്‍റെ സൂപ്പർമാനെ കേന്ദ്ര കഥാപാത്രമാക്കി ഒരു ചിത്രവും ഡി.സി അനൗൺസ് ചെയ്തിരുന്നില്ല. ഈ വർഷത്തെ സാൻഡിയാഗോ കോമിക് കോണിലും ഹെന്റി കാവിലുമായി ബന്ധപ്പെട്ട ഒരു വാർത്തയും ഡി.സി പുറത്ത് വിടാത്തതും ആരാധകരെ നിരാശരാക്കി. എന്നാൽ ഇപ്പോൾ എല്ലാ ആരാധകരെയും ആവേശത്തിന്‍റെ കൊടുമുടിയില്‍ എത്തിക്കുന്ന ഒരു വാർത്തയാണ് പുറത്ത് വരുന്നത്.
ALSO READ: Pallimani Teaser: തിരിച്ചുവരവിന് ഒരുങ്ങി നിത്യ ദാസ്; 'പള്ളിമണി' ടീസർ പുറത്തുവിട്ടു
ഒക്ടോബർ 20 ന് പുറത്തിറങ്ങുന്ന ഡി.സിയുടെ ബ്ലാക്ക് ആദം എന്ന ചിത്രത്തിൽ സൂപ്പർ മാൻ അതിഥി വേഷത്തിൽ എത്തുന്നു എന്ന റൂമറുകൾ സത്യമായിരിക്കുകയാണ്. ചിത്രത്തിന്‍റെ പ്രീമിയർ ഷോ കഴിഞ്ഞപ്പോൾ ലീക്കായ ചില ക്ലിപ്പുകളിലൂടെയാണ് ഈ വാർത്ത കൺഫോം ചെയ്തത്. ഡി.സിയുടെ ചില മുൻ പ്രോജക്ടുകളായ ഷസാമിലും പീസ് മേക്കറിലുമെല്ലാം സൂപ്പർമാൻ ഗസ്റ്റ് റോളിൽ എത്തിയിരുന്നു എങ്കിലും അതിലൊന്നും തന്നെ സൂപ്പർ മാന്‍റെ മുഖം കാണിച്ചിരുന്നില്ല.
എന്നാൽ ബ്ലാക്ക് ആദത്തിൽ ഹെന്റി കാവിൽ തന്നെ സൂപ്പർമാനായി എത്തുന്നു എന്നാണ് വാർത്തകൾ. ചിത്രത്തിന്‍റെ പോസ്റ്റ് ക്രെഡിറ്റ് സീനിൽ ബ്ലാക്ക് ആദവും സൂപ്പർമാനും മുഖാമുഖം നിൽക്കുന്ന ഒരു രംഗമാണ് ഡി.സി, ആരാധകർക്ക് വേണ്ടി ഒരുക്കി വച്ചിരിക്കുന്നത്. കോമിക്സിൽ ഷസാമിന്‍റെ വില്ലനായാണ് ബ്ലാക്ക് ആദം എത്തുന്നത്.
എന്നാൽ സൂപ്പർ മാനായും ബ്ലാക്ക് ആദം പലപ്പോഴും ഏറ്റ് മുട്ടിയിട്ടുണ്ട്. കോമിക്സിലെ ഈ ഐക്കോണിക്ക് രംഗം സിനിമയിലും ആവർത്തിക്കാനൊരുങ്ങുകയാണ് ഡി.സി. അതിന്‍റെ ആദ്യ പടിയായി ആകണം ബ്ലാക്ക് ആദം എന്ന ചിത്രത്തിൽ സൂപ്പർമാനെ കൊണ്ട് വരുന്നത്. എന്നാൽ സന്തോഷത്തോടൊപ്പം തന്നെ സ്നൈഡർ ആരാധകർക്ക് ചെറിയ നിരാശയും ഉണ്ടാകാൻ സാധ്യതയുണ്ട്.
ALSO READ: Kaapa Movie Update : കാപ്പ ഷൂട്ടിങ് പൂർത്തിയായി; ചിത്രം ഉടൻ തിയേറ്ററുകളിലേക്ക്
കാരണം സാക്ക് സ്നൈഡർ എന്ന സംവിധായകൻ തന്‍റെ ചിത്രങ്ങളിലൂടെ ആരാധകർക്ക് മുന്നിലെത്തിച്ച ഡാർക്ക് ടോണിലുള്ള സൂപ്പർമാനാകില്ല ബ്ലാക്ക് ആദത്തിൽ എത്താൻ പോകുന്നത്. കുറച്ച് കൂടി ലൈറ്റ് ആയ സൂപ്പർമാനാകും ഈ ചിത്രത്തിൽ കാമിയോ റോളിൽ എത്തുന്നത്. പഴയ ബ്ലൂ ആന്‍റ് റെഡ് കോസ്റ്റ്യൂമിലാകും ഹെന്റി കാവിലിന്‍റെ സൂപ്പർമാൻ ബ്ലാക്ക് ആദം എന്ന ചിത്രത്തിലെത്തുന്നത്. എന്തായാലും ഡ്വെയ്ൻ ജെൺസൺ എന്ന സൂപ്പർ താരത്തിനൊപ്പം ഹെന്റി കാവിലും എത്തുന്നതോടെ തീയറ്ററുകൾ പൂരപ്പറമ്പാകും എന്നത് ഏറെക്കുറെ ഉറപ്പാണ്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
