ഇടുക്കി: ചിന്നക്കനാലിൽ വീണ്ടും കാട്ടാനയുടെ ആക്രമണം. കാട്ടാന വീട് തകർത്തു. 301 കോളനിയിൽ താമസിക്കുന്ന ജ്ഞാനജ്യോതിഅമ്മാളിന്റെ വീടാണ് കാട്ടാന തകർത്തത്. വീടിന്റെ അടുക്കള ഭാഗത്തെ ഭിത്തിയും മുൻ വാതിലും ആനയുടെ ആക്രമണത്തിൽ തകർന്നു. അരിക്കൊമ്പനെ പ്രദേശത്ത് നിന്ന് മാറ്റിയ ശേഷം ആദ്യമായാണ് ഈ മേഖലയിൽ വീടിന് നേരെ കാട്ടാനയുടെ ആക്രമണം ഉണ്ടാകുന്നത്.
ജ്ഞാനജ്യോതിഅമ്മാളും മകൾ ഷീലയുമാണ് ഈ വീട്ടിൽ താമസിക്കുന്നത്. ചക്കകൊമ്പനാണ് ആക്രമണം നടത്തിയതെന്നാണ് നാട്ടുകാർ പറയുന്നത്. അമ്മാളും കുടുംബവും കഴിഞ്ഞ ദിവസം മകളുടെ വിദ്യാഭ്യാസ ആവശ്യത്തിനായി മറയൂരിലെ ബന്ധു വീട്ടിലേക്ക് പോയിരുന്നു. ഈ സമയത്താണ് വീടിന് നേർക്ക് കാട്ടാനയുടെ ആക്രമണം നടന്നത്.
ചക്കകൊമ്പനാണ് ആക്രമണം നടത്തിയതെന്നാണ് നാട്ടുകാർ പറയുന്നത്. ചിന്നക്കനാലിൽ നിന്ന് അരിക്കൊമ്പനെ മാറ്റിയ ശേഷം മേഖലയിൽ വീടുകൾക്കും കടകൾക്കും നേരെയുള്ള കാട്ടാന ആക്രമണം കുറഞ്ഞിരുന്നു. ഏതാനും ദിവസങ്ങളായി ചക്കകൊമ്പൻ ജനവാസ മേഖലയോട് ചേർന്നാണ് തമ്പടിച്ചിരിക്കുന്നത്. വീണ്ടും ആക്രമണം ഉണ്ടാകുമോയെന്ന ആശങ്കയിലാണ് നാട്ടുകാർ.
കാടിനുള്ളില്‍ നിന്ന ആന പാഞ്ഞടുത്തു, തുമ്പിക്കൈ കൊണ്ട് അടിച്ചു; ബൈക്ക് റൈഡേഴ്സ് സംഘത്തിന് നേരെ ആനയുടെ ആക്രമണം
തൃശ്ശൂര്‍: അതിരപ്പിള്ളി വാഴച്ചാല്‍ ആനക്കയത്ത് ബൈക്ക് റൈഡേഴ്സ് സംഘത്തിലെ യുവതിക്കും യുവാവിനും നേരെ കാട്ടാനയുടെ ആക്രമണം. മലക്കപ്പാറയിൽ നിന്നും അതിരപ്പിള്ളിയിലേക്ക് വരികയായിരുന്ന 21 അംഗ ബൈക്ക് റൈഡേഴ്സ് സംഘത്തിലെ യുവതിയെയും യുവാവിനെയുമാണ് കാകാട്ടാന ആക്രമിച്ചത്.
ആനക്കയത്ത് വെച്ചായിരുന്നു സംഭവം. തൃശൂർ മുളംങ്കുന്നത്ത്കാവ് സ്വദേശി രോഹിത്, എറണാകുളം സ്വദേശി സോന എന്നിവർക്കാണ് പരിക്കേറ്റത്. രോഹിത്തിന്‍റെ കാലിനും സോനയുടെ നട്ടെല്ലിനുമാണ് പരിക്കേറ്റത്. ഇരുവരെയും ഒപ്പമുണ്ടായിരുന്നവർ ചാലക്കുടി താലൂക്ക് ആശുപത്രിയിൽ എത്തിച്ചു.
മലക്കപ്പാറയിൽ നിന്നും അതിരപ്പിള്ളിയിലേക്ക് വരുന്നതിനിടയിൽ ആനക്കയത്ത് വെച്ച് കാടിനുള്ളില്‍ നിൽക്കുകയായിരുന്ന ആന ഇവരുടെ ബൈക്കിന് നേരെ പാഞ്ഞടുത്ത് തുമ്പിക്കൈ കൊണ്ട് അടിക്കുകയായിരുന്നു. ബൈക്കിന് പുറകിൽ ഇരുന്ന സോനയുടെ പുറത്താണ് തുമ്പിക്കൈ കൊണ്ടുള്ള ആദ്യ അടിയേറ്റത്. ഇതോടെ ബൈക്ക് നിയന്ത്രണം വിട്ടുമറിഞ്ഞു.
രോഹിത്തിനെ ആന തുടയിൽ ചവിട്ടുകയും തുമ്പിക്കൈ കൊണ്ട് വലിച്ചെറിയുകമായിരുന്നുവെന്ന് ഒപ്പമുണ്ടായിരുന്നവർ പറയുന്നു. 10 ബൈക്കിലും ഒരു കാറിലുമായിട്ടാണ് 21 അംഗ റെെഡേഴ്സ് സംഘം മലക്കപ്പാറയിൽ നിന്നും അതിരപ്പിള്ളിയിലേക്ക് തിരിച്ചത്. അഞ്ച് ജില്ലകളിൽ നിന്നുള്ള റൈഡർമാരാണ് സംഘത്തിൽ ഉണ്ടായിരുന്നത്. ആനയുടെ ആക്രമണത്തില്‍ മറ്റാർക്കും പരിക്കേറ്റിട്ടില്ല. എംഎൽഎ സനീഷ് കുമാർ ജോസഫ് താലൂക്ക് ആശുപത്രിയിലെത്തി പരിക്കേറ്റവരെ സന്ദർശിച്ചു.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
