ಹೊಸ ವರ್ಷದಲ್ಲಿ 10 ಗ್ರಾಂ ಚಿನ್ನ ಫ್ರೀ; ಯಾರಿಗೆ ಒಲಿಯಲಿದೆ ಅದೃಷ್ಟ!

2020 ರ ಜನವರಿ 1 ರಿಂದ ಅಸ್ಸಾಂ ಬಾಲಕಿಯರಿಗೆ 10 ಗ್ರಾಂ ಚಿನ್ನ ಉಚಿತವಾಗಿ ಸಿಗುತ್ತದೆ. ಈ ಯೋಜನೆಯನ್ನು ಹೊಸ ವರ್ಷದಲ್ಲಿ ಪ್ರಾರಂಭಿಸುವುದಾಗಿ ಅಸ್ಸಾಂ ಸರ್ಕಾರ ಘೋಷಿಸಿತ್ತು. ಈ ಯೋಜನೆಯ ಹೆಸರು 'ಅರುಂಧತಿ ಚಿನ್ನದ ಯೋಜನೆ'.

ಚಿನ್ನದ ಉಡುಗೊರೆ:
ಅರುಂಧತಿ ಚಿನ್ನದ ಯೋಜನೆ: ಇದರ ಅಡಿಯಲ್ಲಿ ಮದುಮಗಳು ಮದುವೆಯಲ್ಲಿ ಉಡುಗೊರೆಯಾಗಿ 10 ಗ್ರಾಂ ಚಿನ್ನವನ್ನು ಪಡೆಯುತ್ತಾರೆ. ಈಗ ಈ ಯೋಜನೆಯನ್ನು 2020 ರ ಜನವರಿ 1 ರಿಂದ ರಾಜ್ಯದಲ್ಲಿ ಜಾರಿಗೆ ತರಲಾಗುವುದು. ಬಿಜೆಪಿ ಸರ್ಕಾರದ ಈ ಯೋಜನೆಯ ಲಾಭ ಪಡೆಯಲು ಕೆಲವು ಷರತ್ತುಗಳಿವೆ.

ಷರತ್ತುಗಳೇನು?
ವಯಸ್ಕ ಹುಡುಗಿ ಅಂದರೆ ಮದುವೆಯ ಸಮಯದಲ್ಲಿ, ಹುಡುಗಿಗೆ 18 ವರ್ಷ ವಯಸ್ಸಾಗಿರಬೇಕು. ಹುಡುಗನ ವಯಸ್ಸು 21 ವರ್ಷ ಆಗಿರಬೇಕು. ಹುಡುಗಿ ಕನಿಷ್ಠ 10ನೇ ತರಗತಿವರೆಗೆ ಅಧ್ಯಯನ ಮಾಡಿರಬೇಕು. ವಿಶೇಷ ಮದುವೆ ಕಾಯ್ದೆ 1954 ರ ಅಡಿಯಲ್ಲಿ ವಧುವಿನ ವಿವಾಹದ ನೋಂದಣಿ ಅಗತ್ಯ.

ಕುಟುಂಬದ ಆದಾಯ 5 ಲಕ್ಷ:
ವಧುವಿನ ಕುಟುಂಬದ ವಾರ್ಷಿಕ ಆದಾಯವು 5 ಲಕ್ಷ ರೂ.ಗಿಂತ ಕಡಿಮೆಯಿರಬೇಕು ಎಂದು ಸಹ ಹೇಳಲಾಗಿದೆ. 
ನೆನಪಿಡಿ: ಈ ಯೋಜನೆಯ ಲಾಭವು ಹುಡುಗಿಯ ಮೊದಲ ಮದುವೆಯಲ್ಲಿ ಮಾತ್ರ ಲಭ್ಯವಿರುತ್ತದೆ.

ಚಿನ್ನ ಪಡೆಯುವುದು ಹೇಗೆ?
ರಾಜ್ಯ ಸರ್ಕಾರದ ಈ ಯೋಜನೆಯಡಿ ಹೆಣ್ಣುಮಕ್ಕಳಿಗೆ ಭೌತಿಕ ರೂಪದಲ್ಲಿ ಚಿನ್ನ ಸಿಗುವುದಿಲ್ಲ. ಮದುವೆ ನೋಂದಣಿ ಪ್ರಮಾಣಪತ್ರ(Marriage Registration Certificate) ಮತ್ತು ಅದರ ಪರಿಶೀಲನೆಯ ನಂತರ ಸರ್ಕಾರವು ವಧುವಿನ ಬ್ಯಾಂಕ್ ಖಾತೆಗೆ 30,000 ರೂ. ಗಳನ್ನು ಜಮಾ ಮಾಡಲಿದೆ.

ಮೊತ್ತವನ್ನು ಹೇಗೆ ನಿಗದಿಪಡಿಸಲಾಗಿದೆ:
ಸರ್ಕಾರ ಸರಾಸರಿ 10 ಗ್ರಾಂ ಚಿನ್ನದ ಬೆಲೆಯನ್ನು 30000 ರೂ. ಎಂದು ನಿಗದಿ ಪಡಿಸಿದೆ. ಇಡೀ ವರ್ಷದ ಚಿನ್ನದ ಸರಾಸರಿ ಬೆಲೆಯನ್ನು ಅಂದಾಜು ಮಾಡಿದ ನಂತರ ಇದನ್ನು ನಿಗದಿಪಡಿಸಲಾಗಿದೆ. ಖಾತೆಯಲ್ಲಿ ಹಣವನ್ನು ಪಡೆದ ನಂತರ, ಹುಡುಗಿ ಚಿನ್ನಾಭರಣ ಖರೀದಿಗೆ ರಶೀದಿಯನ್ನು ತೋರಿಸಬೇಕು.